ជាតិ
អ្នកស្ម័គ្រចិត្ត Peace Corps អាមេរិក ៧១នាក់ទៀត នឹងស្បថចូលបំពេញការងារនៅកម្ពុជា
× អ្នកស្ម័គ្រចិត្ត Peace Corps ៧១នាក់បន្ថែមទៀត នឹងស្បថចូលបំពេញការងារ នៅតាមបណ្តាខេត្តនានារបស់កម្ពុជា នៅថ្ងៃទី១៥ ខែកញ្ញា។ អ្នកស្ម័គ្រចិត្តរបស់ទីភ្នាក់ងារPeace Corps នឹងត្រូវរស់នៅជាមួយគ្រួសារម្ចាស់ផ្ទះ នៅតាមសហគមន៍ជនបទរយៈពេល២ឆ្នាំ ដើម្បីជួយឲ្យពួកគេអាចសម្រមខ្លួនទៅក្នុងសហគមន៍ រៀនពីវប្បធម៌ ប្រពៃណីរបស់អ្នកស្រុក និងរៀននិយាយភាសាខ្មែរ។ ចាប់ពីឆ្នាំ២០០៦ មក មានអ្នកស្ម័គ្រចិត្ត Peace Corps ជាង៥០០នាក់ហើយ ដែលបានមកធ្វើការនៅកម្ពុជា ដោយពួកគេបានបង្រៀនភាសាអង់គ្លេស បណ្តុះបណ្តាលគ្រូ និងជាអ្នកអប់រំសុខភាពតាមសហគមន៍។
លោក William Heidt ឯកអគ្គរដ្ឋទូតសហរដ្ឋអាមេរិកប្រចាំប្រទេសកម្ពុជា នឹងធ្វើពិធីស្បថ ដល់ជនជាតិអាមេរិកចំនួន ៧១ នាក់ ដែលជាសមាជិកថ្មី នៃក្រុមទី ១១ នៃអ្នកស្ម័គ្រចិត្តរបស់ទីភ្នាក់ងារ Peace Corps នៅកម្ពុជា។ ពិធីនេះ នឹងប្រព្រឹត្តទៅនៅ ព្រឹកថ្ងៃទី១៥ ខែកញ្ញា នៅសណ្ឋាគារ Himawari រាជធានីភ្នំពេញ។
ពិធីស្បថរបស់ក្រុមថ្មីនៃអ្នកស្ម័គ្រចិត្តរបស់ទីភ្នាក់ងារ Peace Corps នេះ ប្រព្រឹត្តទៅចំពេលនៃការប្រារព្ធខួបលើកទី១១ នៃវត្តមានរបស់ទីភ្នាក់ងារ Peace Corps នៅកម្ពុជា។ អ្នកស្ម័គ្រចិត្តចំនួន ២ នាក់ នៃទីភ្នាក់ងារ Peace Corps នឹងចាំឆ្លើយសំណួររបស់អ្នកសារព័ត៌មាន នៅក្រោយពិធីស្បថ។
បន្ទាប់ពីរយៈពេល២ខែ នៃការរៀនភាសា ការរៀនសូត្រពីបច្ចេកទេស និងវប្បធម៌ អ្នកស្ម័គ្រចិត្តរបស់ទីភ្នាក់ងារ Peace Corps ត្រូវរស់នៅជាមួយគ្រួសារម្ចាស់ផ្ទះ នៅតាមភូមិ និងសហគមន៍ជនបទ ដោយគេធ្វើការនៅទីនោះរយៈពេល ២ ឆ្នាំ។ ការរស់នៅជាមួយគ្រួសារម្ចាស់ផ្ទះជួយឲ្យអ្នកស្ម័គ្រចិត្ត សម្រមខ្លួនទៅក្នុងសហគមន៍ រៀនពីវប្បធម៌ ប្រពៃណីរបស់អ្នកស្រុក និងរៀននិយាយភាសា ខ្មែរ។
គិតតាំងពីឆ្នាំ ២០០៦ មក មានអ្នកស្ម័គ្រចិត្តរបស់ទីភ្នាក់ងារ Peace Corps ជាង ៥០០ នាក់ហើយ ដែលបានមកធ្វើការនៅកម្ពុជា ដោយពួកគេបានបង្រៀនភាសាអង់គ្លេស និងបណ្តុះបណ្តាលគ្រូ និងអ្នកអប់រំសុខភាពតាមសហគមន៍។
ទីភ្នាក់ងារ Peace Corps នៅបង្កើតឡើងនៅឆ្នាំ១៩៦១ ដោយអតីតប្រធានាធិបតីអាមេរិក John F. Kennedy ដើម្បីជំរុញសន្តិភាព និងមិត្តភាពក្នុងពិភពលោក។ គោលបំណងរបស់ទីភ្នាក់ងារ Peace Corps គឺកសាងសមត្ថភាពរបស់មនុស្សប្រុស ស្រី នៅក្នុងប្រទេសដែលមានការពាក់ព័ន្ធ និងលើកកម្ពស់ ការយល់គ្នា រវាងសហរដ្ឋអាមេរិក និងប្រទេសដទៃ៕
© រក្សាសិទ្ធិដោយ thmeythmey.com