កីឡាអន្តរជាតិ
អន្តរជាតិ
ក្លិបនៅ Premier League គាំទ្រឲ្យបិទទ្វារដោះដូរកីឡាករមុនបើករដូវកាល ចាប់ពីឆ្នាំក្រោយ
× ក្លិបបាល់ទាត់នៃក្របខណ្ឌកំពូលអង់គ្លេស Premier League បានបោះឆ្នោតគាំទ្រឲ្យបិទទ្វារទីផ្សារទិញដោះដូរកីឡាករឲ្យបានមុនពេលបើករដូវកាល គិតចាប់ពីឆ្នាំក្រោយទៅ។
ប្រធានក្លិបភាគច្រើននៅលីកកំពូលអង់គ្លេស បានត្អូញត្អែរថាការទិញដូរកីឡាករអំឡុងពេលបើករដូវកាល គឺធ្វើឲ្យមានការរំខានដល់ក្រុម និងការត្រៀមលក្ខណសម្រាប់ការប្រកួតរបស់ពួកគេ។
បើតាម BBC ចុះផ្សាយ ចាប់ពីរដូវកាល ២០១៨-២០១៩ តទៅទ្វារដោះដូរកីឡាករនឹងត្រូវបិទនៅថ្ងៃព្រហស្បតិ៍ វេលាម៉ោង ១៧:០០ នាទី [ម៉ោងនៅអង់គ្លេស] ពោលគឺមុនពេលការប្រកួតដណ្តើមពាន Premier League ចាប់ផ្តើម។ នេះមានន័យថាក្នុងចំណោមលីកទាំងអស់តំបន់អឺរ៉ុប អង់គ្លេសគឺជាលីកដំបូងគេ ដែលយល់ព្រមបោះបង់ចោល កាលបិទទ្វារដោះដូរកីឡាករនៅថ្ងៃទី ៣១ ខែសីហាដូចរៀងរាល់ឆ្នាំ ប៉ុន្តែពួកគេនៅតែអាចលក់កីឡាករទៅកាន់ក្លិបនៅលីកដទៃបានដរដែលនៅពេលទីផ្សារដោះដូរនៅដំណើរការធម្មតា។
យ៉ាងណា ក្នុងចំណោមក្លិបទាំង២០នៅលីកកំពូលអង់គ្លេស មាន១៤ក្រុមដែលបោះឆ្នោតគាំទ្រឲ្យមានាការផ្លាស់ប្តូរនេះ ខណៈ ៥ក្រុមបដិសេធ និង១ក្រុមទៀតសម្រេចមិនចូលរួមបោះឆ្នោត។
ក្លិបទាំង ៥ដែលបោះមិនគាំទ្រ រួមមាន Manchester City, Manchester United, Crystal Palace, Watford និង Swansea City ។ ការបោះឆ្នោតប្រឆាំងរបស់ក្លិបរហស្សនាមបិសាចក្រហម ហាក់ផ្ទុយពីបំណងរបស់លោក Jose Mourinho ដែលបានលើកឡើងកាលពីខែមុនថាលោក «ចង់ឲ្យទីផ្សារដោះដូរបិទទ្វារកាន់តែឆាប់កាន់តែល្អ តាមដែលអាចធ្វើទៅបាន»៕
Tag:
បាល់ទាត់
Premier League
ដោះដូរកីឡាករ
© រក្សាសិទ្ធិដោយ thmeythmey.com