សភាហ្វីលីពីនបញ្ជាឲ្យស៊ើបរឿងប៉ូលិសសម្លាប់ក្មេងប្រុសម្នាក់ក្នុងសង្គ្រាមគ្រឿងញៀនក្រោយប្រជាជនផ្ទុះកំហឹង

អន្តរជាតិ

សភាហ្វីលីពីនបញ្ជាឲ្យស៊ើបរឿងប៉ូលិសសម្លាប់ក្មេងប្រុសម្នាក់ក្នុងសង្គ្រាមគ្រឿងញៀនក្រោយប្រជាជនផ្ទុះកំហឹង

21, Aug 2017 , 9:39 pm

រូបភាព

រូបភាព៖ គណនីហ្វេសប៊ុក Ezra Acayan

ដោយ: សៅ ផលនិស្ស័យ (Sao Phal Niseiy)

សមាជិកព្រឹទ្ធសភាហ្វីលីពីនបានអនុម័តឲ្យមានការស៊ើបអង្កេតជាផ្លូវការក្នុងករណីសម្លាប់កុមារម្នាក់វ័យ ១៧ ឆ្នាំក្នុងប្រតិបត្តិការប្រឆាំងគ្រឿងញៀនសប្តាហ៍មុន។ ការដាក់បញ្ជាឲ្យស៊ើបអង្កេតនេះកើតឡើងក្រោយប្រជាពលរដ្ឋហ្វីលីពីនប្រតិកម្ម និងតវ៉ាខ្លាំងៗទាមទាររកយុត្តិធម៌ ក្រោយកុមារឈ្មោះKian Loyd Delos Santos ត្រូវបានប៉ូលិសបាញ់សម្លាប់ក្រោមហេតុផលបង្ក្រាបគ្រឿងញៀន។ ឪពុកម្តាយជនរងគ្រោះបានអះអាងថា កុមារ Kian មិនមានជាប់ពាក់ព័ន្ធរឿងជួញដូរគ្រឿងញៀន និងមានអាវុធបាញ់តបតជាមួយប៉ូលិសឡើយ។

ករណីប៉ូលិសបាញ់សម្លាប់កុមារឈ្មោះKian Loyd Delos Santos វ័យ ១៧ឆ្នាំ ជនជាតិហ្វីលីពីន និងជាជាសិស្សថ្នាក់ទី ១១ ក្នុងប្រតិបត្តិការបង្ក្រាបគ្រឿងញៀនកាលពីសប្តាហ៍មុន បានធ្វើឲ្យប្រជាជនហ្វីលីពីនផ្ទុះកំហឹង និងទាមទារឲ្យរដ្ឋាភិបាលហ្វីលីពីនស្វែងរកយុត្តិធម៌ដល់កុមាររូបនេះដែរ។

សារព័ត៌មានហ្វីលីពីន Inquirer បានចុះផ្សាយថា ពាក់ព័ន្ធការស្លាប់នេះ សាក្សីជាច្រើននាក់នៅកន្លែងកើតហេតុអះអាងថា ប៉ូលិសបានចាប់ក្មេងប្រុសដែលគ្មានអាវុធក្នុងដៃនោះទៅកន្លែងស្ងាត់ ហើយបន្ទាប់ប្រគល់កាំភ្លើងឲ្យក្មេងប្រុសនោះ ហើយបញ្ជាឲ្យគេរត់។ប៉ុន្តែក្មេងប្រុសបានសូមអង្វរប៉ូលិសដូច្នេះថា ៖«កុំៗ! សូមកុំសម្លាប់ខ្ញុំ។ ស្អែកខ្ញុំត្រូវប្រលងទៀត»។ ទោះក្មេងប្រុសរូបនេះអង្វរក៏ដោយ គេក៏ត្រូវប៉ូលិសបាញ់សម្លាប់កុមាររូបនេះដដែល។

ក្រុមគ្រួសារជនរងគ្រោះថ្លែងប្រាប់សារព័ត៌មាន Rappler ទាំងយំសោកថា កូនខ្លួនគ្មានជាប់ពាក់ព័ន្ធករណីគ្រឿងញៀនអ្វីឡើយ ហើយក៏គ្មានអាវុធដែរ។ រាល់ថ្ងៃគេត្រឹមលក់ស្ករគ្រាប់ដើម្បីយកលុយទៅរៀនប៉ុណ្ណោះ។ ពួកគេក៏បានអំពាវនាវយ៉ាងទទូចទៅកាន់រដ្ឋបាលលោក ឌូទើតេ ឲ្យជួយរកយុត្តិធម៌ឲ្យពួកគេនិងកូនប្រុសដែលស្លាប់បាត់បង់ជីវិតទាំងមិនដឹងអ្វីសោះនោះ។ យ៉ាងណាក៏ដោយ ឯខាងប៉ូលិសអះអាងថា ក្មេងប្រុសវ័យ ១៨ឆ្នាំរូបនេះមានអាវុធក្នុងដៃ និងបានបាញ់លើសមត្ថកិច្ចមុនទើបបានជាមានការបាញ់តបតរហូតបណ្តាលឲ្យមានគ្រោះថ្នាក់បែបនេះ។

