ជាតិ
CNRP ចាត់ទុកការសម្រេចរបស់រដ្ឋសភា លើករណីឯកឧត្តម កឹម សុខា ជាទង្វើខុសច្បាប់ រូបពីហ្វេសប៊ុក លោក កឹម សុខា
× ភ្នំពេញ៖ គណបក្សសង្គ្រោះជាតិ បានមិនគាំទ្រចំពោះការសម្រេចរបស់រដ្ឋសភា ដែលបើកផ្លូវឲ្យតុលាការបន្តនីតិវិធី លើករណីឯកឧត្តម កឹម សុខា ឡើយ។ គណបក្សសង្គ្រោះជាតិ ចាត់ទុកការសម្រេចរបស់រដ្ឋសភានេះ ជាទង្វើខុសច្បាប់។
សេចក្តីថ្លែងការណ៍របស់គណបក្សសង្គ្រោះជាតិ ចុះថ្ងៃទី១០ កញ្ញា បានបញ្ជាក់ថា៖«ការប្រជុំវិសាមញ្ញរដ្ឋសភា នៅថ្ងៃទី១១ កញ្ញា ឆ្នាំ២០១៧ ដើម្បីផ្ដល់សិទ្ធិឲ្យអាជ្ញាធរបន្តការចោទប្រកាន់ ឃាត់ខ្លួន និងឃុំខ្លួនឯកឧត្តម កឹម សុខា ជាទង្វើរខុសច្បាប់ ព្រោះទោះបីជារដ្ឋសភាប្រើប្រាស់គោលការណ៍នៃមាត្រា៨០ នៃរដ្ឋធម្មនុញ្ញ ដើម្បីលើកអភ័យឯកសិទ្ធិរដ្ឋសភា ឫការបញ្ចេញមតិឲ្យផ្អាក តាមមតិភាគច្រើនបីភាគបួន ក៏រដ្ឋសភាពុំមានកូរ៉ុមគ្រប់គ្រាន់ក្នុងការប្រជុំសម្រេចបានដែរ»។
ជាមួយគ្នានេះគណបក្សសង្គ្រោះជាតិ ក៏បានថ្កោលទោសដាច់អហង្ការ ចំពោះការប្រើប្រាស់កម្លាំងប្រដាប់អាវុធ ចូលទៅចាប់វាយខ្នោះឯកឧត្តម កឹម សុខា ប្រធានគណបក្ស ទាំងយប់អាធ្រាត។ គណបក្សសង្គ្រោះជាតិ ចាត់ទុកទង្វើរបែបនេះ ជាការរំលោភអភ័យឯកសិទ្ធិតំណាងរាស្ត្រ ត្រង់មាត្រា៨០ នៃរដ្ឋធម្មនុញ្ញ ។ គណបក្សសង្គ្រោះជាតិ ទាមទារឲ្យដោះលែងឯកឧត្តម កឹម សុខា ផងដែរ។
នៅព្រឹកថ្ងៃទី១១ កញ្ញានេះ តំណាងរាស្ត្រគណបក្សប្រជាជនកម្ពុជា៦៧រូប បានបោះឆ្នោតយល់ព្រមឲ្យតុលាការចាត់នីតិវិធីលើ ឯ.ឧ កឹម សុខា ប្រធានគណបក្សសង្គ្រោះជាតិ។ វាមិនមែនជារឿងត្រូវព្យួរអភ័យឯកសិទ្ធិ ឬមិនព្យួរនោះទេ។ អ្នកនាំពាក្យក្រុមតំណាងរាស្ត្រគណបក្សប្រជាជនកម្ពុជា លោក ឈាង វុន ធ្លាប់បានប្រាប់អ្នកសារព័ត៌មានថា ករណីឯ.ឧ កឹម សុខា ជាបទល្មើសជាក់ស្តែង ដែលគេមិនបាច់និយាយដល់រឿងព្យូរអភ័យឯកសិទ្ធិសភានោះឡើយ។
ប្រធានគណបក្សសង្គ្រោះជាតិ ឯកឧត្តម កឹម សុខា ត្រូវបានតុលាការសម្រេចឃុំខ្លួនបណ្ដោះអាសន្ន ក្រោមបទចោទ សន្ទិដ្ឋិនិយមជាមួយបរទេសតាមមាត្រា ៤៤៣ នៃក្រមព្រមទណ្ឌ។ បទចោទនេះ ត្រូវជាប់ទោសពី ១៥ ឆ្នាំ ទៅ ៣០ ឆ្នាំ៕
© រក្សាសិទ្ធិដោយ thmeythmey.com