ជាតិ
សេដ្ឋកិច្ច
ស្ពានបេតុងឆ្លងទន្លេសាបក្នុងក្រុងភ្នំពេញថ្មីមួយទៀត នឹងត្រូវសាងសង់ឆាប់ៗនេះ រូបភាពពីមន្ទីរសាធារណការ និងដឹកជញ្ជូនរាជធានីភ្នំពេញ
× ភ្នំពេញ៖ រាជធានីភ្នំពេញនឹងមានស្ពានបេតុងមួយទៀត ដែលឆ្លងកាត់ទន្លេសាប ដែលគ្រោងបើកការដ្ឋានសាងសង់នៅក្នុងអំឡុងខែតុលាឆ្នាំនេះ។ នេះបើតាមអ្នកនាំពាក្យសាលារាជធានីភ្នំពេញ លោក ម៉េត មាសភក្ដី ។
ស្ពានបេតុងនេះត្រូវសាងសង់ចេញពីចំណុចឃ្លាំងស្តុកសាំងសូគីម៉ិច ផ្លូវជាតិលេខ៥ ឆ្លងកាត់ទន្លេសាបទៅតំបន់អភិវឌ្ឍន៍ទីក្រុងរណបជ្រោយចង្វារ ដែលស្ថិតក្នុងសង្កាត់ព្រែកតាសេក ខណ្ឌជ្រោយចង្វារ។ បើតាម លោក ម៉េត មាសភក្ដី ស្ពាននេះមានប្រវែងជាង ៥០០ម៉ែត្រ និងទទឹង ២០,៥ម៉ែត្រ ដែលគ្រោងដាក់ឲ្យសាងសង់ក្នុងអំឡុងខែតុលាខាងមុខនេះ ហើយនឹងបញ្ចប់ក្នុងរយៈពេលជាងមួយឆ្នាំទៅពីរឆ្នាំ។
អ្នកនាំពាក្យសាលារាជធានីភ្នំពេញរូបនេះ អះអាងថា ស្ពានបេតុងនេះត្រូវសាងសង់ឡើង ដើម្បីសម្រួលការធ្វើចរាចរណ៍របស់ពលរដ្ឋ ដោយនឹងសម្រួលបានមួយផ្នែកចំពោះអ្នកដំណើរដែលចង់ឆ្លងកាត់ពីផ្លូវជាតិលេខ៥ ទៅផ្លូវជាតិលេខ៦ ។
ជាមួយគ្នានេះ គម្រោងសាងសង់ស្ពានដែកប៉ាឡេមួយទៀតស្ថិតលើទីតាំងដដែលនេះនឹងត្រូវសាងសង់ក្នុងខែតុលានេះផងដែរ និងគ្រោងបញ្ចប់នៅខែមេសាឆ្នាំ២០១៨ ។ លោក មាសភក្ដី បញ្ជាក់ថា ស្ពានដែកនេះត្រូវបានសាងសង់សម្រាប់ដាក់ឲ្យប្រើប្រាស់បណ្ដោះអាសន្នដើម្បីសម្រួលចរាចរណ៍ ហើយស្ពានដែកនេះនឹងត្រូវរុះរើវិញនៅពេលស្ពានបេតុងដាក់ឲ្យដំណើរការ។
ទោះយ៉ាងណា លោក ម៉េត មាសភក្ដី មិនទាន់អាចបញ្ជាក់ពីថវិកាសម្រាប់សាងសង់ស្ពានទាំងពីរនេះបាននោះទេ ដោយលោកគ្រាន់តែបញ្ជាក់ថា ស្ពានដែកប៉ាឡេត្រូវសាងសង់ដោយថវិការបស់ក្រុមហ៊ុន OCIC ដែលអភិវឌ្ឍន៍ទីក្រុងរណបជ្រោយចង្វារ។
ប៉ុន្តែបើតាមការស្រង់សំដីតំណាងក្រុមហ៊ុន OCIC ដោយសារព័ត៌មាន Freshnews ស្ពានបេតុងនឹងត្រូវចំណាយថវិកា ៣៥លានដុល្លារ និងជាង ៩លានដុល្លារសម្រាប់ស្ពានដែកប៉ាឡេ ដែលជាការចំណាយរបស់ក្រុមហ៊ុន។
ការស្ថាបនាស្ពានទាំងពីរនេះ ស្របគ្នានឹងការបើកការជួសជុលឡើងវិញនូវស្ពានមិត្តភាពកម្ពុជា-ជប៉ុន (ស្ពានជ្រោចង្វារទី១)នៅដើមខែតុលានេះ។ ស្ពានពីរនេះមានចម្ងាយប្រហែល ២,៥គីឡូម៉ែត្រពីស្ពានជ្រោចង្វារទី១៕
Tag:
ស្ពានឆ្លងទន្លេសាប
ម៉េត មាសភក្ដី
© រក្សាសិទ្ធិដោយ thmeythmey.com