កីឡាអន្តរជាតិ
អន្តរជាតិ
Pogba នឹងអវត្តមាន៦សប្តាហ៍ ក្រោយស្កេនឃើញថាមានរបួសសរសៃពួរ
× Paul Pogba ខ្សែបម្រើក្រុម Manchester United អាចនឹងត្រូវអវត្តមានលើទីលានចន្លោះពី១ខែទៅ ៦សប្តាហ៍ ដោយសារបញ្ហារបួសសរសៃពួរ អំឡុងពេលប្រកួតបើកឆាកក្របខណ្ឌ UEFA Champions League ទល់នឹងក្រុម FC Basel នៅទឹកដី Old Trafford។ នេះបើតាមការផ្សាយរបស់ BBC។
ខ្សែបម្រើអន្តរជាតិបារាំង វ័យ២៤ឆ្នាំ បានចូលលេងក្នុងនាមជាប្រធានក្រុមឲ្យ Manchester United ក្នុងជ័យជម្នះ ៣-០ លើក្រុម Basel ក្នុងវគ្គសន្សំពិន្ទុពូល A នៃពានលំដាប់កំពូលអ៊ឺរ៉ុប។ Pogba លេងបានតែ១៩នាទីប៉ុណ្ណោះក៏ជួបបញ្ហារបួសក្រោយពេលព្យាយាមលូកជើងដណ្តើមបាល់ពីគូប្រជែង ហើយត្រូវប្តូរចេញភ្លាមៗតែម្តង។
អតីតសមាជិកក្រុម Juventus ត្រូវបានស្កេរបួសកាលពីថ្ងៃពុធ ទី១៣ ខែកញ្ញា ដែលអាចនឹងខកខានជួយក្រុមយ៉ាងហោចណាស់មួយខែ ដើម្បីសម្រាក់ព្យាបាលឲ្យជាសះស្បើយឡើងវិញ។
ខ្សែបម្រើដែលមានតម្លៃខ្លួនថ្លៃជាគេប្រចាំក្រុមម្ចាស់ជើងឯក Premier League ២០សម័យ នឹងអវត្តមាននៅការប្រកួតក្នុងលីកជាមួយ Everton, Southampton និង Crystal Palace រួមទាំងអាក់ខានព្រឹត្តិការណ៍ League Cup ជុំទី ៣ ជាមួយ Burton និងប៉ះ CSKA Moscow ពាន Champions League នៅថ្ងៃទី ២៧ ខែកញ្ញាផងដែរ។
ក្រៅពីនេះ Pogba ក៏នឹងខកខានការប្រកួតជម្រុះ World Cup ឲ្យជម្រើសជាតិបារាំងផងដែរ ដែលត្រូវប៉ះជាមួយប៊ុលហ្គារី និងបេឡារុសនៅដើមខែតុលាដើម្បីធានាកន្លែង និងបានកៅអីឈានទៅកាន់ រុស្ស៊ីឆ្នាំក្រោយ៕
Tag:
បាល់ទាត់
Paul Pogba
Manchester United
© រក្សាសិទ្ធិដោយ thmeythmey.com