កីឡាជាតិ
ជាតិ
ស៊ីហ្គេម៖ ក្រុមបាល់ទះកម្ពុជា ប៉ះក្រុមខ្លាំងថៃរសៀលនេះ បន្ទាប់ពីចាញ់ម្ចាស់ម៉ាឡេស៊ី ៣-០ ក្រុមកីឡាបាល់ទះកម្ពុជា (ក្រហម) នាជំនួបជាមួយម្ចាស់ផ្ទះ។ រូបថត NOCC/NagaWorld
× ក្រុមកីឡាបាល់ទះជម្រើសជាតិកម្ពុជា បានរងនូវការចិត្តនាការប្រកួតបើកឆាកពូល A ក្នុងព្រឹត្តិការណ៍កីឡាស៊ីហ្គេមលើកទី២៩ ដោយចាញ់ម្ចាស់ផ្ទះម៉ាឡេស៊ី ៣-០ ។ នៅវេលាម៉ោង៤រសៀលថ្ងៃអង្គារ ទី២២ ខែសីហា នេះ កម្ពុជា បន្តជួបក្រុមខ្លាំងថៃ នៅតារាងមជ្ឈមណ្ឌលពិព័រណ៌ MiTEC ក្រុងគូឡាឡាំពួរ ដដែល។
ការប្រកួតបើកឆាកពូល A កាលពីល្ងាចថ្ងៃចន្ទ ទី២១ ខែសីហា ម៉ាឡេស៊ី មានអ្នកគាំទ្រជាច្រើននាក់ ដោយអ្នកគាំទ្ររាប់រយនាក់ បង្ខំចិត្តឈរតម្រង់ជួរនៅខាងក្រៅ ដើម្បីបានកៅអីចូលទស្សនាលើកទឹកចិត្តក្រុមរបស់ខ្លួននាជំនួបបើកឆាកជាមួយកម្ពុជា។
ម៉ាឡេស៊ី បានយកឈ្នះសិតទីមួយ ក្នុងលទ្ធផល ២៥-១៨ ហើយសិតទីពីរជាការប្រកួតដ៏តឹងតែងបំផុត មុនពេលម្ចាស់ផ្ទះសម្រេចជ័យជម្នះក្នុងលទ្ធផល ៣០-២៨ ហើយសិតទីបី ឈ្នះ ២៥-១៧ ។ បញ្ចប់ការប្រកួត ម្ចាស់ផ្ទះម៉ាឡេស៊ី ឈ្នះ ៣សិតទល់នឹង ០ ជាមួយនឹងលទ្ធផលសរុប ៨០-៦៣ ។
នៅវេលាម៉ោង៤រសៀលនេះ កម្ពុជា ត្រូវប៉ះជាមួយក្រុមខ្លាំងថៃ ដែលបានយកឈ្នះមីយ៉ាន់ម៉ា ៣-០ នៅថ្ងៃបើកឆាក។ រីឯការប្រកួតបន្ទាប់ ម្ចាស់ផ្ទះម៉ាឡេស៊ី ត្រូវស្វាគមន៍មីយ៉ាន់ម៉ា។
សមាសភាពក្រុមកីឡាបាល់ទះជម្រើសជាតិកម្ពុជា រួមមានកីឡាករ លុច គឹមសៀន កីឡាករ រ៉ាត រ៉ុង កីឡាករ ឌឿន ភារិន កីឡាករ សួន ចាន់ណារ៉ូ កីឡាករ ពិន សារ៉ុន កីឡាករ អាត វុត្ថា កីឡាករ មា ប៊ិនយ៉ា កីឡាករ ស៊ូ ម៉េងឃាង កីឡាករ ម៉ាច រដ្ឋា កីឡាករ ជុក សោភា កីឡាករ សាធ រដ្ឋា កីឡាករ មី រស្មី។
លោក ខៀវ ភារិទ្ធ ជាអ្នកដឹកនាំក្រុម ដោយមានលោក សាន សុក្រិត ជាគ្រូបង្វឹក លោក គាំ ស៊ាងហ៊ីន និងលោក ពៅ ប៊ុនណាន ជាគ្រូជំនួយ៕
© រក្សាសិទ្ធិដោយ thmeythmey.com