ជាតិ
ក្រសួងការបរទេសថា ឧត្តមស្នងការសិទ្ធិមនុស្ស ចោទកម្ពុជា ដោយមិនមើលពីទិដ្ឋភាពច្បាប់ លោកប្រាក់ សុខុន រដ្ឋមន្ត្រីក្រសួងការបរទេស និងព្រះអង្គម្ចាស់ ហ្សេដ រ៉ាអាដ អាល់ហ៊ូសេន ឧត្តមស្នងការនៃអង្គការសហប្រជាជាតិ ទទួលបន្ទុកសិទ្ធិមនុស្ស
× ភ្នំពេញ៖ ក្រសួងការបរទេស ខកចិត្តនឹងឧត្តមស្នងការសិទ្ធិមនុស្សនៃអង្គការសហប្រជាតិ ដែលលើកឡើងពីចំណុចអវិជ្ជមានជាច្រើន ទាក់ទងនឹងស្ថានភាពនៅកម្ពុជា នាពេលបច្ចុប្បន្ន។ ក្រសួងការបរទេស មានការខកចិត្ត ក្រោយពីឧត្តមស្នងការសិទ្ធិមនុស្សនៃអង្គការសហប្រជាតិ លើកឡើងថា កម្ពុជាអនុវត្តនីតិវិធីមិនបានត្រឹមត្រូវ លើការចាប់ខ្លួនមេបក្សប្រឆាំង រួមទាំងចំណាត់ការលើសារព័ត៌មាន និងអង្គការក្រៅរដ្ឋាភិបាល។
អ្នកនាំពាក្យក្រសួរការបរទេសកម្ពុជា បានចេញសេចក្តីថ្លែងការណ៍មួយ ដើម្បីឆ្លើយតបនឹងសេចក្តីថ្លែងការណ៍របស់ឧត្តមស្នងការសិទ្ធិមនុស្សនៃអង្គការសហប្រជាជាតិ។ តាមរយៈសេចក្តីថ្លែងការណ៍ អ្នកនាំពាក្យក្រសួងការបរទេស បានសម្តែងការមិនពេញចិត្ត ចំពោះសេចក្តីថ្លែងការណ៍របស់ឧត្តមស្នងការសិទ្ធិមនុស្សនៃអង្គការសហប្រជាជាតិស្តីពី «វិធានការរបស់រដ្ឋាភិបាលកម្ពុជា ក្នុងរយៈកាលចុងក្រោយនេះ» ដែលធ្វើឡើងនៅក្នុងសម័យប្រជុំលើកទី៣៦ នៃក្រុមប្រឹក្សាសិទ្ធិមនុស្ស កាលថ្ងៃទី១១ ខែកញ្ញា ឆ្នាំ២0១៧។
អ្នកនាំពាក្យក្រសួងការបរទេស បានអះអាងក្នុងសេចក្តីថ្លែងការណ៍ថា ទោះបីជាកន្លងមក រដ្ឋាភិបាល តុលាការ និងរដ្ឋសភា ព្យាយាមបកស្រាយយ៉ាងណាក្តី ប៉ុន្តែកម្ពុជា នៅតែរងការចោទប្រកាន់ពីឧត្តមស្នងការសិទ្ធិមនុស្ស ដដែល ទាក់ទងនឹងការអនុវត្តច្បាប់។ សម្រាប់អ្នកនាំពាក្យក្រសួងការបរទេស ឧត្តមស្នងការសិទ្ធិមនុស្សនៃអង្គការសហប្រជាជាតិ បានចោទប្រកាន់កម្ពុជា ដោយមិនបានក្រឡេកមើលពីទិដ្ឋភាពច្បាប់ ឲ្យបានគ្រប់ជ្រុងជ្រោយនោះទេ។
អ្នកនាំពាក្យក្រសួងការបរទេស បានចោទសួរយ៉ាងដូច្នេះថា៖«ឧត្តមស្នងការសិទ្ធិមនុស្ស គួរបំភ្លឺនៅក្នុងសេចក្តីថ្លែងការណ៍របស់ខ្លួន ថាតើផ្អែកលើមូលដ្ឋានអ្វី ដែលបុគ្គលប្រព្រឹត្តទង្វើក្បត់ជាតិ និងសន្ទិដ្ឋិភាពជាមួយបរទេស អង្គការក្រៅរដ្ឋាភិបាល ដែលធ្វើសកម្មភាពតាមអំពើចិត្ត ដោយមិនមានច្បាប់អនុញ្ញាត និងសារព័ត៌មាន ដែលមិនបានបង់ពន្ធ អាចគេចផុតពីការពង្រឹងការអនុវត្តច្បាប់?»។
អ្នកនាំពាក្យក្រសួងការបរទេស បានបន្តនៅក្នុងសេចក្តីថ្លែងការណ៍ថា សិទ្ធិនយោបាយ សិទ្ធិស៊ីវិល សេរីភាពសារព័ត៌មាន សេរីភាពនៃការជួបជុំ និងសេរីភាពនៃការបញ្ចេញមតិ ត្រូវបានការពារយ៉ាងពេញលេញនៅកម្ពុជា ហើយមនុស្សគ្រប់រូបកំពុងទទួលបានសិទ្ធិសេរីភាពទាំងនេះ លើកលែងតែបុគ្គលដែលរំលោភច្បាប់ប៉ុណ្ណោះ។
