ប្រធានាធិបតីកូរ៉េខាងត្បូងសុំទោសប្រជាជនជុំវិញការរាលដាលស៊ុតមានថ្នាំសម្លាប់សត្វល្អិត

អន្តរជាតិ

ប្រធានាធិបតីកូរ៉េខាងត្បូងសុំទោសប្រជាជនជុំវិញការរាលដាលស៊ុតមានថ្នាំសម្លាប់សត្វល្អិត

21, Aug 2017 , 11:19 pm

រូបភាព

ដោយ: តន ចាន់រិទ្ធារ៉ា

ប្រធានាធិបតីកូរ៉េខាងត្បូង មូន ចេអ៊ីន បានសុំទោសប្រជាជនទាំងអស់ជុំវិញរឿងអាស្រូវនៃការសាយភាយស៊ុតដែលមានជាតិគីមីប៉ះពាល់ដល់សុខភាព។ លោក មូន ចេអ៊ីន ក៏ណែនាំឲ្យមានការចាត់វិធានការមូលដ្ឋានដែលចាំបាច់សំដៅលើកម្ពស់សុវត្ថិភាពចំណីអាហារ និងបរិស្ថានចិញ្ចឹមសត្វផងដែរ ដើម្បីចៀសវាងបញ្ហាកើតឡើងម្ដងទៀត ព្រោះវិធានការឆ្លើយតបរបស់ស្ថាប័នពាក់ព័ន្ធនៅមិនទាន់គ្រប់គ្រាន់នៅឡើយទេ។

រឿងអាស្រូវការរាលដាលស៊ុតមានថ្នាំសម្លាប់សត្វល្អិត កំពុងបង្កការព្រួយបារម្ភយ៉ាងខ្លាំងនៅកូរ៉េខាងត្បូង និងធ្វើឲ្យរដ្ឋាភិបាលប្រធានាធិបតី មូន ចេអ៊ីន រងការរិះគន់យ៉ាងខ្លាំងដូចគ្នាដែរ។ លោក មូន ចេអ៊ីន បានសុំអធ្យាស្រ័យពីសំណាក់ប្រជាជនកូរ៉េខាងត្បូងចំពោះបញ្ហានេះ ដោយបានទទួលស្គាល់ថា បញ្ហានេះមិនត្រឹមប៉ះពាល់អ្នកប្រើប្រាស់ទូទៅឡើយ តែក៏បង្កការខូចខាតដល់កសិករ ម្ចាស់ភោជនីយដ្ឋាន និងម្ចាស់កសិដ្ឋានធំៗឯទៀត។

យោងតាមទីភ្នាក់ងារព័ត៌មាន Yonhap ក្នុងកិច្ចប្រជុំគណៈរដ្ឋមន្ត្រីនៅថ្ងៃទី២១ ខែសីហា លោក មូន ចេអ៊ីន បានទទួលស្គាល់ការប្រឹងប្រែងរបស់រដ្ឋាភិបាលក្នុងការដោះស្រាយបញ្ហាព្រួយបារម្ភរបស់ប្រជាជន។ យ៉ាងណាក្ដី ប្រធានាធិបតីទើបកាន់តំណែងបាន១០០ថ្ងៃរូបនេះបាននិយាយដែរថា ការខ្វះខាតជំនាញរបស់ស្ថាប័នពាក់ព័ន្ធ និងការបង្កកំហុសក្នុងការដោះស្រាយបញ្ហា កាន់តែធ្វើឲ្យប្រជាជនព្រួយបារម្ភកាន់តែខ្លាំង។

ជុំវិញបញ្ហា លោក មូន ចេអ៊ីន ក៏បានណែនាំឲ្យត្រួតពិនិត្យប្រព័ន្ធត្រួតពិនិត្យសុវត្ថិភាពក្នុងឧស្សាហកម្មចិញ្ចឹមសត្វទាំងមូលឡើងវិញ និងត្រូវចាត់វិធានដោះស្រាយឲ្យបានលឿន ក៏ដូចជាត្រូវធានាថាប្រជាជនអាចជឿទុកចិត្តបានទៀតផង។ ដោយចាត់ទុកសុវត្ថិភាពចំណីអាហារជាបញ្ហាប៉ះពាល់សុខភាពប្រជាជនផ្ទាល់ ប្រធានាធិបតីកូរ៉េខាងត្បូងក៏បង្គាប់ឲ្យមានការចេញផ្សាយព័ត៌មានលម្អិតស្ដីពីវិធានការរបស់រដ្ឋាភិបាលផងដែរ។

ការសុំទោសរបស់មេដឹកនាំកូរ៉េខាងត្បូង ធ្វើឡើងបន្ទាប់ក្រសួងកសិកម្មប្រទេសនេះប្រកាសពីការរកឃើញស៊ុតមានផ្ទុកសារធាតុគីមីហាមឃាត់ក្នុងកសិដ្ឋានចិញ្ចឹមសត្វចំនួនបី ដែលធ្វើឲ្យចំនួនកសិដ្ឋានប្រើប្រាស់ថ្នាំគីមីកើនដល់៥២ហើយ។ រដ្ឋាភិបាលកូរ៉េខាងត្បូងប្រកាសហើយថា ស៊ុតទាំងអស់ដែលមកពីកសិដ្ឋានទាំង៥២កន្លែង នឹងត្រូវរឹបអូស ហើយបំផ្លាញចោលតែម្ដង។ បន្ទាប់ពីការបែកធ្លាយរឿងអាស្រូវនេះ រដ្ឋាភិបាលកូរ៉េខាងត្បូងក៏ចាត់វិធានការត្រួតពិនិត្យកសិដ្ឋានទាំងអស់។

រដ្ឋាភិបាលលោក មូន ចេអ៊ីន រងការរិះគន់យ៉ាងខ្លាំងពីសំណាក់ប្រជាជនកូរ៉េខាងត្បូង ព្រោះគ្មានសមត្ថភាពទប់ស្កាត់ការសាយភាយស៊ុតមានផ្ទុកជាតិគីមីបាន ក៏ដូចជាមិនបានត្រួតពិនិត្យគុណភាពស៊ុតឲ្យបានដិតដល់ផងដែរ។ យ៉ាងណាក្ដី ក្រសួងកសិកម្មកូរ៉េខាងត្បូងក៏បញ្ជាក់ដែរថា សារធាតុគីមីដែលរកឃើញក្នុងស៊ុតទាំងនោះ អាចបង្កគ្រោះថ្នាក់តិចតួចសម្រាប់សុខភាពប៉ុណ្ណោះ។ យ៉ាងណាមិញ ការប្រមូលស៊ុតមានថ្នាំគីមីនឹងនៅតែបន្តធ្វើដើម្បីកម្ទេចចោល៕