ស៊ីហ្គេម៖ អត្តពលិកកម្ពុជាបានកក់មេដាយ៣ទៀតហើយ ឲ្យកម្ពុជា

កីឡាជាតិ

ជាតិ

ស៊ីហ្គេម៖ អត្តពលិកកម្ពុជាបានកក់មេដាយ៣ទៀតហើយ ឲ្យកម្ពុជា

21, Aug 2017 , 5:38 pm

រូបភាព

កីឡាការិនី អ៊ុន ស្រីយ៉ា កំពុងពិភាក្សាជាមួយគ្រូបង្វឹកលោក សុខ ម៉ុង ពេលប្រកួតជាមួយឡាវ

ដោយ:

កីឡាករប្រដាល់សកលជម្រើសជាតិ ណាត សៀកនិន (ពេជ្រ ម្ទេសខ្មាំង)បានកក់មេដាយសំរឹទ្ធ១ ពីការប្រកួតកីឡាស៊ីហ្គេម នៅម៉ាឡេស៊ីឲ្យកម្ពុជា បន្ទាប់ពីបានយកឈ្នះកីឡាករសិង្ហបុរី Daniel Dbdul ដោយពិន្ទុ នៅរសៀលថ្ងៃទី២១ ខែសីហា នេះ។ ទន្ទឹមនឹងនេះ កីឡាករប៉េតង់ សុខ ចាន់មាន និងកីឡាការិនី អ៊ុន ស្រីយ៉ា ក៏បានកក់មេដាយម្នាក់១គ្រឿងឲ្យកម្ពុជាផងដែរ។

ក្រោយឆ្លងកាតា់ការប្រកួត៣ទឹកយ៉ាងស្វិតស្វាញ នៅកីឡដ្ឋាន MITEC, Hall 8 កីឡាករ ណាត សៀកនិន ត្រូវបានអាជ្ញាកណ្តាល កាត់ក្តីឲ្យឈ្នះ កីឡាករសិង្ហបុរី Daniel Dbdul ដោយពិន្ទុលើប្រភេទទម្ងន់ក្រោម៥៦គីឡូក្រាម។ ជ័យជម្នះនេះ មានន័យថា សៀកនិន បានកក់មេដាយ១ទៀត លើវិញ្ញាសាប្រដាល់សកលឲ្យកម្ពុជា។ កីឡាករដែលគេដាក់រហស្សនាម ពេជ្រ ម្ទេសខ្មាំង ត្រូវជួបប្រកួតជាមួយ កីឡាករហ្វីលីពីន ក្នុងវគ្គពាក់កណ្តាលផ្តាច់ព្រ័ត្រ នៅថ្ងៃទី២២ ខែសីហា។

ជាមួយគ្នានេះ កីឡាករ សុខ ចាន់មាន និងកីឡាការិនី អ៊ុន ស្រីយ៉ា សុទ្ធតែមានមេដាយសំរឹទ្ធម្នាក់១ នៅក្នុងដៃ ក្រោយយកឈ្នះគូប្រជែងលើវិញ្ញាសា១នាក់ ទល់១នាក់ រៀងៗខ្លួន។ ក្នុងនោះកីឡាករ សុខ ចាន់មាន យកឈ្នះកីឡាករសិង្ហបុរី ១៣-៤ បន្ទាប់មកឈ្នះថៃ ១៣-៤ និងហ្វីលីពីន ១៣-០។ រីឯកីឡាការិនី អ៊ុន ស្រីយ៉ា យកឈ្នះកីឡាការិនីឡាវ ១៣-៩ ឈ្នះមីយ៉ាន់ម៉ា ១៣-៩ និងកីឡាការិនីម្ចាស់ផ្ទះម៉ាឡេស៊ី ១៣-៩។

អត្តពលិកកម្ពុជាទាំងពីររូបនេះ នឹងដឹកដៃគ្នា ឡើងទៅកាន់វគ្គពាក់កណ្តាលផ្តាច់ព្រ័ត្រ នៅថ្ងៃទី២២ ខែសីហា ក្នុងនោះកីឡាករ សុខ ចាន់មាន ជួបជាមួយកីឡាករម៉ាឡេស៊ី ខណៈកីឡាការិនី អ៊ុន ស្រីយ៉ា ប៉ះកីឡាការិនីវៀតណាម៕