ជាតិ
សង្គមជាតិ
ជនពិការ និងខ្សោយបញ្ញា នឹងទទួលបានគម្រោងបញ្ចុះតម្លៃសម្ភារសិក្សា និងថ្លៃសាលា
× ជនពិការ និងជនខ្សោយសតិបញ្ញានឹងទទួលបានគម្រោងបញ្ចុះតម្លៃលើការទិញសម្ភារសិក្សា និងថ្លៃបង់សាលាពីស្ថាប័នរដ្ឋ និងឯកជនពីក្រសួងសង្គមកិច្ច អតីតយុទ្ធជន និងយុវនីតិសម្បទាក្នុងពេលឆាប់ខាងមុខ។ គម្រោងនេះ រៀបចំឡើងក្នុងគោលបំណងដើម្បីជួយលើកកម្ពស់ផ្នែកអប់រំ និងកាត់បន្ថយភាពក្រីក្រដល់ជនពិការ និងជនខ្សោយសតិបញ្ញានៅកម្ពុជា។ ទន្ទឹមនឹងនេះក្រសួងសង្គមកិច្ចសហការជាមួយក្រសួងអប់រំ យុវជន និងកីឡាក៏គ្រោងបង្កើតវិទ្យាស្ថានជាតិអប់រំពិសេសនៅកម្ពុជាផងដែរ។
អនុរដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទាលោក សែម សុខា បានបញ្ជាក់ថា ក្រសួងសង្គមកិច្ចបាននិងកំពុងរៀបចំឲ្យមានគម្រោងបញ្ចុះតម្លៃលើការទិញសម្ភារសិក្សា និងថ្លៃបង់សាលាសម្រាប់ជនពិការ និងជនខ្សោយសតិបញ្ញានៅកម្ពុជា។ លោកបានបន្តថា គម្រោងនេះរៀបចំឡើងក្នុងគោលបំណងជួយកាត់បន្ថយភាពក្រីក្រ និងលើកតម្កើងការអប់រំដល់ជនពិការ និងជនខ្សោយសតិបញ្ញានៅទូទាំងប្រទេស។ លើសពីនេះ ដើម្បីលើកទឹកចិត្ត ក៏ដូចជាផ្តល់សិទ្ធក្នុងការទទួលបានការអប់រំឲ្យស្មើមុខស្មើមាត់ដូចជនមានអាវៈយវៈគ្រប់គ្រាន់។
«ក្រសួងសង្គមកិច្ចបាននិងកំពុងបង្កើតអនុក្រឹត្យក្នុងការបញ្ចុះតម្លៃលើការទិញសម្ភារសិក្សា និងការបង់ថ្លៃឈ្នួលសាលាដល់បងប្អូនជនពិការដែលកំពុងសិក្សា។ ក្រសួងនឹងបង្កើតកាត ឬប័ណ្ណសម្គាល់ដែលបញ្ជាក់ពីពិការភាព ដើម្បីឲ្យគាត់យកទៅបង្ហាញនៅស្ថាប័នរដ្ឋ ឬស្ថាប័នឯកជនដើម្បីទទួលបានការបញ្ចុះតម្លៃទាំងនេះ»។ នេះជាការលើកឡើងរបស់លោក សែម សុខា។
តែយ៉ាងណា អនុរដ្ឋលេខាធិការរូបនេះ មិនបានបញ្ជាក់ច្បាស់លាស់ពីពេលវេលាជាក់លាក់ក្នុងការដាក់ឲ្យអនុវត្តនូវគម្រោងនេះនៅឡើយទេ ដោយលោកគ្រាន់តែបញ្ជាក់ថា៖«យើងកំពុងពិភាក្សាគ្នាលើការបញ្ចុះតម្លៃ លើការបង់ថ្លៃឈ្នួលសាលា ថាតើឯកជនត្រូវធ្វើរបៀបម៉េច? រដ្ឋធ្វើយ៉ាងម៉េច? បញ្ចុះតម្លៃប៉ុន្មាន?»។
លោក សែម សុខា បានបញ្ជាក់ទៀតថា ក្រៅពីគម្រោងនេះ ក្រសួងសង្គមកិច្ច អតីតយុទ្ធជន និងយុវនីតិសម្បទាក៏បាននិងកំពុងគ្រោងបង្កើតអនុក្រឹត្យស្តីពីការធ្វើប័ណ្ណបើកបរ និងសិទ្ធសំចតសម្រាប់ជនពិការផងដែរ។ លើសពីនេះ ក្រសួងសង្គមកិច្ច និងសហការជាមួយក្រសួងអប់រំយុវជន និងកីឡាបង្កើតវិទ្យាស្ថានជាតិអប់រំពិសេស ដើម្បីអប់រំ និងបណ្តុះបណ្តាលជំនាញបង្ហាត់បង្រៀនដល់គ្រូជនពិការ សម្រាប់យកទៅបង្ហាត់បង្រៀនសិស្សនៅតាមបណ្តាខេត្តបន្ត។
ទន្ទឹមនឹងនេះ លោកអនុប្រធានគណៈកម្មាធិការជាតិស្ប៉េស្យាល់អូឡាំពិកកម្ពុជារូបនេះ ស្នើឲ្យមាតា បិតា អាណាព្យាបាលជនពិការ និងជនខ្សោយសតិបញ្ញា និងអង្គការនានាដែលធ្វើការពាក់ព័ន្ធនឹងបញ្ហានេះជួយបង្កើនការយកចិត្តទុកដាក់ឲ្យកាន់តែខ្លាំងថែមទៀត ដើម្បីត្រៀមខ្លួនទទួលយកនូវផែនការ និងគម្រោងទាំងនេះ៕
Tag:
ប៉េស្យាល់
សែម សុខា
ក្រសួងសង្គមកិច្ច
© រក្សាសិទ្ធិដោយ thmeythmey.com