អន្តរជាតិ
១០ នាក់បាត់ខ្លួន និង៥នាក់របួសក្រោយនាវាចម្បាំងអាមេរិកបុកកប៉ាល់ដឹកទំនិញ
× នាវាចម្បាំងអាមេរិក USS John S McCain បានបុកកប៉ាល់ជំនួញAlnic MCកាលពីម៉ោង៦:២៤នាទីនៅថ្ងៃទី២១ខែសីហាខណៈពេលធ្វើដំណើរនៅលើផ្លូវទឹកឆ្នេរសមុទ្រខាងកើតសិង្ហបុរីទៅកាន់កំពង់ផែដូចរាល់ដង។ឧប្បត្តិហេតុនេះបានធ្វើឲ្យមនុស្សប្រាំនាក់ត្រូវរបួស និងដប់នាក់ទៀតបាត់ខ្លួន។
មនុស្សដប់នាក់បានបាត់ខ្លួន និងប្រាំនាក់ទៀតរងរបួស ក្រោយមានការប៉ះទង្គិចគ្នារវាងកប៉ាល់ដឹកទំនិញ Alnic MC ដែលមានប្រវែង១៨០ម៉ែត ជាមួយនាវាចម្បាំងអាមេរិក USS John S McCain ព្រឹកថ្ងៃចន្ទ។ នាវាដឹកទំនិញនេះធ្វើដំណើរតាមឆ្នេរសមុទ្រខាងកើតសិង្ហបុរីទៅកាន់កំពង់ផែដូចរាល់ដងនោះ មុនប៉ះជាមួយនាវាចម្បាំងអាមេរិកដែលធ្វើដំណើរពីឆ្នេរសមុទ្រខាងកើតសិង្ហបុរីទៅកាន់ច្រកសមុទ្រMalacca។
កងទ័ពជើងទឹកអាមេរិកបានចេញសេចក្តីថ្លែងការណ៍មួយដោយបញ្ជាក់ពីការខូតខាត និងចំនួនមនុស្សបាត់ខ្លួន ឬរងរបួសពេលដោយសារការប៉ះទង្គិចគ្នានេះ។ ចំណែកនាវាចម្បាំងអាមេរិករងការខូចខាតផ្នែកខាងក្រោយ ហើយឧប្បត្តិហេតុនេះនឹងត្រូវគេស្រាវជ្រាវបន្ថែមឲ្យបានច្បាស់លាស់។
រដ្ឋមន្ត្រីការពារជាតិសិង្ហបុរីបានទទួលស្គាល់ថា មានឧបទ្ទវហេតុនេះកើតឡើងពិតមែននៅក្នុងដែនទឹកសិង្ហបុរី។ ក្រោយមានគ្រោះថ្នាក់នេះ ក្រុមស្រាវជ្រាវ និងជួយសង្គ្រោះក្នុងតំបន់បន្តសហការជាមួយនឹងអាជ្ញាធរក្នុងស្រុកផងដែរដើម្បីសង្គ្រោះនិងស្វែងរកអ្នកបាត់ខ្លួន។ ម៉ាឡេស៊ីដែលនៅជិតខាងនោះក៏បានបញ្ជូនកប៉ាល់ទៅជួយសង្គ្រោះផងដែរ។
សូមទាញការចាប់អារម្មណ៍បន្តិចថា គេហទំព័រ MarineTraffic ពណ៌នាថា កប៉ាល់ដឹកទំនិញ Alnic MC ជានាវាសម្រាប់ដឹកជញ្ជូនសារធាតុគីមី និងប្រេងដែលមានប្រវែង១៨០ម៉ែត និងមានទម្ងន់ជាង៥ម៉ឺនតោន។
សូមជម្រាបដែរថា នេះជាឧប្បត្តិហេតុលើកទី២ហើយដែលនាវាចម្បាំងអាមេរិកបានប៉ះទង្គិចនឹងកប៉ាល់ដឹកទំនិញផ្សេងៗ។ កាលពីខែមិថុនា នាវាចម្បាំងអាមេរិក USS Fitzgerald ក៏បានប៉ះទង្គិចជាមួយកប៉ាល់ដឹកទំនិញហ្វីលីពីននៅជិតឆ្នេរសមុទ្រជប៉ុនដែរ ហើយវាបានបង្កឲ្យមនុស្សប្រាំពីរនាក់ស្លាប់៕
Tag:
USS John S McCain
សិង្ហបុរី
Alnic MC
© រក្សាសិទ្ធិដោយ thmeythmey.com