កីឡាអន្តរជាតិ
អន្តរជាតិ
AFC ស៊ើបអង្កេតលើក្រុមដែលល្មើសក្នុងការប្រកួតវគ្គជម្រុះចុងក្រោយតំបន់អាស៊ី
× សហព័ន្ធកីឡាបាល់ទាត់ទ្វីបអាស៊ី (AFC) បានចាប់ផ្តើមស៊ើបអង្កេតបន្ទាប់ពីមានសេចក្តីរាយការណ៍អំពីការប្រព្រឹត្តបទល្មើសនៃបទបញ្ជានានានៅក្នុងការប្រកួតបាល់ទាត់វគ្គជម្រុះជុំផ្តាច់ព្រ័ត្រនៅតំបន់អាស៊ី កាលពីថ្ងៃទី៥ ខែកញ្ញា ដើម្បីបានកៅអីទៅ World Cup ឆ្នាំ ២០១៨ នៅរុស្ស៊ី។ បច្ចុប្បន្ន AFC កំពុងរង់ចាំទទួលយករបាយការណ៍ពាក់ព័ន្ធទាំងអស់មុននឹងឈានដល់ដំណាក់កាលបន្ទាប់។ នេះបើតាមគេហទំព័រផ្លូវការរបស់សហព័ន្ធកីឡាបាល់ទាត់ទ្វីបអាស៊ីចុះផ្សាយនៅថ្ងៃទី៦ ខែកញ្ញា។
AFC នឹងសហការជាមួយអង្គភាពគ្រប់គ្រងកីឡាបាល់ទាត់ពិភពលោក (FIFA) ផងដែរដើម្បីផ្តល់របាយការណ៍ចាំបាច់ស្តីពីបញ្ហាដែលស្ថិតនៅក្រោមយុត្តាធិការរបស់ FIFA ក្រោយមានការរាយការណ៍ពីការបំពាននានាក្នុងពេលប្រកួតជម្រុះ World Cup ជុំទី៣នៅតំបន់អាស៊ី។
តែយ៉ាងណាក៏ដោយ AFC នៅមិនទាន់បង្ហាញថាក្រុមណាដែលមានជាប់ពាក់ព័ន្ធជុំវិញករណីនេះ កាលពីប្រកួតក្នុងវគ្គជ្រុះជុំចុងក្រោយកាលពីថ្ងៃទី ៥ ខែកញ្ញានៅឡើយនោះទេ។
កាលពីខែមិថុនា AFC បានសរសេររបាយការណ៍ទៅកាន់សមាជិករបស់ខ្លួន ដែលរំលឹកឡើងវិញថា អ្នកដែលពាក់ព័ន្ធទាំងអស់ដែលជាប់ទាក់ទងនឹងបាល់ទាត់អាស៊ីត្រូវតែគោរពគោលការណ៍អព្យាក្រឹត។
លិខិតដែលផ្ញើដោយ AFC បានសង្កត់ធ្ងន់ថាគោលការណ៍នេះគឺជាគ្រឹះនៃសហព័ន្ធកីឡាបាល់ទាត់ទ្វីបអាស៊ី និងចលនាកីឡាអន្តរជាតិ ហើយត្រូវបានឆ្លុះបញ្ចាំងតាមមាត្រា ៣.២ នៃលក្ខន្តិករបស់ AFC ដែលចែងថា៖«AFC មានលក្ខណអព្យាក្រឹតនៅក្នុងរឿងនយោបាយ និងសាសនា»។
ក្បាលម៉ាស៊ីគ្រប់គ្រងកីឡាបាល់ទាត់តំបន់អាស៊ីនេះបន្ថែមថារាល់សមាជិកត្រូវបានចងភ្ជាប់ដោយមាត្រា ១៤.៤ ដែលចែងថា៖«រាល់សមាជិកសមាគមត្រូវគ្រប់គ្រងកិច្ចការរបស់ខ្លួនដោយឯករាជ្យ និងដោយគ្មានឥទ្ធិពលណាមួយពីភាគីទីបីឡើយ»។
លើសពីនេះទៀតនោះ AFC ក៏បានអំពាវនាវដល់គ្រប់ភាគីពាក់ព័ន្ធទាំងអស់ឲ្យគោរពគោលការណ៍គ្រឹះទាំងនេះដើម្បីឆ្ពោះទៅមុខទាំងអស់គ្នា។ ក្នុងន័យនេះ AFC រំលឹកឡើងវិញក្នុងមាត្រា ៦ នៃលក្ខន្តិកដែលចែងថា៖«រាល់បុគ្គល និងអង្គការដែលជាប់ទាក់ទងដោយផ្ទាល់ឬប្រយោលទាំងនោះត្រូវតែគោរពតាមលក្ខន្តិក សេចក្តីណែនាំ និងការសម្រេចចិត្តរបស់ AFC»៕
Tag:
បាល់ទាត់
AFC
World Cup
FIFA
© រក្សាសិទ្ធិដោយ thmeythmey.com