ជាតិ
មេបក្សប្រឆាំង៖«យើង មិនយកប្រាក់ និងបុណ្យសក្តិ ទៅទាក់ទាញពលរដ្ឋទេ» ឯកឧត្តម កឹម សុខា ប្រធានគណបក្សសង្គ្រោះជាតិ ថ្លែងទៅកាន់មន្រ្តីមូលដ្ឋានរបស់ខ្លួន ក្នុងខេត្តពោធិ៍សាត់ នៅព្រឹកថ្ងៃទី២១ ខែសីហា ឆ្នាំ២0១៧។ រូបភាពីទំព័រហ្វេសបុក Kem Sokha
× ភ្នំពេញ៖ ក្នុងការបោះឆ្នោត ឯកឧត្តម កឹម សុខា ប្រធានគណបក្សសង្គ្រោះជាតិ ជឿជាក់លើកម្មវិធីនយោបាយ ដើម្បីទាក់ទាញការគាំទ្រពីប្រជាពលរដ្ឋ។ ផ្ទុយទៅវិញ ការប្រើប្រាស់ថវិកា តួនាទី និងតំណែង ដើម្បីទាក់ទាញទឹកចិត្តប្រជាពលរដ្ឋ មិនស្ថិតក្នុងយុទ្ធសាស្ត្ររបស់មេបក្សប្រឆាំងរូបនេះ ឡើយ។
ឯកឧត្តម កឹម សុខា បានថ្លែងនូវសារនយោបាយខាងលើ ក្នុងវេទិកាចុះជួបមន្ត្រីមូលដ្ឋានរបស់ខ្លួនក្នុងខេត្តពោធិ៍សាត់ នៅព្រឹកថ្ងៃទី២១ ខែសីហា ឆ្នាំ២0១៧នេះ។ សារនយោបាយនេះ ក៏ត្រូវបានឯកឧត្តម កឹម សុខា យកទៅបង្ហោះលើទំព័រហ្វេសប៊ុក ដែរ។
តាមរយៈទំព័រហ្វេសប៊ុកឯកឧត្តម កឹម សុខា បានសរសេរយ៉ាងដូច្នេះ៖យើងនឹងយកកម្មវិធីនយោបាយ និងគោលការណ៍របស់គណបក្សសង្គ្រោះជាតិ ដើម្បីដាក់ជូនប្រជាពលរដ្ឋខ្មែរ ជាអ្នកសម្រេច ដោយយើងមិនយកទឹកប្រាក់ តួនាទី បុណ្យសក្តិ ទៅទាក់ទាញទឹកចិត្តប្រជាពលរដ្ឋនោះទេ»។
ឯកឧត្តម កឹម សុខា បញ្ជាក់ថា គណបក្សសង្គ្រោះជាតិ ត្រូវរៀបចំកម្មវិធីនយោបាយជាក់ស្ដែង ដែលបម្រើផលប្រយោជន៍ប្រជាពលរដ្ឋ។ ឯកឧត្តម កឹម សុខា នៅតែនិយាយថា លទ្ធផលបោះឆ្នោត ដែលឆ្លុះបញ្ចាំងអំពីឆន្ទៈពិតប្រាកដរបស់ប្រជាពលរដ្ឋ គឺជាអ្វីដែលគណបក្សសង្គ្រោះជាតិ ចង់ឃើញ៕
© រក្សាសិទ្ធិដោយ thmeythmey.com