វៀតណាម ហៅការធ្វើសមយុទ្ធបាញ់គ្រាប់ពិតរបស់ចិន ជាការបំពានអធិបតេយ្យខ្លួនធ្ងន់ធ្ងរ

អន្តរជាតិ

វៀតណាម ហៅការធ្វើសមយុទ្ធបាញ់គ្រាប់ពិតរបស់ចិន ជាការបំពានអធិបតេយ្យខ្លួនធ្ងន់ធ្ងរ

07, Sep 2017 , 7:19 pm

រូបភាព

ដោយ: ទេព ពិទូរ្យ

ជាថ្មីម្តងទៀត រដ្ឋាភិបាលក្រុងហាណូយ បានថ្កោលទោសយ៉ាងខ្លាំងប្រឆាំងសេចក្តីប្រកាសរបស់រដ្ឋាភិបាលក្រុងប៉េកាំង ដែលបានអះអាងថា បានធ្វើសមយុទ្ធយោធាបាញ់គ្រាប់ពិតនៅក្នុងតំបន់ជម្លោះអធិបតេយ្យសមុទ្រចិនខាងត្បូង ។ ក្រុងហាណូយ បានហៅសកម្មភាពរបស់ក្រុងប៉េកាំង ថាបានបំពានអធិបតេយ្យខ្លួនយ៉ាងធ្ងន់ធ្ងរទៀតផង ។

«វៀតណាម ពិតជាតវ៉ាយ៉ាងដាច់អហង្ការប្រឆាំងនឹងសកម្មភាពរបស់ចិន និងទាមទារឲ្យចិន គោរពអធិបតេយ្យភាពវៀតណាមលើតំបន់ប្រជុំកោះ Hoang Sa (ឬប្រជុំកោះ Paracel ) និងចៀសវាង សកម្មភាពបែបនេះ (សមយុទ្ធយោធា)ជាថ្មីទៀតដើម្បីចៀសវាងការបង្កបញ្ហាដល់សន្តិភាព និងស្ថិរភាពនៅក្នុងតំបន់ និងសមុទ្រចិនខាងត្បូង។» នេះ គឺជាសេចក្តីថ្លែងការណ៍របស់អ្នកនាំពាក្យក្រសួងការបរទេសវៀតណាម នៅថ្ងៃ០៥ កញ្ញា ដែលចុះផ្សាយដោយសារព័ត៌មានវៀតណាម Vietnam News ។

អ្នកនាំពាក្យលោកស្រី Lê Thị Thu Hằng ក៏បានសង្កត់ធ្ងន់ទៀតយ៉ាងដូច្នេះថា៖«វៀតណាម សូមបញ្ជាក់ជាថ្មីម្តងទៀតថា វៀតណាម នៅតែប្រកាន់យកដំណោះស្រាយលើតំបន់វិវាទតាមរយៈវិធានការសន្តិវិធី ដែលស្របតាមច្បាប់អន្តរជាតិ ដែលរាប់បញ្ចូលទាំងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ១៩៨២ផងដែរ»។

គួរកត់សម្គាល់នោះ សេចក្តីថ្លែងការណ៍របស់ក្រុងហាណូយនេះ គឺជាសេចក្តីថ្លែងការណ៍ទីពីរហើយក្នុងរយៈពេលពីរសប្តាហ៍ចុងក្រោយនេះ ដែលត្រូវបានធ្វើឡើងដើម្បីប្រតិកម្មទៅនឹងការធ្វើសមយុទ្ធបាញ់គ្រាប់ពិតរបស់ក្រុងប៉េកាំងនៅក្នុងសមុទ្រចិនខាងត្បូង ។

នៅថ្ងៃ៣១ សីហា កន្លងទៅថ្មីៗ ក្រសួងការបរទេសវៀតណាម បានផ្ញើកំណត់ទូតមួយទៅកាន់ស្ថានទូតចិនប្រចាំក្រុងហាណូយ ដើម្បីបញ្ជាក់ជំហរដាច់ខាតរបស់ខ្លួនប្រឆាំងទៅនឹងសកម្មភាពសមយុទ្ធយោធារបស់កងទ័ពជើងទឹកចិននៅក្នុងសមុទ្រចិនខាងត្បូង ។ ក្រុងហាណូយ បានសម្តែងការព្រួយបារម្ភខ្លាំងរបស់ខ្លួនទៅលើស្ថានភាពនៅក្នុងតំបន់ជម្លោះ និងថែមទាំងបានទទូចឲ្យចិន បញ្ឈប់សកម្មភាព និងធ្វើរឿងដដែលៗ ដែលធ្វើឲ្យស្ថានភាពសមុទ្រចិនខាងត្បូងកាន់តែស្មុគស្មាញ។

ក៏ប៉ុន្តែតបនឹងសេចក្តីថ្លែងការណ៍លើកទីមួយនោះ ចិន បានអះអាងថា កងទ័ពជើងទឹកចិន ពិតជាបានធ្វើសមយុទ្ធនៅក្នុងសមុទ្រចិនខាងត្បូងមែន ហើយសមយុទ្ធនោះ គឺធ្វើតាមផែនការហ្វឹកហ្វឺន ដោយថែមទាំងមានការជូនដំណឹងសម្រាប់ការធ្វើនាវាចរណ៍នានាទុកជាមុនទៀតផង។

នាឱកាសនោះ ក្រុងប៉េកាំង ក៏បានផ្ញើសារដោយប្រយោលទៅកាន់វៀតណាមយ៉ាងដូច្នេះថា៖«សមយុទ្ធយោធារបស់ចិន ស្ថិតក្រៅតំបន់វិវាទ ហើយសង្ឃឹមថា ភាគីពាក់ព័ន្ធបង្ហាញភាពចាស់ទុំ និងសមហេតុសមផលចំពោះសកម្មភាពមួយនេះផងដែរ»។

សូមជម្រាបផងដែរថា សមុទ្រចិនខាងត្បូង គឺជាតំបន់ជម្លោះអធិបតេយ្យដែលមានរដ្ឋពាក់ព័ន្ធមិនត្រឹមតែវៀតណាម និងចិន ប៉ុណ្ណោះនោះទេ ក៏ប៉ុន្តែ ក៏មានរដ្ឋអាស៊ានមួយចំនួនផ្សេងទៀតដូចជា ព្រុយណេ ហ្វីលីពីន និងម៉ាឡេស៊ីផងដែរ។ កន្លងមក ចិន និងវៀតណាម តែងតែមានសេចក្តីថ្លែងការណ៍ថ្កោលទោស ដាក់គ្នាទៅវិញទៅមក នៅពេលដែលមានរដ្ឋណាមួយ បង្ហាញសកម្មភាពច្រើននៅក្នុងតំបន់ជម្លោះអធិបតេយ្យនោះ៕