ស៊ីហ្គេម៖ ពេជ្រ ម្ទេសខ្មាំង ទទួលបានមេដាយសំរឹទ្ធក្រោយចាញ់កីឡាករហ្វីលីពីន

កីឡាជាតិ

ជាតិ

ស៊ីហ្គេម៖ ពេជ្រ ម្ទេសខ្មាំង ទទួលបានមេដាយសំរឹទ្ធក្រោយចាញ់កីឡាករហ្វីលីពីន

22, Aug 2017 , 3:39 pm

រូបភាព

ដោយ:

កីឡាករប្រដាល់សកលជម្រើសជាតិ ណាត សៀកនិន ដែលមានឈ្មោះក្រៅហៅ ពេជ្រ ម្ទេសខ្មាំង ទទួលបានមេដាយសំរឹទ្ធក្រោយចាញ់កីឡាករហ្វីលីពីន Mario Fernandez ដោយពិន្ទុក្នុងវគ្គពាក់កណ្តាលផ្តាច់ព្រ័ត្រនៅរសៀលថ្ងៃទី២២ ខែសីហា លើសង្វៀននៃមជ្ឈមណ្ឌលពិព័រណ៌ MiTEC ក្នុងព្រឹត្តិការណ៍កីឡាស៊ីហ្គេមលើកទី២៩នៅទីក្រុងកូឡាឡាំពួរ។

កីឡាករប្រដាល់សកលជម្រើសជាតិកម្ពុជា ពេជ្រ ម្ទេសខ្មាំង រកបានមេដាយសំរឹទ្ធ១គ្រឿងទៀតហើយឲ្យកម្ពុជា បន្ទាប់ពីរូបគេបានប្រកួតបាញ់កីឡាករ Mario Fernandez ដោយពិន្ទុលើទម្ងន់៥៦គីឡូក្រាមក្នុងវគ្គពាក់កណ្តាលផ្តាច់ព្រ័ត្រនៅរសៀលថ្ងៃទី២២ ខែសីហា នេះ នៅលើសង្វៀននៃមជ្ឈមណ្ឌលពិព័រណ៌ MiTEC។

កីឡាករ ពេជ្រ ម្ទេសខ្មាំង ត្រូវបានអាជ្ញាកណ្តាលរាប់នៅទឹកទី១ក្រោយរងកណ្តាប់របស់កីឡាករហ្វីលីពីន Mario Fernandez។ ការរាប់ម្តងនៅទឹកទី១បានធ្វើឲ្យ ម្ទេសខ្មាំង ចូលវាយសម្រុកយ៉ាងខ្លាំងនៅលើកីឡាករហ្វីលីពីន តែហាក់ដូចជាមិនសូវបានផល ផ្ទុយទៅវិញត្រូវកីឡារូបនេះវាយឲ្យអាជ្ញាកណ្តាលរាប់ម្តងទៀតនៅទឹកទី២។

ទោះបីយ៉ាងនេះក្តីនៅទឹកទី៣ ម្ទេសខ្មាំង មិនបានបោះបង់ជំហរដើរចូលនោះឡើយទោះត្រូវកីឡាករហ្វីលីពីនវាយចូលយ៉ាងណាក៏ដោយ។ កីឡាករ Mario Fernandez បានវាយចូលផ្ទៃមុខ ម្ទេសខ្មាំង ធ្វើឲ្យរូបគេដួលជាបន្តបន្ទាប់នៅទឹកនេះ។ ស្នូរជួងបញ្ចប់ទឹកទី៣បានបន្លឺឡើងជាលទ្ធផលអាជ្ញាកណ្តាលសម្រេចឲ្យកីឡាករហ្វីលីពីនឈ្នះដោយពិន្ទុ។

មេដាយសំរឹទ្ធរបស់កីឡាករ ពេជ្រ ម្ទេសខ្មាំង ជាមេដាយសំរឹទ្ធទី៦របស់កម្ពុជាក្នុងព្រឹត្តិការណ៍កីឡាស៊ីហ្គេមនៅម៉ាឡេស៊ី ខណៈ៥ទៀតរកបានលើវិញ្ញាសាឈិនឡូន២ ប៉េតង់២ និងជិះសេះ១៕