អន្តរជាតិ
ឥណ្ឌា៖ យ៉ាងហោច ៧០០នាក់ស្លាប់ និងជាង១លាននាក់ភៀសខ្លួនព្រោះគ្រោះមហន្តរាយទឹកជំនន់ រូបភាព៖ Industan Times
× ចំនួនមនុស្សស្លាប់នៅរដ្ឋមួយចំនួននៅឥណ្ឌាកើនហួស៧០០នាក់ ហើយប្រជាជនជាងមួយលាននាក់ទៀតត្រូវបានបង្ខំចិត្តចេញពីទីលំនៅផងដែរមកទល់ដើមសប្ដាហ៍នេះ ដោយសារគ្រោះមហន្តរាយទឹកជំនន់ទឹកភ្លៀងខ្យល់មូសុង។
ជារៀងរាល់យប់ចំនួនមនុស្សស្លាប់ទូទាំងឥណ្ឌានិងបង់ក្លាដែសមានយ៉ាងតិចណាស់ក៏១០០នាក់ដែរ បន្ទាប់ពីភ្លៀងបានធ្លាក់ជាបន្តបន្ទាប់តាំងពីថ្ងៃទី១០ខែសីហាមក។ ហើយបច្ចុប្បន្ននេះអាជ្ញាធរតំបន់បានអះអាងថា ចំនួនមនុស្សស្លាប់បានកើនលើស ៧០០នាក់ហើយ ខណៈដែលប្រជាជនប្រហែលមួយលាននាក់ផ្សេងទៀតបង្ខំចិត្តជម្លៀសពីលំនៅរបស់ខ្លួន។
មន្ត្រីគ្រប់គ្រងគ្រោះមហន្តរាយប្រចាំរដ្ឋ Bihar បានអះអាងថា មនុស្សប្រហែល២០៥នាក់បានស្លាប់ក្នុងរដ្ឋដែលលោកគ្រប់គ្រង។
«នៅពេលដែលកម្ពស់ទឹកស្រក គេបានប្រទះឃើញសាកសពមនុស្សចំនួន៥៣នាក់ ហើយមានមនុស្សស្លាប់សរុបចំនួន២០៥នាក់»។ នេះជាសម្ដីរបស់មន្ត្រីគ្រប់គ្រងគ្រោះមហន្តរាយនៅរដ្ឋ Bihar លោកAnirudh Kumar ថ្លែងប្រាប់ទីភ្នាក់ងារព័ត៌មានAFP។
ដោយឡែក ប្រជាជនជិតបួនសែននាក់ផ្សេងទៀតបានស្នាក់នៅបណ្ដោះអាសន្នក្នុងទីជម្រកដែលផ្ដល់ដោយអាជ្ញាធរឥណ្ឌា។ ព្យុះភ្លៀងនេះអាចប៉ះពាល់ដល់ប្រជាជនជាង១០លាននាក់ ហើយគេសន្និដ្ឋានថា វាជាគ្រោះធម្មជាតិដ៏អាក្រក់បំផុតមួយចាប់ពីឆ្នាំ២០០៨មកដែលបានសម្លាប់មនុស្សអស់៣០០នាក់។
លើសពីនេះទៅទៀត ស្រុកជាច្រើននៅ Uttar Pradesh មានចំនួនមនុស្សស្លាប់ ៦៩ នាក់ ហើយប្រជាជនពីរលាននាក់ទៀតក៏រងផលប៉ះពាល់ដោយសារព្យុះភ្លៀងនេះដែរ។ ក្រុមសង្គ្រោះបន្ទាន់និងទាហានជាងមួយម៉ឺននាក់បានចូលរួមជាមួយអាជ្ញាធរស្រុកក្នុងប្រតិបត្តិការជួយសង្គ្រោះ។ ចំណែកឯអាជ្ញាធរវិញកំពុងតែស្វែងរកជំនួយពីខាងទាហានដើម្បីជម្លៀសប្រជាជនចេញពីតំបន់រងគ្រោះ។ ដោយឡែក ក្នុងចំណោមប្រជាជន ២៨ លាននាក់នៃរដ្ឋ Himalayan ប្រជាជន២០ភាគរយក៏រងគ្រោះដោយសារព្យុះភ្លៀងនេះដែរ។ រីឯ រដ្ឋខាងភាគខាងកើតឥណ្ឌា West Bengal និងតំបន់ជនបទភាគឦសានរដ្ឋ Assam មានប្រជាជន ១២២ នាក់ស្លាប់ និងជិត៣លាននាក់បានរងគ្រោះដោយសារព្យុះភ្លៀងនេះដែរ។
ប្រជាជនជាង ៤៥ ម៉ឺននាក់បានស្នាក់នៅជម្រកបណ្ដោះអាសន្នរដ្ឋ Assam បន្ទាប់ពីព្យុះភ្លៀងបានបក់មកជាលើកទីពីរកាលពីបួនខែមុន ហើយវាបានធ្វើឲ្យផ្លូវ និងផ្លូវរថភ្លើងមួយចំនួនខូចខាតយ៉ាងដំណំ៕
Tag:
ឥណ្ឌា
Assam
West Bengal
Bihar
Anirudh Kumar
© រក្សាសិទ្ធិដោយ thmeythmey.com