ជាតិ
នយោបាយជាតិ
សង្គមស៊ីវិលថា ចំណាត់ការក្តៅរបស់អាជ្ញាធរប៉ះពាល់ការបោះឆ្នោត តែលោក ផៃ ស៊ីផាន ថាជាការពង្រឹងសន្តិសុខ និងច្បាប់ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្រ្តី
× ភ្នំពេញ៖ ក្រុមសង្គមស៊ីវិល ព្រួយបារម្ភថា ភាពមិនប្រក្រតីនៃស្ថានភាពនយោបាយបច្ចុប្បន្ន ដែលកើតចេញពីចំណាត់ការលើមេបក្សនយោបាយ ប្រព័ន្ធផ្សព្វផ្សាយ និងអង្គការអន្តរជាតិ អាចធ្វើឲ្យប៉ះពាល់ដល់ការបោះឆ្នោត ក្នុងឆ្នាំ២0១៨។ ប៉ុន្តែ អ្នកនាំពាក្យនៃទីស្តីការគណៈរដ្ឋមន្ត្រី អះអាងថា ចំណាត់ការទាំងនោះ គឺដើម្បីរក្សាសន្តិសុខ ដោយមិនពាក់ព័ន្ធនឹងរឿងនយោបាយ ឡើយ។
ចំណាត់ការជាច្រើនរបស់សមត្ថកិច្ច និងតុលាការ រួមទាំងរដ្ឋាភិបាល ទៅលើមេដឹកនាំគណបក្សនយោយបាយ ប្រព័ន្ធផ្សព្វផ្សាយ និងអង្គការក្រៅរដ្ឋាភិបាលបរទេស អាចនឹងជះឥទ្ធិពលអវិជ្ជមានដល់ការប្រកួតប្រជែងខាងនយោបាយ និងការចុះឈ្មោះបោះឆ្នោត សម្រាប់ការបោះឆ្នោតថ្នាក់ជាតិ ក្នុងឆ្នាំ២0១៨។ នេះ ជាក្តីព្រួយបារម្ភរបស់ក្រុមសង្គមស៊ីវិលចំនួន១៣ ដែលបានលើកឡើងនៅក្នុងសេចក្តីថ្លែងការណ៍រួមមួយ។
តាមរយៈសេចក្តីថ្លែងការណ៍ ក្រុមសង្គមស៊ីវិលទាំងនោះ ថែមទាំងយល់ថា ចំណាត់ការខាងលើ ក៏នឹងធ្វើឲ្យប៉ះពាល់ដល់ការអនុវត្តនីតិរដ្ឋ ការធ្លាក់ចុះដំណើរការប្រជាធិបតេយ្យ រួមទាំងគោលការណ៍អន្តរជាតិ ផងដែរ។ បើតាមសេចក្តីថ្លែងការណ៍ ដែលផ្សព្វផ្សាយនៅថ្ងៃទី១១ ខែកញ្ញា ឆ្នាំ២១៧ ក្រុមសង្គមស៊ីវិលទាំងនោះ មានដូចជា គណៈកម្មាធិការ ដើម្បីការបោះឆ្នោត ដោយសេរី និងយុត្តិធម៌ នៅកម្ពុជា (Comfrel) គណៈកម្មការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (Nicfec) និងសមាគមអាដហុក (Adhoc) ជាដើម។
ដោយមានការព្រួយបារម្ភបែបនេះ ក្រុមសង្គមស៊ីវិល ក៏ស្នើឲ្យរដ្ឋាភិបាលកម្ពុជា ធ្វើយ៉ាងណាដើម្បីកែប្រែបរិយាកាសនយោបាយ ឲ្យវិលទៅរកប្រក្រតីភាពឡើងវិញ។ ជាងនេះទៀត ក្រុមសង្គមស៊ីវិល ក៏បានអំពាវនាវទៅកាន់សហគមន៍អន្តរជាតិ ឲ្យបន្តចូលរួមលើកស្ទួយដំណើរការប្រជាធិបតេយ្យនិងការបោះឆ្នោតនៅកម្ពុជាផងដែរ។ យ៉ាងណាក្តី ក្រុមសង្គមស៊ីវិល មិនភ្លេចជំរុញឲ្យប្រជាពលរដ្ឋ ទៅចុះឈ្មោះបោះឆ្នោត ដើម្បីត្រៀមចូលរួមបោះឆ្នោតថ្នាក់ជាតិ នៅឆ្នាំ២0១៨ នោះទេ។
