កីឡាអន្តរជាតិ
អន្តរជាតិ
Pacquiao ចង់សងសឹក Horn វិញ ប៉ុន្តែលើសង្វៀននៅហ្វីលីពីន
× Manny Pacquiao ចង់ឡើងសង្វៀនដើម្បីសងសឹកជាមួយ Jeff Horn ក្នុងការប្រកួតលើកទី២ ប៉ុន្តែត្រូវធ្វើឡើងក្នុងទឹកដីប្រទេសហ្វីលីពីនវិញម្តង។ នេះបើតាមការចុះផ្សាយរបស់សារព័ត៌មាន Rupper។
កំពូលអ្នកប្រដាល់ហ្វីលីពីន Pacquiao បាននិយាយកាលពីថ្ងៃអាទិត្យទី ៣ ខែកញ្ញា ថារូបគេនៅតែចង់ប្រកួតសងសឹកជាមួយ Horn ដរដែលក្រោយរូបគេប្រកាសដកខ្លួនចេញពីការប្រកួតលើកទី២រវាងអ្នកទាំងពីរ ដែលនឹងត្រូវឡើងក្នុងប្រទេសអូស្ត្រាលីម្តងទៀតនៅចុងឆ្នាំនេះ។
អ្នកប្រដាល់វ័យ ៣៨ឆ្នាំ បានប្រាប់ស្ថានីយ៍វិទ្យុ DZBB ថា៖«វានឹងមិនអាចកើតឡើងម្តងទៀតនៅអូស្ត្រាលីនោះទេ ប៉ុន្តែយើងកំពុងនាំយកការប្រកួតនេះទៅកាន់ហ្វីលីពីនវិញម្តង។ នេះនឹងជាការល្អសម្រាប់ទេសចរណ៍របស់ប្រទេសយើងផងដែរ»។
អតីតម្ចាស់ជើងឯកខ្សែក្រវាត់ ៨ស្ថាប័នរូបនេះ បានបាត់បងខ្សែក្រវាត WBO របស់គេក្រោយចាញ់អ្នកប្រដាល់មិនដែលស្គាល់ចាញ់សញ្ជាតិអូស្ត្រាលី Horn នៅទីក្រុង Brisbane កាលពីខែកក្កដាយ៉ាងចម្រូវចម្រាស។
លោកស្រី Annastacia Palaszczuk ដែលជានាយករដ្ឋមន្ត្រីរដ្ឋ Queensland នៃប្រទេសអូស្ត្រាលី និងជាអ្នកគាំទ្រហិរញ្ញវត្ថុនៃការប្រកួតរវាងអ្នកទាំងពីរ បានប្រកាសការប្រកួតលើកទី២ នៅថ្ងៃទី ១២ ខែវិច្ឆិកា ដើម្បីឲ្យ Pacquiao បានសងសិកវិញបន្ទាប់ពីបរាជ័យដោយមិនអស់ចិត្តនោះ។ ប៉ុន្តែយ៉ាងណា ស្តេចប្រដាល់អាស៊ីបានលើកឡើងកាលពីថ្ងៃសុក្រសប្តាហ៍មុនថា រូបគេមិនអាចឡើងសង្វៀនលើកទីពីរនៅទឹកដីដរដែលនោះទេ ដោយចង់ឲ្យការប្រកួតនេះធ្វើឡើងនៅទឹកដីខ្លួនវិញម្តង៕
Tag:
ប្រដាល់
Manny Pacquiao
Jeff Horn
WBO
© រក្សាសិទ្ធិដោយ thmeythmey.com