ពានរង្វាន់សម្តេច ហេង សំរិន បន្ថែមបទបញ្ជាដើម្បីពង្រឹងក្រមសីលធម៌ និងតម្លាភាព

កីឡាជាតិ

ជាតិ

ពានរង្វាន់សម្តេច ហេង សំរិន បន្ថែមបទបញ្ជាដើម្បីពង្រឹងក្រមសីលធម៌ និងតម្លាភាព

11, Sep 2017 , 7:59 am

រូបភាព

លោក ធុល នាង ប្រធានគណៈកម្មការរៀបចំការប្រកួតបាល់ទាត់ដណ្តើមពានរង្វាន់សម្តេច ហេង សំរិន

ដោយ:

គណៈកម្មការរៀបចំការប្រកួតបាល់ទាត់ដណ្តើមពានរង្វាន់សម្តេច ហេង សំរិន លើកទី១បានសម្រេចកែប្រែ និងបន្ថែមបទបញ្ជាមួយចំនួន ដើម្បីពង្រឹងក្រមសីលធម៌នៃការប្រកួតឲ្យកាន់តែមានភាពល្អប្រសើរ និងមានតម្លាភាព។ ការសម្រេចនេះ បន្ទាប់ពីគណៈកម្មការរៀបចំការប្រកួតសង្កេតឃើញមានភាពមិនប្រក្រតីពាក់ព័ន្ធនឹងក្រមសីលធម៌របស់កីឡាករ និងមន្ត្រីដឹកនាំការប្រកួតតាមរយៈការប្រកួតនាពេលកន្លងមក។

លោក ធុល នាង ប្រធានគណៈកម្មការរៀបចំការប្រកួតពានរង្វាន់សម្តេច ហេង សំរិន បានសម្រេចបន្ថែមបទបញ្ជាមួយ ដោយកំណត់ហាមមិនឲ្យកីឡាករ និងមន្ត្រីចូលរួមការប្រកួតពានរង្វាន់នេះជារៀងរហូតបើប្រព្រឹត្តអំពើមិនគម្បីក្នុងស្ថានភាពធ្ងន់ធ្ងរពាក់ព័ន្ធនឹងក្រមសីលធម៌។ លោកអះអាងថា ការបន្ថែមបញ្ជានេះ គឺដើម្បីឲ្យការប្រកួតប្រព្រឹត្តទៅប្រកបដោយ Fair Play និងមានតម្លាភាព ជាពិសេសដើម្បីរក្សាសន្តិសុខ និងផ្តល់ទំនុកចិត្តកាន់តែខ្ពស់ដល់ក្រុមដែលបានចូលរួម។

លោកបានបញ្ជាក់ថា ការបន្ថែមបទបញ្ជាដ៏ធ្ងន់ធ្ងរនេះ បន្ទាប់ពីគណៈកម្មការរៀបចំការប្រកួតសង្កេតឃើញមានភាពមិនប្រក្រតីរបស់កីឡាករ និងមន្ត្រីដឹកនាំការប្រកួតមួយចំនួនបានប្រព្រឹត្តអំពើមិនគប្បីតាមរយៈការប្រើហឹង្សាដោយកម្លាំង និងពាក្យសម្តីនៅក្នុងអំឡុងពេលប្រកួតនាពេលកន្លងមក។ ហើយលោកបានចាត់ទុកអំពើគប្បីនេះមិនត្រឹមតែប៉ះពាល់ដល់កិត្តិយសបុគ្គលតែម្នាក់នោះទេ ពោលគឺវាបានជះឥទ្ធិពលដល់ក្រុម និងពានរង្វាន់សម្តេច ហេង សំរិន ដែលជាថ្នាក់ដឹកនាំប្រទេសទាំងមូលផងដែរ។

ក្នុងកិច្ចប្រជុំដែលមានតំណាងក្រុមទាំង៨ដែលបានកៅអីឡើងទៅលេងវគ្គ១/៤ លោក ធុល នាង បានបញ្ជាក់យ៉ាងដូច្នេះថា៖«ពានរង្វាន់របស់យើងរៀបចំឡើងគឺចង់ឲ្យមានភាពល្អប្រសើរ និងផ្តល់ការទុកចិត្តដល់ក្រុមដែលបានចូលរួម។ លើសពីនេះ ដើម្បីផ្តល់ឱកាសដល់យុវជនដែលស្រលាញ់វិស័យកីឡាបាល់ទាត់បានចូលរួមលេងដើម្បីជាតិ និងសង្គម ដោយសំដៅទៅការអភិវឌ្ឍកីឡាបាល់ទាត់នៅកម្ពុជា»។

លោកបានបន្តថា៖«តាមរយៈពាននេះវាជាបទពិសោធមួយដ៏ល្អសម្រាប់យុវជនក្នុងការអភិវឌ្ឍសមត្ថភាពរបស់ខ្លួនដើម្បីសម្រេចបំណងទៅអនាគត។ បន្ថែមពីនេះ កីឡាករអាចបង្ហាញសមត្ថភាពរបស់ខ្លួន ដើម្បីទាក់ទាញបណ្តាក្លិបធំៗនៅក្នុងប្រទេសកម្ពុជាជ្រើសរើសពួកគេទៅលេងឲ្យក្លិបទាំងនោះទៀតផង»។

ក្រៅពីការបន្ថែមបទបញ្ញត្តិគណៈកម្មការរៀបចំការប្រកួតពានរង្វាន់នេះ ក៏បានកែប្រែបទបញ្ជារបស់ខ្លួនមួយទៀតដែរ គឺកំណត់មិនឲ្យមានការបន្ថែមម៉ោង(១៥នាទីពីរដង)នាការប្រកួតដណ្តើមចំណាត់ថ្នាក់លេខ៣នោះទេ ពោលគឺត្រូវប្រកួតបាល់១១ម៉ែត្រក្នុងករណីចប់ការប្រកួត៩០នាទីរក្សាលទ្ធផលស្មើគ្នា។

សម្រាប់ការប្រកួតបាល់ទាត់ដណ្តើមពានរង្វាន់សម្តេច ហេង សំរិន ប្រចាំឆ្នាំ២០១៧ បានឈានដល់វគ្គ៨ក្រុមចុងក្រោយហើយក្រោយឆ្លងកាត់ការប្រកួតវគ្គជម្រុះតាមពូលនីមួយៗដែលបានចាប់ផ្តើមពីថ្ងៃទី២៩ កក្កដា ដែលបានបញ្ចប់កាលពីថ្ងៃទី១ ខែកញ្ញា។ តាមរយៈការចាប់ឆ្នោតប្រកួតកាលពីថ្ងៃទី៨ ខែកញ្ញា អាណាចក្របៃតង ជួប TN Kandal FC, សមាគមរោងចក្រកាត់ដេរនៅកម្ពុជា(GMAC)ប៉ះសម្ព័ន្ធយុវជនមូស្លីមកម្ពុជា, Home Sport FC ប៉ះ Old Town Garden និងក្រុម Pisnoka FC តទល់ជាមួយ The Salt Fc។

ការប្រកួតទាំង៤គូនេះនឹងធ្វើជាបន្តបន្ទាប់នៅថ្ងៃទី១១, ១២, ១៣ និងទី១៤ ខែកញ្ញា នៅកីឡដ្ឋានកងយោធពលខេមរភូមិន្ទ ខណៈការប្រកួតវគ្គពាក់កណ្តាលផ្តាច់ព្រ័ត្រ និងផ្តាច់ព្រ័ត្រនឹងធ្វើនៅពហុកីឡដ្ឋានជាតិ៕