កីឡាអន្តរជាតិ
អន្តរជាតិ
Mbappe ផ្ញើសារទៅកាន់អ្នកគាំទ្រ Monaco ថា«អ្នកខឹងខ្ញុំ ប៉ុន្តែខ្ញុំស្រលាញ់អ្នក»
× ថ្ងៃចូលជុំរំហ្វឹកហាត់លើកដំបូងជាមួយ Paris Saint-Germain ខ្សែប្រយុទ្ធវ័យក្មេង Kylian Mbappe បានសរសេរសារដ៏ផ្អែមល្ហែមមួយទៅកាន់អ្នកគាំទ្ររបស់ក្លិបចាស់ Monaco ថា «អ្នកខឹងខ្ញុំ ប៉ុន្តែខ្ញុំស្រលាញ់អ្នក»។
BBC បានផ្សាយថា ខ្សែប្រយុទ្ធសញ្ជាតិបារាំង វ័យ១៨ឆ្នាំ បានសរសេរសារមួយទៅកាន់ក្រុមអ្នកគាំទ្រ Monaco ដែលបានរិះគន់ខ្លួនក្នុងអំឡុងពេលរូបគេបានផ្លាស់ចេញទៅកាន់ក្រុម Paris St-Germain ក្នុងក្របខ័ណ្ឌ Ligue 1 ក្នុងតម្លៃកំណត់ត្រាក្លិបទីពីរ ១៦៦លានផោន ប្រហែលជាង ២១៤លានដុល្លារ ក្នុងលក្ខខណ្ឌខ្ចីជើង១ឆ្នាំ ដោយរង់ចាំដល់ឆ្នាំបន្ទាប់ទើបយកទៅដាច់។
Mbappe ត្រូវបានក្រុមអ្នកគាំទ្ររបស់ក្រុមម្ចាស់ជើងឯកចាស់នៃលីកកំពូលបារាំងស្រែកគំហោគដាក់ នៅពេលដែលរូបគេកំពុងអង្គុយនៅលើកៅអីបម្រុងនាការប្រកួតចុងក្រោយក្នុងក្របខណ្ឌ Ligue 1 ដែល Monaco យកឈ្នះ Marseille ៦-១។
«ខ្ញុំដឹងថាអ្នកគាំទ្រមួយចំនួនមិនយល់ពីជម្រើសរបស់ខ្ញុំ ហើយខ្ញុំដឹងថាអ្នកទាំងនោះខឹងខ្ញុំ តែខ្ញុំយល់អ្វីដែលពួកគេធ្វើ»។ នេះជាសារមួយដែល Mbappe បានសរសេរនៅលើបណ្តាញសង្គម Twitter របស់ខ្លួន និងបានបន្ថែមទៀតថា៖«ខ្ញុំក៏យល់ពីអារម្មណ៍អ្នកដែលស្រែកដាក់ខ្ញុំ នៅពេលជួបគ្នាចុងក្រោយនោះដែរ។ អ្នកអាចខឹងស្អប់ខ្ញុំ ឬស្រែកគំហោគដាក់ខ្ញុំបាន ប៉ុន្ដែអ្នកមិនអាចបញ្ឈប់ខ្ញុំពីក្តីស្រឡាញ់ទៅកាន់អ្នកទាំងអស់គ្នាបានទេ ហើយនេះក៏ព្រោះការពិត គឺខ្ញុំស្រឡាញ់អ្នក»។
សូមបញ្ជាក់ថា Mbappe រកបាន ២៤ គ្រាប់កាលពីរដូវកាលមុនដើម្បីជួយ Monaco ឈ្នះជើងឯកលីកកំពូលបារាំងជាលើកដំបូងក្រោយអាក់ខាន់រយៈពេល ១៧ឆ្នាំចុងក្រោយ៕
Tag:
បាល់ទាត់
Monaco
Kylian Mbappe
© រក្សាសិទ្ធិដោយ thmeythmey.com