ប្រទះឃើញគ្រាប់បែក ១ គ្រាប់នៅមន្ទីរពេទ្យជោរ៉ៃ នៅថ្ងៃភ្ជុំបិណ្ឌ

ជាតិ

ប្រទះឃើញគ្រាប់បែក ១ គ្រាប់នៅមន្ទីរពេទ្យជោរ៉ៃ នៅថ្ងៃភ្ជុំបិណ្ឌ

21, Sep 2017 , 4:10 pm

រូបភាព

ដោយ:

គ្រាប់បែក១គ្រាប់ត្រូវ បានសន្តិសុខការពារម៉ូតូ ប្រទះឃើញនៅកន្លែងផ្ញើរម៉ូតូក្នុងមន្ទីរពេទ្យជោរ៉ៃ កាលពីយប់ថ្ងៃទី២០ ខែកញ្ញា ដែលជាថ្ងៃភ្ជុំបិណ្ឌ។

លោក គៀត ច័ន្ទថារិទ្ធ ជាអ្នកនាំពាក្យ អគ្គស្នងការដ្ឋាននគរបាលជាតិ មានប្រសាសន៍នៅថ្ងៃទី២១ កញ្ញា ថា ករណីរកឃើញគ្រាប់បែកនៅមន្ទីរពេទ្យជោរ៉ៃ ដែលស្ថិតនៅភូមិបឹងឈូក សង្កាត់និរោធ ខណ្ឌច្បារអំពៅ មិនមែនជាការដាក់បង្កៃឲ្យផ្ទុះ ឬក៏ប៉ុនប៉ងធ្វើឲ្យផ្ទុះនោះទេ ប៉ុន្តែករណីនេះជាការកាន់កាប់គ្រឿងផ្ទុះដោយខុសច្បាប់។ លោក បានបន្តទៀតថា តាមការស្រាវជ្រាវជំហានដំបូង មុខសញ្ញាដែលជាម្ចាស់ម៉ូតូត្រូវបានបងថ្លៃ ឲ្យយកគ្រាប់បែកនេះ ទៅបន្ទាយនៅខាងលិចកំពង់ស្ពឺ ម្ដុំត្រែងត្រយឹង កំពង់សិលា។ «តែដោយសារឪពុកឈឺធ្ងន់នៅមន្ទីរពេទ្យជោរ៉ៃ ម្ចាស់ម៉ូតូបានដាក់គ្រាប់បែកនៅក្នុងខ្លុបម៉ូតូស្កុបពីរុំស្កុតពីក្រៅ ហើយដោយសារតែប្រញ៉ាប់ចូលទៅមើលឪពុកកំពុងឈឺ ពេលដែលយកម៉ូតូទៅផ្ញើក៏មិនបានដកសោម៉ូតូនោះទេ។ សន្តិសុខដែលយាមការពារនៅមន្ទីរពេទ្យ ពេលឃើញសោរនៅជាប់ម៉ូតូ ក៏បានយកសោរម៉ូតូទៅចាក់បើកខ្លុបម៉ូតូដើម្បីឆែកមើលក្រែងមានសម្ភារសំខាន់ត្រូវយក ជួនជាចៃដន្យក៏បានឃើញគ្រាប់បែកពណ៌ខ្មៅរុំស្កុតពីក្រៅ បន្ទាប់មកក៏បានទម្លាក់វានៅជិតម៉ូតូនោះ ហើយស្រែកថាប្រទះឃើញគ្រាប់បែក»។ នេះជាការបញ្ជាក់របស់លោក គៀត ច័ន្ទថារិទ្ធ។

អគ្គស្នងការរងនគរបាលជាតិរូបនេះបន្ថែមទៀតថា សមត្ថកិច្ចក៏បានទៅយកគ្រាប់បែកនោះមករក្សាទុក ចំពោះករណីនេះសមត្ថកិច្ចកំពុងស្រាវជ្រាវបន្តទៀត ដើម្បីរកឲ្យឃើញពិតប្រាកដថាប្រភពគ្រាប់បែកហ្នឹងមកពីណា គោលដៅទៅណា។ បច្ចុប្បន្នកម្លាំងស្នងការនគរបាលរាជធានីភ្នំពេញបានឃាត់មុខសញ្ញាដែលជាម្ចាស់ម៉ូតូ និងហៅសន្តិសុខ ដើម្បីមកធ្វើការបំភ្លឺ និងស៊ើបអង្កេតបន្តទៀត។ នេះបើតាមគេហទំព័រអគ្គស្នងការដ្ឋាននគរបានជាតិ។