ក្រោយមានប្រតិកម្មច្រើន រដ្ឋបាលលោក រ៉ូឌ្រីហ្គោ ឌូទើតេបានចេញបញ្ជាឲ្យមានការស៊ើបអង្កេតករណីបាញ់សម្លាប់ជនស្លូតត្រង់នេះដែរ។ អ្នកនាំពាក្យប្រធានាធិបតីហ្វីលីពីនលោក Ernesto Abella បានថ្លែងថា៖ ឧបទ្ទវហេតុដែលគួរឲ្យសោកស្តាយបំផុតនេះបានធ្វើសាធារណៈជនហ្វីលីពីនសោកសង្រេង និងក្រៀមក្រំពេកក្រៃ ហើយវាក៏តម្រូវឲ្យសមត្ថកិច្ចដែលអនុវត្តតួនាទីនិងអំណាចរបស់ខ្លួនដោយធ្វេសប្រហែសនោះទទួលខុសត្រូវផងដែរ»។

អ្នកនាំពាក្យខាងលើបានបន្ថែមថា ប្រធានាធិបតីបញ្ជាឲ្យមានការស៊ើបអង្កេតពេញលេញមួយដើម្បីជម្រះមន្ទិលសង្ស័យ និងចៀសវាងឲ្យបាននូវបញ្ហាដែលមិនគួរកើតឡើងដូចជាការស្លាប់របស់ជនស៊ីវិលមិនដឹងដែរ។ ប៉ុន្តែប្រធានាធិបតីហ្វីលីពីននៅតែមិនបោះបញ្ឈប់សង្គ្រាមគ្រឿងញៀនដែលសម្លាប់មនុស្សអស់ជាង បីពាន់នាក់នេះជាដាច់ខាត ទោះមានការស្នើសុំផង និងថ្កោលទោសផងក៏ដោយ។

សមាជិកព្រឹទ្ធសភាថ្កោលទោស និងទាមទារឲ្យមានការស៊ើបអង្កេតជាផ្លូវការ

សារព័ត៌មានហ្វីលីពីន Inquirer បានចុះផ្សាយថា ថ្ងៃចន្ទទី ២១ ខែសីហានេះ សមាជិកព្រឹទ្ធសភាហ្វីលីពីនបានឯកភាពគ្នាសម្រេចឲ្យមានការស៊ើបអង្កេតជាសាធារណៈមួយពាក់ព័ន្ធការបាញ់សម្លាប់ក្មេងប្រុសវ័យ ១៧ឆ្នាំក្នុងប្រតិបត្តិការប្រឆាំងគ្រឿងញៀននៅក្រុង Calooncan កាលពីថ្ងៃពុធសប្តាហ៍មុន។ ការសម្រេចបែបនេះកើតឡើងក្រោយពេលប្រជាជនហ្វីលីពីផ្ទុះកំហឹង និងនាំគ្នាទិតៀនអាជ្ញាធរជុំវិញករណីបាញ់សម្លាប់ក្មេងប្រុសដែលគេចាត់ទុកជាជនស្លូតត្រង់នោះ។

តាមពិតទៅសមាជិកព្រឹទ្ធសភាហ្វីលីពីនទាំងនោះបានចុះហត្ថលេខាលើដំណោះស្រាយមួយសំដៅបង្កើតគណៈកម្មការស៊ើបអង្កេតនេះកាលពីថ្ងៃអាទិត្យទី ២០ សីហាម្សិលមិញ។ ដំណោះស្រាយនោះនោះបានដាក់បញ្ជាឲ្យគណៈកម្មការពាក់ព័ន្ធចាប់ផ្តើនការស៊ើបអង្កេតមួយពេញលេញដើម្បីកំណត់អ្នកទទួលកំហុសក្នុងចំណោមក្រុមប៉ូលិសជាតិហ្វីលីពីនដែលកំពុងបង្ក្រាបគ្រឿងញៀនខុសច្បាប់នោះរហូតដល់បង្កឲ្យមានជនស៊ីវិលស្លាប់បែបនេះនោះ។

បើតាមសារព័ត៌មាន Inquirer ដំណោះស្រាយនោះបានបញ្ជាក់ដូច្នេះ៖« ក្នុងការអនុវត្តសង្គ្រាមប្រឆាំងគ្រឿងញៀនខុសច្បាប់របស់រដ្ឋបាលលោក ឌូទើតេ រដ្ឋាភិបាលនេះត្រូវតែធានាឲ្យបានថា គ្មានជនស៊ីវិលស្លូតត្រង់ត្រូវរងការគំរាមកំហែង ហើយអ្នកស្ថិតនៅក្នុងដែនសមត្ថកិច្ចទាំងក្នុងស្ថាប័នប៉ូលិស និង ភ្នាក់ងាររដ្ឋាភិបាលត្រូវតែទទួលខុសត្រូវចំពោះរាល់បទឧក្រិដ្ឋដែលខ្លួនប្រព្រឹត្តផងដែរ»។

ក្រៅពីនេះ សមាជិកសភាក៏ទាមទារឲ្យភាគីពាក់ព័ន្ធជាពិសេសរដ្ឋាភិបាលហ្វីលីពីនបន្តស្រាវជ្រាវ និងស៊ើបអង្កេតឲ្យបានស៊ីជម្រៅរាល់ករណីឧបទ្ទវហេតុដែលប្រហាក់ប្រហែលនឹងការស្លាប់របស់កុមារ Kian ដែរ ក្នុងពេលដែលគេបន្តអនុវត្តសង្គ្រាមគ្រឿងញៀននោះ៕