រថយន្ត
អង់គ្លេសនឹងសាកល្បងដំណើរការរថយន្តដឹកទំនិញដោយផ្អែកលើបច្ចេកវិទ្យាគ្មានខ្សែ
× នាយកដ្ឋានដឹកជញ្ជូន និងផ្លូវហាយវេរបស់អង់គ្លេស បានផ្តល់ភ្លើងខៀវចំពោះប្រតិបត្តិការសាកល្បងលើកដំបូងនូវរថយន្តដឹកទំនិញដែលគ្មានមនុស្សបើក លើបណ្តាផ្លូវនានារបស់ចក្រភពអង់គ្លេសទាំងមូល។ នេះបើតាមការផ្សាយរបស់ The Guardian។
រថយន្តដឹកទំនិញចាប់ពី៣គ្រឿងឡើងទៅ បើកបរជាក្បួន ដោយភ្ជាប់ទំនាក់ទំនងគ្នាតាមរយៈបច្ចេកវិទ្យាគ្មានខ្សែ Wireless ។ ក្នុងដំណើរការសាកល្បង រថយន្តនាំមុខគេមានអ្នកបើកបរដែលត្រូវគ្រប់គ្រងលើល្បឿន ការជាន់ហ្វ្រាំង និងទិសដៅរបស់យានយន្ត រីឯរថយន្តបន្តបន្ទាប់ ក៏មានអ្នកបើកបរផងដែរ ប៉ុន្តែពួកគេត្រៀមខ្លួនតែក្នុងករណីមានតម្រូវការចាំបាច់ប៉ុណ្ណោះ។
មន្ត្រីជំនាញបានអះអាងថា ល្បឿនបើកបរថេរ ផ្តល់នូវការសន្សំសំចៃប្រេង និងផ្តល់អត្ថប្រយោជន៍ផ្នែកបរិស្ថាន ជាពិសេសការកាត់បន្ថយការបញ្ចេញឧស្ម័នកាបូនិច រួមទាំងរក្សាចម្ងាយត្រឹមត្រូវពីរថយន្តមួយទៅរថយន្តទៀតដែលធ្វើដំណើរលើផ្លូវថ្នល់។
រដ្ឋាភិបាលអង់គ្លេស បានបញ្ចេញទឹកប្រាក់ប្រមាណ៨.១លានផោន (១០.៥០លានដុល្លារអាមេរិក) សម្រាប់គម្រោងសាកល្បងបច្ចេកវិទ្យានេះ។ នាយកដ្ឋានដឹកជញ្ជូន និងផ្លូវហាយវេរបស់អង់គ្លេស (DfT) មិនទាន់ហ៊ានអះអាងពីកាលបរិច្ឆេទនៃការសាកល្បងរថយន្តដឹកទំនិញដែលពឹងផ្អែកលើបច្ចេកវិទ្យាគ្មានខ្សែនោះឡើយ ប៉ុន្តែគេរំពឹងថា វាអាចដំណើរនៅលើផ្លូវធំនៅមុនដំណាច់ឆ្នាំ២០១៨ ។
ក្រៅពីការសន្សំសំចៃប្រេង និងការជួយដល់បរិស្ថាន អ្នកជំនាញបានបញ្ជាក់ផងដែរថា ក្បួនរថយន្តទំនិញដែលភ្ជាប់បច្ចេកវិទ្យានេះ ក៏បាននូវសុវត្ថិភាពខ្ពស់ផងដែរនៅលើផ្លូវថ្នល់។
យោងតាម The Guardian លោក Paul Maynard រដ្ឋមន្ត្រីក្រសួងដឹកជញ្ជូនអង់គ្លេស បានលើកឡើងថា៖ «យើងវិនិយោគលើបច្ចេកវិទ្យា ក្នុងគោលបំណងលើកកម្ពស់ការរស់នៅរបស់មនុស្ស ហើយគម្រោងដំណើរការរថយន្ដដឹកទំនិញដោយភ្ជាប់បច្ចេកវិទ្យា នឹងជួយសម្រួលច្រើនដល់ការងារជំនួញ ហើយមានតម្លៃថោក»។
គម្រោងបែបនេះ ក៏ធ្លាប់សាកល្បងនៅបណ្តាប្រទេសមួយចំនួនផងដែរ ក្នុងនោះមានដូចជាអាល្លឺម៉ង់ សហរដ្ឋអាមេរិក និងជប៉ុន ជាដើម៕
© រក្សាសិទ្ធិដោយ thmeythmey.com