ពលរដ្ឋនៅអង្គរផ្អើលរកត្រីនៅស្ពានរាជ្យដាក

ជាតិ

ពលរដ្ឋនៅអង្គរផ្អើលរកត្រីនៅស្ពានរាជ្យដាក

25, Aug 2017 , 7:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ពលរដ្ឋជាច្រើន បាននាំគ្នាផ្អើលរកត្រី នៅស្ពានរាជ្យដាក ឬនៅកសិន្ធុទឹកប្រាសាទនាគព័ន្ធ ខាងកើតក្រុងអង្គរធំ។ តាមប្រជាពលរដ្ឋនៅទីនោះបានឲ្យដឹងថា រយៈពេល៤ថ្ងៃមកហើយ ដែលមនុស្សពពាក់ពពូន បាននាំគ្នាមកបង់សំណាញ់រកត្រីក្នុងទឹកនៅទីនោះ ក្រោយអាជ្ញាធរអប្សរា បានបើកទ្វារទឹកបញ្ចូលក្នុងកសិន្ធុ។--

ពលរដ្ឋម្នាក់បាននិយាយថា ពួកគេតែងមករកត្រីនៅចំណុចស្ពានរាជ្យដាកនេះ រាល់ពេលអាជ្ញាធរបើកទ្វារទឹកម្តងៗ។ ទឹកដែលបើកបញ្ចូលទៅក្នុងកសិន្ធុរាជ្យដាក ឬកសិន្ធុនាគព័ន្ធ គឺតាមអូរនៅជិតនោះដែលមានប្រភពដើមពីភ្នំគូលែន។

គួរបញ្ជាក់ថា ស្ពានរាជ្យដាក កសាងឡើងនៅក្នុងឆ្នាំ២០០៨ ក្រោយពេលដែលអាជ្ញាធរអប្សរា រកឃើញទ្វារទឹកបុរាណនៅទីនោះឡើងវិញ និងសម្រេចបញ្ចូលទឹកក្នុងកសិន្ធុតែម្តង។ ពីមុននៅទីនោះ អ្នកស្រុកប្រើប្រាស់សម្រាប់ស្ទូងស្រូវតែប៉ុណ្ណោះ៕

ខាងក្រោមនេះ ជាទិដ្ឋភាពដែលប្រជាពលរដ្ឋផ្អើលរកត្រីនៅចំណុចស្ពានរាជ្យដាក នាប្រាសាទនាគព័ន្ធ នៅរសៀលថ្ងៃទី២៤ សីហា ឆ្នាំ២០១៧