ជាតិ
អភិបាលខេត្តសៀមរាបនឹងផ្តល់ម៉ូតូម្នាក់មួយគ្រឿងដល់សិស្សប្រឡងជាប់និន្ទេស Aឆ្នាំនេះ រូបភាព៖ ហ្វេសប៊ុក អភិបាលខេត្តសៀមរាប លោក ឃឹម ប៊ុនសុង
× សៀមរាប៖ អភិបាលខេត្តសៀមរាប លោក ឃឹម ប៊ុនសុង មានប្រសាសន៍ថា លោកនឹងផ្តល់ជូនម៉ូតូម្នាក់មួយគ្រឿង ដល់បេក្ខជន ដែលប្រឡងជាប់និន្ទេស A នៅឆ្នាំនេះ។ ការថ្លែងបែបនេះរបស់អភិបាលខេត្តសៀមរាប នៅក្នុងពិធីបើកវិញ្ញាសារប្រឡង មធ្យមសិក្សាទុតិយភូមិឆ្នាំ២០១៧ នៅវិទ្យាល័យ ១០ មករា ១៩៧៩ នៅព្រឹកថ្ងៃទី២១ សីហា។
ក្រៅពីប្រកាសផ្តល់ជូនម៉ូតូម្នាក់មួយគ្រឿង ដល់សិស្សប្រឡងជាប់និន្ទេសA ហើយនោះ លោក ឃឹម ប៊ុនសុង បានលើកទឹកចិត្តដល់បេក្ខជនប្រឡងទាំងអស់ ត្រូវប្រឹងប្រែងឲ្យអស់សមត្ថភាព ដើម្បីទទួលបានពិន្ទុល្អ។ លោកក៏បានកោតសរសើរចំពោះដំណើរការរៀបចំការប្រឡង របស់ក្រសួងអប់រំ យុវជន និងកីឡាផងដែរ។
តាមរបាយការណ៍របស់ប្រធានមន្ទីរអប់រំ យុវជន និងកីឡា ខេត្តសៀមរាប បេក្ខជនប្រឡងមធ្យមសិក្សាទុតិយភូមិ ឬបាក់ឌុបនៅឆ្នាំនេះ មានចំនួន ៧១១៣នាក់ ក្នុងនោះស្រី ៣៩៦៤នាក់។ សម្រាប់មណ្ឌលប្រឡងមានចំនួន ១១ មានបន្ទប់ ២៨៦បន្ទប់ ក្នុងនោះផ្នែកវិទ្យាសាស្ត្រ ៦មណ្ឌល ស្មើនឹង ១៥១បន្ទប់ និងផ្នែកវិទ្យាសាស្ត្រសង្គម ៥មណ្ឌល ស្មើនឹង ១៣៥បន្ទប់៕
© រក្សាសិទ្ធិដោយ thmeythmey.com