កីឡាអន្តរជាតិ
អន្តរជាតិ
ជំនួបរវាង U22 កម្ពុជា (ក្រហម) និង U22 ថៃ។ រូបថត NOCC
×![]()
ដោយ: ទេព ពិទូរ្យ
គ្រូបង្វឹកក្រុមបាល់ទាត់ជម្រើសជាតិថៃអាយុក្រោម២២ឆ្នាំ លោក Worrawoot Srimakha បានច្រានចោលការចោទប្រកាន់ពាក់ព័ន្ធនឹងការកំណត់លទ្ធផលអំឡុងការប្រកួតក្នុងព្រឹត្តិការណ៍ស៊ីហ្គេមក្នុងទីក្រុងគូឡាឡាំពួរ ប្រទេសម៉ាឡេស៊ី ពោលនាជំនួបក្នុងពូលជាមួយកម្ពុជា។ នេះបើតាមការចុះផ្សាយរបស់សារព័ត៌មានបាងកកប៉ុស្តិ៍។ 
បីប្រកួតក្នុងវិញ្ញាសាបាល់ទាត់បុរសនៃព្រឹត្តិការណ៍កីឡាតំបន់អាស៊ាន លើកទី ២៩ នៅម៉ាឡេស៊ី ត្រូវបានក្រុមអ្នកជំនាញវិភាគលើការភ្នាល់បាល់ វាយតម្លៃថា ទំនងជាមានការកំណត់លទ្ធផលទុកមុន។ ជំនួបទាំង៣ប្រកួតដែលអ្នកជំនាញទាំងនោះលើកឡើងក្នុងកាសែតសិង្ហបុរី The Straits Times រួមមានការប្រកួតរវាង ម្ចាស់ផ្ទះម៉ាឡេស៊ីជាមួយឡាវ វៀតណាមជាមួយកម្ពុជា និង ថៃជាមួយកម្ពុជា។
អ្នកវិភាគការភ្នាល់ជនជាតិអ៊ីតាលីលោក Ivo Romano ដែលជាអតីតអ្នកពិគ្រោះយោបល់ខាងល្បែងភ្នាល់កីឡាបាល់ទាត់នៅ UEFA បាននិយាយថាគាត់បានកត់សម្គាល់នូវសញ្ញា «មិនប្រក្រតី» មួយចំនួន ក្នុងការប្រកួតរវាងម៉ាឡេស៊ី និងឡាវក្នុងលទ្ធផល ៣-១ នោះ។
The Straits Times បានដកស្រងសម្តីរបស់លោក Romano ថា៖«មានអ្នកខាតបង់ប្រាក់យ៉ាងច្រើនអំឡុងការប្រកួតនេះដោយការភ្នាល់ថាម៉ាឡេស៊ីនឹងរកគ្រាប់បាល់ទីបី ហើយដែលគ្រាប់បាល់ទីបីនោះត្រូវបានស៊ុតបញ្ចូលទីនៅក្នុងម៉ោងបន្ថែម»។
ទាក់ទងនឹងជំនួបដែលថៃ បានយកឈ្នះកម្ពុជា ៣-០ លោក Worrawoot គ្រូបង្វឹក U22 ថៃ បាននិយាយការពារខ្លួនថា ក្រុមរបស់លោកមិនមានអ្វីពាក់ព័ន្ធនឹងសកម្មភាពកំណត់លទ្ធផលក្នុងការប្រកួតនោះឡើយ។
«ខ្ញុំទើបតែបានឮព័ត៌មាននេះ វាគ្រាន់តែជាការសង្កេតពីបណ្តាញសារព័ត៌មានបរទេសប៉ុណ្ណោះ ខ្ញុំធានាចំពោះអ្នកទាំងអស់គ្នាថា ថៃមិនមានអ្វីពាក់ព័ន្ធនឹងករណីនេះទេ។ គោលដៅរបស់យើងនៅ SEA Games គឺការឈ្នះ ហើយយើងមានបំណងឈ្នះរាល់ការប្រកួតនៅទីនោះ និងចង់រកគ្រាប់បាល់ឲ្យបានច្រើនតាមដែលអាចធ្វើទៅបាន។ ក្រៅពីនេះខ្ញុំជឿជាក់លើកីឡាកររបស់ខ្ញុំថាពួកគេក៏មិនធ្វើបែបនេះដែរ»។ នេះជាការបញ្ជាក់បន្ថែមរបស់លោក Worrawoot។
សម្រាប់កម្ពុជា លោក ម៉ៃ តុលា អគ្គលេខាធិការស្តីទីសហព័ន្ធកីឡាបាល់ទាត់កម្ពុជា ក៏បានអះអាងផងដែរថា សហព័ន្ធបានធ្វើការប្រជុំជាមួយក្រុមគ្រូបង្វឹកលើករណីនេះរួចហើយ ប៉ុន្តែមិនមានភស្តុតាងណាមួយដែលនាំឲ្យមានការស៊ើបអង្កេតនោះឡើយ៕
Tag:
បាល់ទាត់
Sea Games 2017
ថៃ
កម្ពុជា
ម៉ាឡេស៊ី
កំណត់លទ្ធផលទុកមុន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
