កីឡាជាតិ
ជាតិ
ប្រដាល់សកលដាក់ក្តីរំពឹងមេដាយលើហ្វីលីក និងសៀកនិន ក្រោយកីឡាករ៣រូបរងបរាជ័យ ហង្ស រ៉ាម៉ន (ខៀវ) បានចាញ់កីឡាករថៃដោយពិន្ទុ។ រូបថត៖ NOCC/NagaWorld
× កីឡាករ សាន តុលា កីឡាករ ហង្ស រ៉ាម៉ន និងកីឡាករ ផល សុភ័ណ្ឌ សុទ្ធតែរងនូវការខកចិត្តរៀងៗក្នុងការប្រកួតកីឡាប្រដាល់សកលនាព្រឹត្តិការណ៍កីឡាស៊ីហ្គេមលើកទី២៩ នៅម៉ាឡេស៊ី កាលពីរសៀលថ្ងៃអាទិត្យ ទី២០ ខែសីហា នៅមជ្ឈមណ្ឌលពិព័រណ៌ MiTEC ។ នៅទីតាំងដដែលនាល្ងាចថ្ងៃចន្ទនេះ កីឡាករ២រូបទៀត នឹងចាប់ផ្តើមការប្រកួតរបស់ខ្លួន ដោយរំពឹងបោះជំហានទៅដណ្តើមមេដាយលើប្រភេទកីឡានេះ។
នាការប្រកួតនៅលើសង្វៀននៃមជ្ឈមណ្ឌល MiTEC កាលពីថ្ងៃអាទិត្យ សាន តុលា បានប្រកួតចាញ់កីឡាករវៀតណាម Huynh Ngoc Tan លើប្រភេទទម្ងន់៤៩គីឡូក្រាម នៅក្នុងទឹកទី១ បន្ទាប់មក ហង្ស រ៉ាម៉ន ចាញ់ពិន្ទុកីឡាករថៃ Tanes Ongjunta ក្នុងទម្ងន់៥២គីឡូក្រាម។
កីឡាករ ផល សុភ័ណ្ឌ ដែលត្រូវបានចាត់ទុកជាកីឡាករដ៏ឆ្នើមម្នាក់របស់កម្ពុជា បានរងនូវការខកចិត្តក្នុងទឹកទីពីរ ក្រោមកណ្តាប់ដៃរបស់កីឡាករថៃ Wuttichai Masuk ដែលជាម្ចាស់មេដាយមាសស៊ីហ្គេម ពីរសម័យកាលជាប់ៗគ្នា Asian Games ឆ្នាំ២០១៤ រួមទាំងជើងឯកអាស៊ី២លើក។
យោងតាមកម្មវិធីប្រកួតដែលផ្សាយដោយគណៈកម្មាធិការជាតិអូឡាំពិកកម្ពុជា (NOCC) នាល្ងាចថ្ងៃទី២១ ខែសីហា នេះ ណាត សៀកនិន ត្រូវប៉ះជាមួយកីឡាករសិង្ហបុរី ក្នុងទម្ងន់៥៦គីឡូក្រាម មុនពេលដែលកីឡាករដើមកំណើតគុយបា ហ្វីលីក ម៉ឺលីន ម៉ាទីន តទល់ជាមួយកីឡាករហ្វីលីពីន ក្នុងប្រភេទទម្ងន់ ៨១គីឡូក្រាម៕
Tag:
SEA Games 2017
ប្រដាល់សកល
© រក្សាសិទ្ធិដោយ thmeythmey.com