បង់ក្លាដែសនឹងជួយមីយ៉ាន់ម៉ាក្នុងការបង្ក្រាបក្រុមសកម្មប្រយុទ្ធរ៉ូហ៊ីងយ៉ា បើមីយ៉ាន់ម៉ាត្រូវការ

អន្តរជាតិ

នយោបាយអន្តរជាតិ

បង់ក្លាដែសនឹងជួយមីយ៉ាន់ម៉ាក្នុងការបង្ក្រាបក្រុមសកម្មប្រយុទ្ធរ៉ូហ៊ីងយ៉ា បើមីយ៉ាន់ម៉ាត្រូវការ

29, Aug 2017 , 6:02 pm

រូបភាព

ដោយ:

បង់ក្លាដែសបានស្នើសុំសហការលើផ្នែកយោធាជាមួយមីយ៉ាន់ម៉ាដើម្បីបង្ក្រាបក្រុមឧទ្ទាមក្នុងរដ្ឋ Rakhine។ រដ្ឋមន្ត្រីការបរទេសបង់ក្លាដែសបានអះអាងថា បើមីយ៉ាន់ម៉ាត្រូវការជំនួយពីបង់ក្លាដែស ប្រទេសទាំងពីរ និងសហការគ្នាផ្នែកយោធាដើម្បីបង្ក្រាបក្រុមសកម្មប្រយុទ្ធនៅតាមព្រំដែនបង់ក្លាដែស។

នៅថ្ងៃចន្ទទី២៨ខែសីហា បង់ក្លាដែសបានស្នើផ្ដល់ជំនួយយោធាដល់មីយ៉ាន់ម៉ា ដើម្បីបង្ក្រាបក្រុមសកម្មប្រយុទ្ធរំដោះជនជាតិរ៉ូហ៊ីងយ៉ា Arakan (ARSA) ក្នុងរដ្ឋ Rakhine។ នេះបើតាមការផ្សាយរបស់ទីភ្នាក់ងារព័ត៌មាន

បង់ក្លាដែសដែលជាមិត្តជិតខាងមីយ៉ាន់ម៉ាមិនពេញចិត្តខ្លាំងចំពោះការវាយប្រហាររបស់ក្រុមប្រដាប់អាវុធជនជាតិរ៉ូហ៊ីងយ៉ាទៅលើកងសន្តិសុខមីយ៉ាន់ម៉ាចាប់តាំងពីថ្ងៃសុក្រសប្ដាហ៍មុនឡើយ។ការប៉ះទង្គិចគ្នាបង្កឲ្យជនជាតិរ៉ូហ៊ីងយ៉ាមួយចំនួនធំរត់ភៀសខ្លួនទៅបង់ក្លាដែសផង។

បើតាមទីភ្នាក់ងារទទួលបន្ទុកជនភៀសខ្លួននៃអង្គការសហប្រជាជាតិ កាលពីថ្ងៃសុក្រសប្ដាហ៍មុន ជនជាតិរ៉ូហ៊ីងយ៉ាជាងបីពាន់នាក់បានរត់ភៀសខ្លួនពីមីយ៉ាន់ម៉ាទៅបង់ក្លាដែស។ ដោយឡែក បើតាមអាជ្ញាធរបង់ក្លាដែស ជនជាតិរ៉ូហ៊ីងយ៉ារាប់ពាន់នាក់ផ្សេងទៀតបានសម្រុកចូលមកព្រំដែនបង់ក្លាដែស ប៉ុន្តែជនជាតិទាំងនេះត្រូវបង់ក្លាដែសឃាត់ខ្លួន និងរាប់រយនាក់ទៀតត្រូវបានបញ្ចូនមកមីយ៉ាន់ម៉ាវិញ។

បើតាមទីភា្នក់ងារព័ត៌មាន AFP មន្ត្រីក្រសួងការបរទេសបង់ក្លាដែសដែលសុំមិនបញ្ចេញអត្តសញ្ញាណបាននិយាយដូច្នេះថា៖«យើងបានលើកឡើងថា យើងអាចផ្តល់ការគាំទ្រផ្នែកយោធាដល់មីយ៉ាន់ម៉ា និងសហការគ្នាដើម្បីកម្ចាត់ក្រុមទាហានរំដោះជនជាតិរ៉ូហ៊ីងយ៉ា Arakan (ARSA) ឬក្រុមឧទ្ទាមផ្សេងៗនៅតាមព្រំដែនបង់ក្លាដែស-មីយ៉ាន់ម៉ាដែរ ក្នុងករណីមីយ៉ាន់ម៉ាត្រូវការ»។

គួរបញ្ចាក់ដែរថា ក្រុមសកម្មប្រយុទ្ធរំដោះជនជាតិរ៉ូហ៊ីងយ៉ា Arakan ជាក្រុមប្រដាប់អាវុធជនជាតិរ៉ូហ៊ីងយ៉ាដែលបានសន្យាការពារជនជាតិភាគតិចម៉ូស្លីមនេះពីការធ្វើទុក្ខបុកម្នេញពីកងសន្តិសុខមីយ៉ាន់ម៉ា និងជនជាតិមីយ៉ាន់ម៉ាមួយចំនួនធំដែលកាន់សាសនាព្រះពុទ្ធក្នុងរដ្ឋ Rakhine។

ដោយឡែក អំឡុងពេលមានការប៉ះទង្គិចគ្នានេះ រដ្ឋមន្ត្រីការបរទេសបង់ក្លាដែសបានកោះហៅភារធារីមីយ៉ាន់ម៉ាមកជួបកាលពីចុងសប្តាហ៍ មុនដើម្បីប្រាប់ពីកង្វល់និងក្តីបារម្ភរបស់បង់កា្លដែសពេលដែលជនភៀសខ្លួនមីយ៉ាន់ម៉ាច្រើនបែបនេះចូលទឹកដីខ្លួន។ បច្ចុប្បន្នជនជាតិរ៉ូហ៊ីងយ៉ាក្នុងជំរុំជនភៀសខ្លួន kutupalong នៅបង់ក្លាដែសមានចំនួន ៤០ម៉ឺននាក់ហើយ។ បង់ក្លាដែសបានបន្តស្នើសុំឲ្យមីយ៉ាន់ម៉ាយកជនជាតិរ៉ូហ៊ីងយ៉ាទាំងនេះទៅវិញ ហើយប្រញាប់ដោះស្រាយបញ្ហាប្រឈមក្នុងស្រុកដោយជ្រើសរើសមធ្យោបាយមួយត្រឹមត្រូវនិងគ្រប់ជ្រុងជ្រោយ៕