អន្តរជាតិ
កូរ៉េខាងជើងព្រមានអូស្ត្រាលី «ចង់ជួយអាមេរិក ប្រយ័ត្នគ្រោះថ្នាក់ខ្លួនឯង»
× កូរ៉េខាងជើង បានព្រមានអូស្ត្រាលីដែលចង់ជួយអាមេរិក និងកូរ៉េខាងត្បូង បើសិនជាប្រទេសទាំងពីរនេះធ្វើសង្គ្រាមប្រឆាំងកូរ៉េខាងជើង។ កូរ៉េខាងជើងចាត់ទុកជំហររបស់អូស្ត្រាលីជាការធ្វើអត្តឃាតខ្លួនឯង ដោយមិនបានស្វែងយល់ឲ្យបានច្បាស់ពីស្ថានភាពនៅឧបទ្វីបកូរ៉េ។ អូស្ត្រាលី និងអាមេរិក ជាសម្ព័ន្ធមិត្តចាស់វស្សា និងមានកិច្ចព្រមព្រៀងការពារគ្នាទៅវិញទៅមក ក្នុងករណីមានការវាយប្រហារលើប្រទេសណាមួយ។
ថ្វីដ្បិតជារដ្ឋមិនជាប់ពាក់ព័ន្ធផ្ទាល់ក្នុងវិបត្តិនៅឧបទ្វីបកូរ៉េ អូស្ត្រាលីតែងចេញមុខគាំទ្រអាមេរិកក្នុងការដោះស្រាយបញ្ហានុយក្លេអ៊ែររបស់កូរ៉េខាងជើង។ អូស្ត្រាលីតែងអនុវត្តសេចក្ដីសម្រេចរបស់ក្រុមប្រឹក្សាសន្តិសុខយ៉ាងខ្ជាប់ខ្ជួន ហើយពេលខ្លះក៏ចេញអំពាវនាវឲ្យកូរ៉េខាងជើងបោះបង់កម្មវិធីនុយក្លេអ៊ែរ រួចដើរចូលតុចរចាបញ្ចប់បញ្ហា។ លើសពីនោះ អូស្ត្រាលីក៏ត្រៀមខ្លួនជួយអាមេរិកក្នុងករណីសង្គ្រាមផ្ទុះឡើងទៀតផង។
នាយករដ្ឋមន្ត្រីអូស្ត្រាលី ម៉ាល់ខម ធើនប៊ូល (Malcolm Turnbull) ធ្លាប់ប្រកាសហើយថា អូស្ត្រាលីនឹងចេញទ័ពជួយអាមេរិក បើកូរ៉េខាងជើងវាយអាមេរិក ហើយអាមេរិកវាយបកវិញនោះ។ ការប្រកាសបែបនេះរបស់នាយករដ្ឋមន្ត្រីអូស្ត្រាលី ធ្វើឲ្យកូរ៉េខាងជើងរង្កៀសចិត្តយ៉ាងខ្លាំង។ ជាមួយគ្នានេះ អូស្ត្រាលីក៏បានបញ្ជូនទ័ពរបស់ខ្លួនចូលរួមសមយុទ្ធ Ulchi-Freedom Guardian ដែលកូរ៉េខាងជើងចាត់ទុកជាឈ្លានពានខ្លួននោះ។
យោងតាមសារព័ត៌មាន Sputnik អ្នកនាំពាក្យក្រសួងការបរទេសកូរ៉េខាងជើងនិយាយនៅថ្ងៃទី២១ ខែសីហា ថា ទង្វើរបស់អូស្ត្រាលីគឺជាសម្លាប់ខ្លួនឯងប៉ុណ្ណោះ ហើយវាបង្ហាញពីភាពក្មេងខ្ចីផ្នែកនយោបាយទាំងមិនបានស្វែងយល់ស្ថានភាពឲ្យបានជាក់លាក់។ អ្នកនាំពាក្យដដែលបន្តថា អូស្ត្រាលីបានដើរតាមអាមេរិកក្នុងសង្គ្រាមនៅកូរ៉េ វៀតណាម និងសង្គ្រាមប្រឆាំងភេរវកម្ម ប៉ុន្តែអ្វីដែលទទួលមកវិញគឺការបាត់បង់ជីវិតទាហាន និងយុទ្ធោបករណ៍សង្គ្រាមទៅវិញ។
អាមេរិក អូស្ត្រាលី បូករួមនូវ៉ែលសេឡង់ផងនោះ មានកិច្ចព្រមព្រៀងគ្នាមួយ គឺកិច្ចព្រមព្រៀង ANZUS ដែលចងសម្ព័ន្ធប្រទេសទាំងបីក្នុងគោលដៅជួយគ្នាទៅវិញទៅមកក្នុងពេលមានអាសន្ន។ អ្វីដែលគេសង្កេតឃើញ ទីណាមានវត្តមានទាហានអាមេរិក ទីនោះក៏មានមុខទាហានអូស្ត្រាលីដែរ ដែលនេះបង្ហាញពីទំនាក់ទំនងស្អិតល្មួតរវាងប្រទេសទាំងពីរ។ ដូច្នេះវាក៏គ្មានអ្វីចម្លែកដែរពេលអូស្ត្រាលីចាំជួយអាមេរិកនោះ។
កន្លងមក កូរ៉េខាងជើងក៏ធ្លាប់គំរាមវាយប្រហារអូស្ត្រាលីដែរជុំវិញជំហរជួយអាមេរិកនេះ។ ទោះជាស្ថិតនៅឆ្ងាយពីឧបទ្វីបកូរ៉េក្ដី ក៏អូស្ត្រាលីស្ថិតក្នុងរង្វង់ដែលមីស៊ីលរំលងទ្វីបរបស់កូរ៉េខាងជើងបាញ់ដល់ដែរ ហើយនេះជាអ្វីដែលថ្នាក់ដឹកនាំក្រុងកង់បេរ៉ាព្រួយបារម្ភ និងតែងស្នើឲ្យព្យុងយ៉ាងបោះបង់មហិច្ឆតានុយក្លេអ៊ែរចោលទៅ៕
Tag:
កូរ៉េខាងជើង
អូស្ត្រាលី
អាមេរិក
Malcolm Turnbull
© រក្សាសិទ្ធិដោយ thmeythmey.com