សេចក្តីថ្លែងការណ៍របស់អ្នកនាំពាក្យក្រសួងការបរទេសខាងលើ គឺដើម្បីឆ្លើងតប នឹងព្រះអង្គម្ចាស់ ហ្សេដ រ៉ាអាដ អាល់ហ៊ូសេន (Zeid Ra’ad Al Hussein) ឧត្តមស្នងការនៃអង្គការសហប្រជាជាតិ ទទួលបន្ទុកសិទ្ធិមនុស្ស ដែលបានចេញសេចក្តីថ្លែងការណ៍ ជុំវិញស្ថានការណ៍នៅកម្ពុជា។ នៅក្នុងសម័យប្រជុំលើកទី៣៦ នៃក្រុមប្រឹក្សាសិទ្ធិមនុស្ស កាលថ្ងៃទី១១ ខែកញ្ញា ឆ្នាំ២0១៧ ព្រះអង្គម្ចាស់ ហ្សេដ រ៉ាអាដ អាល់ហ៊ូសេន បានចេញសេចក្តីថ្លែងការណ៍ ទាក់ទងនឹងសិទ្ធិមនុស្សនៅទូទាំងពិភពលោក ដោយក្នុងនោះ ក៏មានកម្ពុជាផងដែរ។
នៅក្នុងសេចក្តីថ្លែងការណ៍ ព្រះអង្គម្ចាស់ ហ្សេដ រ៉ាអាដ អាល់ហ៊ូសេន មានក្តីកង្វល់យ៉ាងខ្លាំង ចំពោះចំណាត់ការរបស់រដ្ឋាភិបាលកម្ពុជានាពេលថ្មីៗនេះ ទៅលមេបក្សប្រឆាំង អង្គការក្រៅរដ្ឋាភិបាល និងសារព័ត៌មាន។ ព្រះអង្គម្ចាស់ ហ្សេដ រ៉ាអាដ អាល់ហ៊ូសេន បានផ្តោតសំខាន់លើការចាប់ខ្លួនឯកឧត្តម កឹម សុខា ប្រធានគណបក្សសង្គ្រោះជាតិ។ ព្រះអង្គម្ចាស់ យល់ថា ការចាប់ខ្លួនឯកឧត្តម កឹម សុខា អាចធ្វើឡើងដោយមិនមានការគោរពតាមនីតិវិធី និងអភ័យឯកសិទ្ធិសភា។
ឧត្តមស្នងការនៃអង្គការសហប្រជាជាតិ ដែលទទួលបន្ទុកផ្នែកសិទ្ធិមនុស្សរូបនេះ ស្នើឡើងថា នៅមុនការបោះឆ្នោត ឲ្យរដ្ឋាភិបាលកម្ពុជា ត្រូវធានាដល់សិទ្ធិនយោបាយនិងសិទ្ធិពលរដ្ឋ រួមទាំងសេរីភាពខាងសារព័តមាន។ ព្រះអង្គម្ចាស់ ក៏ស្នើឲ្យរដ្ឋាភិបាលកម្ពុជា ធានាដល់ឯករាជ្យភាពនៃស្ថាប័នតុលាការ ផងដែរ។
ក្នុងរយៈកាលចុងក្រោយនេះ មេដឹកនាំនយោបាយបីរូប ដែលរួមមានឯកឧត្តម កឹម សុខា ប្រធានគណបក្សសង្គ្រោះជាតិ លោក ញឹក ប៊ុនឆៃ ប្រធានគណបក្សខ្មែររួបរួមជាតិ និងលោក សួន សេរីរដ្ឋា អតីតប្រធានគណបក្សអំណាចខ្មែរ ត្រូវបានចាប់ខ្លួន ក្រោមបទចោទផ្សេងៗគ្នា។ លើសពីនេះ រដ្ឋាភិបាល ក៏បានចាត់វិធានការក្តៅ លើសារព័ត៌មានមួយចំនួនថែមទៀត ដែលរួមមាន វិទ្យុមហានគរ ត្រូវបានបិទចោល ព្រោះរំលោភកិច្ចសន្យា ហើយកាសែតខេមបូឌា ដេលី បានប្រកាសបិទដោយខ្លួនឯក ក្រោយរដ្ឋ ទាមទារឲ្យសងបំណុលពន្ធជាង ៦លានដុល្លារ ។ ចំណែកឯ វិទ្យុអាស៊ីសេរី បានសម្រេចចិត្តដកការិយាល័យរបស់ខ្លួនចេញពីកម្ពុជា ខណៈស្ថាប័នសាព័តមានផ្សេងទៀត ដូចជា VOA និង VOD ជាដើម ក៏កំពុងជួបការលំបាកក្នុងដំណើរការនៃការផ្សព្វផ្សាយ។ ដោយឡែក អង្គការមួយរបស់សហរដ្ឋអាមេរិក គឺវិទ្យាស្ថានជាតិប្រជាធិបតេយ្យ (NDI) ដែលមានវត្តមាននៅកម្ពុជាតាំងពីឆ្នាំ១៩៩៣មកនោះ ក៏ត្រូវបានបិទចោលផងដែរ ក្រោមហេតុផលថា ធ្វើខុសច្បាប់ស្តីពីអង្គការនិងច្បាប់ស្តីពីសារពើពន្ធ៕
Tag:
UN
ក្រសួងការបរទេស
សិទ្ធិមនុស្ស
© រក្សាសិទ្ធិដោយ thmeythmey.com