ទាក់ទងនឹងសេចក្តីថ្លែងការណ៍របស់ក្រុមសង្គមស៊ីវិលខាងលើ លោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី បានចាត់ទុកថា ជាការបញ្ចេញមតិ។ ក៏ប៉ុន្តែ លោក បានប្រាប់ក្រុមសង្គមស៊ីវិលទាំងនោះ ឲ្យប្រុងប្រយ័ត្នផងដែរ ចំពោះការប្រើសិទ្ធិរបស់ខ្លួន ក្នុងការបញ្ចេញមតិបែបនេះ។
ថ្លែងប្រាប់សារព័ត៌មានថ្មីៗ លោក ផៃ ស៊ីផាន សង្កត់ធ្ងន់ថា ចំណាត់ការរបស់តុលាការ ក៏ដូចជារដ្ឋាភិបាលខាងលើ គឺដើម្បីរក្សាសន្តិសុខ ដូច្នេះ ក្រុមសង្គមស៊ីវិល ពុំគួរចាត់ទុកថា ជារឿងនយោបាយឡើយ។ អ្នកនាំពាក្យរូបនេះ បានបញ្ជាក់យ៉ាងដូច្នេះថា៖«រដ្ឋាភិបាល មានកាតព្វកិច្ច ក្នុងការរក្សាសន្តិសុខ និងសណ្តាប់ធ្នាប់ មិនមែនក្រុមសង្គមស៊ីវិលទាំងនោះទេ។ សូមឲ្យក្រុមសង្គមស៊ីវិទាំងនោះ កុំបូករឿងនេះ ចូលជាមួយគ្នា កុំបូកបញ្ជូលជារឿងនយោបាយ»។
ក្នុងរយៈកាលចុងក្រោយនេះ ប្រធានគណបក្សចំនួនបីរូប ដែលរួមមាន ឯកឧត្តម កឹម សុខា ប្រធានគណបក្សសង្គ្រោះជាតិ និងលោក ញឹក ប៊ុនឆៃ ប្រធានគណបក្សខ្មែររួបរួមជាតិ និងលោក សួន សេរីរដ្ឋា អតីតប្រធានគណបក្សអំណាចខ្មែរ ត្រូវបានចាប់ខ្លួន ពីបទល្មើសផ្សេងៗពីគ្នា។ ឯកឧត្តម កឹម សុខា រងពីបទចោទ «ឃុបឃិតជាមួយបរទេសដោយសម្ងាត់ ដែលធ្វើឲ្យប៉ះពាល់ដល់ប្រទេសជាតិ» លោក ញឹក ប៊ុនឆៃ រងបទចោទ «ពាក់ព័ន្ធនឹងការផលិតគ្រឿងញៀន» ហើយលោក សួន សេរីរដ្ឋា រងបទចោទ «ញុះញង់កងទ័ព»។
ចំណែក ប្រព័ន្ធផ្សព្វផ្សាយមួយចំនួន ដែលរួមមាន វិទ្យុមហានគរ ត្រូវបានបិទចោល ដោយក្រសួងព័ត៌មាន លើកហេតុផលថា បានរំលោភកិច្ចសន្យា ហើយកាសែត ខេមបូឌា ដេលី បានប្រកាសបិទដោយខ្លួនឯង ក្រោយរដ្ឋាភិបាល ទាមទារឲ្យទូទាត់បំណុលពន្ធ ជាង៦លានដុល្លារ។ រីឯ ស្ថាប័នសារព័ត៌មានផ្សេងទៀត ដូចជា RFA VOA និង VOD ជាដើម ក៏កំពុងជួបស្ថានភាពមិនសូវល្អដែរ ក្នុងដំណើរការនៃការផ្សព្វផ្សាយរបស់ខ្លួន។ ដោយឡែក អង្គការអន្តរជាតិមួយ គឺវិទ្យាស្ថានជាតិប្រជាធិបតេយ្យរបស់សហរដ្ឋអាមេរិក (DNI) ដែលដំណើរការនៅកម្ពុជា អស់រយៈពេល២៥ឆ្នាំ មកហើយនោះ ក៏ត្រូវបានបិទចោល ថែមទៀត៕
© រក្សាសិទ្ធិដោយ thmeythmey.com