ទោះថៃព្រមផ្តល់លំនៅបណ្តោះអាសន្នដល់ជនជាតិរ៉ូហ៊ីងយ៉ា, ថៃមិនជ្រៀតជ្រែកកិច្ចការផ្ទៃក្នុងមីយ៉ាន់ម៉ាឡើយ

អន្តរជាតិ

នយោបាយអន្តរជាតិ

ទោះថៃព្រមផ្តល់លំនៅបណ្តោះអាសន្នដល់ជនជាតិរ៉ូហ៊ីងយ៉ា, ថៃមិនជ្រៀតជ្រែកកិច្ចការផ្ទៃក្នុងមីយ៉ាន់ម៉ាឡើយ

03, Sep 2017 , 8:19 pm

រូបភាព

ដោយ:

រដ្ឋាភិបាលរបបសឹកថៃ បានបញ្ជាក់ទៅកាន់ប្រមុខការពារជាតិមីយ៉ាន់ម៉ា ថា របបសឹក បាននិងកំពុងតែអនុវត្តគោលការណ៍មិនជ្រៀតជ្រែតកិច្ចការផ្ទៃក្នុងរបស់ប្រទេសណាមួយឡើយ។ នេះក៏រាប់បញ្ចូលទាំងរឿងហិង្សាប្រដាប់អាវុធរបស់មីយ៉ាន់ម៉ា ដែលកំពុងតែបណ្តាលឲ្យមានប្រជាជនរាប់ពាន់នាក់ភៀសខ្លួនទៅកាន់ប្រទេសនៅក្នុងតំបន់ ។

លោកនាយករដ្ឋមន្ត្រី ថៃ ប្រាយុទ្ធ ចន្ទ អូចា នៅថ្ងៃ៣០ សីហាកន្លងទៅ បានបញ្ជាក់ជំហររបស់ខ្លួនទៅកាន់លោកឧត្តមសេនីយ៍ មិន អ៊ុងឡាំង អគ្គមេបញ្ជាការកងទ័ពមីយ៉ាន់ម៉ានៅក្នុងកិច្ចប្រជុំកំពូលទ្វេភាគី។

លោកលើកឡើងដូច្នេះថា៖« ថៃ មិនជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ាឡើយ ។ ថៃ បានយល់ដឹងពីស្ថានភាពនៅតំបន់នោះ ដែលតម្រូវឲ្យត្រូវប្រើពេលបន្ថែមទៀតដើម្បីដោះស្រាយបញ្ហា»។ នេះបើយោងតាមការចុះផ្សាយរបស់សារព័ត៌មានថៃ The Nation ។

បើតាមសំណេររបស់លោកឧត្តមសេនីយ៍ មិន អ៊ុង ឡាំង នៅទំព័រហ្វេសប៊ុកផ្លូវការរបស់លោកនោះ បន្ថែមពី ការលើកឡើងរបស់ប្រមុខរបបសឹក លោកឧត្តមសេនីយ៍ ក៏បានជួបជជែកជាមួយនឹងរដ្ឋមន្ត្រីការពារជាតិថៃប្រកបដោយផ្លែផ្កាផងដែរ ។ ក្នុងជំនួបនោះ លោកឧត្តមសេនីយ៍ខាងលើ អះអាងថា ប្រមុខការពារជាតិថៃ បានប្រើប្រាស់ឈ្មោះ Bengalis ដើម្បីសំដៅទៅលើជនជាតិរ៉ូហ៊ីងយ៉ាទៀតផង។ កន្លងមក មីយ៉ាន់ម៉ា តែងតែហៅ ជនជាតិរ៉ូហ៊ីងយ៉ា ថា Bengalis ដែលសំដៅលើជនអន្តោប្រវេសន៍ខុសច្បាប់មកពីបង់ក្លាដែស ។

អ្វីគួរកត់សម្គាល់ ជំនួបរវាងមេដឹកនាំកំពូលថៃនិងមីយ៉ាន់ម៉ា ដែលថែមទាំងបានជជែកពីករណីរ៉ូហ៊ីងយ៉ា ផងនោះ ធ្វើឡើងបន្ទាប់ពីរដ្ឋាភិបាលរបបសឹក ប្រកាសផ្តល់ជម្រកបណ្តោះអាសន្នដល់ជនជាតិរ៉ូហ៊ីងយ៉ា ដែលបានរត់ភៀសខ្លួនពីមីយ៉ាន់ម៉ា ដោយសារតែហិង្សាប្រដាប់អាវុធ ។

លោកប្រាយុទ្ធ ចន្ទ អូចា នៅថ្ងៃទី២៧ សីហាកន្លងទៅ បានឲ្យដឹងថា ក្រសួងការពារជាតិថៃ កំពុងតែត្រៀមទទួលប្រជាជនដែលភៀសខ្លួនពីមីយ៉ាន់ម៉ា ហើយនឹងបញ្ជូនពួកគេទៅវិញនៅពេលដែល ពួកគេ បានត្រៀមលក្ខណៈរួចជាស្រេចនោះ ។ លោក ប្រាយុទ្ធ ក៏បញ្ជាក់ដែរថា ថៃ នឹងទទួលជនភៀសខ្លួនទាំងនោះ ដូចអ្វីដែលរដ្ឋាភិបាលថៃ បានធ្វើដូចប៉ុន្មានឆ្នាំមុន នៅពេល មានវិបត្តិជនភៀសខ្លួននៅក្នុងតំបន់យ៉ាងដូច្នេះឯង៕