ជាតិ
យុវជនកម្ពុជា ១២នាក់ នឹងចូលរួមកម្មវិធី JENESYS នៅជប៉ុន ជាមួយយុវជនអាស៊ានផ្សេងទៀត
× ភ្នំពេញ៖ ស្ថានទូតជប៉ុនប្រចាំកម្ពុជា នឹងបញ្ជូនយុវជនកម្ពុជាចំនួន ១២នាក់ ធ្វើដំណើរទស្សនកិច្ចទៅប្រទេសជប៉ុន។ យុវជនកម្ពុជាទាំង ១២នាក់ នឹងធ្វើទស្សនកិច្ច ចាប់ពីថ្ងៃទី ១៨ ដល់ថ្ងៃទី ២៦ ខែកញ្ញា ជាមួយក្រុមយុវជនមកពីបណ្ដាប្រទេសអាស៊ាន។ ក្រុមយុវជនកម្ពុជា និងក្រុមយុវជនមកពីប្រទេសអាស៊ាន នឹងចូលរួមកម្មវិធីបណ្ដាញផ្លាស់ប្ដូរសិស្ស និស្សិត និងយុវជនរវាងប្រទេសជប៉ុន និងបណ្ដាប្រទេសអាស៊ីខាងកើត ដែលហៅកាត់ថា JENESYS ២០១៧។
បើតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា តាមរយៈការអញ្ជើញរបស់ក្រសួងការបរទេសជប៉ុន យុវជនកម្ពុជាចំនួន ១២នាក់ នឹងធ្វើដំណើរទស្សនកិច្ចទៅកាន់ប្រទេសជប៉ុន រយៈពេល ៩ថ្ងៃ ចាប់ពីថ្ងៃទី ១៨ ដល់ថ្ងៃទី ២៦ ខែកញ្ញានេះ ជាមួយក្រុមយុវជនមកពីប្រទេសអាស៊ាន។ ក្នុងដំណើរទស្សនកិច្ចនេះ ក្រុមយុវជនកម្ពុជា និងក្រុមយុវជនមកពីប្រទេសអាស៊ាន នឹងចូលរួមកម្មវិធីបណ្ដាញផ្លាស់ប្ដូរសិស្ស និស្សិត និងយុវជនរវាងប្រទេសជប៉ុន និងបណ្ដាប្រទេសអាស៊ីខាងកើត ដែលហៅកាត់ថា JENESYS ២០១៧។
ក្រុមយុវជនទាំងអស់ ក្រោយការទស្សនានៅទីក្រុងតូក្យូ ក្រុមយុវជន នឹងត្រូវបែកចែកទៅតាមក្រុម អាស្រ័យលើប្រធានបទនីមួយៗ ហើយក្រុមយុវជននឹងទស្សនកិច្ចនៅខេត្តអ៊ីវ៉ាតិ ខេត្តមីយ៉ាគី ខេត្តហ្វូគូអ៊ុកា ឬខេត្តគូម៉ាម៉ូតុ ដើម្បីចូលរួមសន្និសីទនិស្សិតបណ្ដាលប្រទេសអាស៊ាន-ជប៉ុន។ ជាមួយគ្នានេះ ក្រុមយុវជននឹងមានឱកាសទៅទស្សនកិច្ចនៅតំបន់ប្រវត្តិសាស្ត្រមួយចំនួន នៅក្នុងប្រទេសជប៉ុន។
ស្ថានទូតជប៉ុនប្រចាំកម្ពុជា រំពឹងថា ក្រុមយុវជននឹងអាចយល់ដឹងពីប្រទេសជប៉ុនកាន់តែជ្រាលជ្រៅ នឹងចែករំលែកនូវបទពិសោធន៍របស់ខ្លួនដល់ពលរដ្ឋកម្ពុជា បន្ទាប់ពីវិលត្រឡប់ពីប្រទេសជប៉ុនវិញ។ បន្ថែមលើនេះ តាមរយៈកម្មវិធីនេះ ក្រសួងការបរទេសបានអញ្ជើញយុវជនកម្ពុជាចំនួន ជាង២០០០នាក់ មកហើយ គិតចាប់តាំងពីឆ្នាំ២០០៧មក។
សូមបញ្ជាក់ថា កម្មវិធី JENESYS ២០១៧ មានគោលបំណងជំរុញការយល់ដឹង និងការកសាងទំនុកចិត្តទៅវិញទៅមក ក្នុងចំណោមប្រជាជនជប៉ុន និងបណ្ដាប្រទេសចូលរួម ដើម្បីកសាងមូលដ្ឋានគ្រឹះនៃកិច្ចសហប្រតិបត្តិការ និងចំណងមិត្តភាពនាពេលអនាគត។ នេះបើតាមសេចក្ដីប្រកាសព័ត៌មានដដែល៕
Tag:
ជប៉ុន
កម្ពុជា
យុវជន
JENESYS
© រក្សាសិទ្ធិដោយ thmeythmey.com