ជាតិ
កូនស្រីឯ.ឧ កឹម សុខា រម្លឹកអនុស្សាវរីយ៍ជុំគ្នាជាមួយឪពុកកាលពីឆ្នាំមុនក្នុងពិធីបុណ្យភ្ជុំបិណ្ឌ
× ស្របពេលដែលប្រជាជនខ្មែរ កំពុងជួបជុំគ្រួសារ សាច់ញាតិ បងប្អូន ក្នុងឱកាសបុណ្យភ្ជុំបិណ្ឌ កូនស្រីរបស់ឧត្តម កឹម សុខា ប្រធានគណបក្សសង្គ្រោះជាតិ បានបង្ហាញភាពសោកសៅនៅលើបណ្តាញសង្គមហ្វេសប៊ុក នៅពេលដែលខ្លួនឃ្លាតឪពុកអំឡុងពិធីបុណ្យដ៏ធំរបស់កម្ពុជានេះ។
ភាពសោកសៅ ដែលកញ្ញា កឹម សម្មាធីតា កូនរបស់ឯកឧត្តម កឹម សុខា បង្ហាញនៅលើបណ្តាញសង្គមនោះ គឺរូបភាពទទួលទានអាហារជុំគ្នាជាមួយឪពុក ម្តាយ បងស្រី( កញ្ញា កឹម មនោវិទ្យា) និងរូបខ្លួន កាលពីរដូវភ្ជុំឆ្នាំមុន។«រូបភាពកាលពីភ្ជុំបិណ្ឌឆ្នាំមុន ខ្ញុំនិងក្រុមគ្រួសារបានយកចំណីអាហារទៅទទួលទានជុំគ្នាជាមួយឪពុកនាងខ្ញុំ ដែលជាប់នៅក្នុងស្នាក់ការគណបក្សសង្គ្រោះជាតិ។ ឆ្នាំនេះកុំថាឡើយដល់បានពិសារជុំគ្នា គ្រាន់តែសម្លេងក៍មិនបានឮផង»។ នេះជាការអត្ថាធិប្បាយរបស់កញ្ញា កឹម សម្មាធីតា អមជាមួយរូបភាពផងដែរ។
សូមរម្លឹកថា ឯកឧត្តម កឹម សុខា ត្រូវបានអាជ្ញាធរចាប់ខ្លួននៅពាក់កណ្តាលអធ្រាត្រថ្ងៃទី២ ចូលថ្ងៃទី៣ ខែកញ្ញា ឆ្នាំ២០១៧នេះ នៅផ្ទះរបស់លោកនៅសង្កាត់បឹងកក់ ២ ខណ្ឌទួលគោក។ ក្រោយចាប់ខ្លួនប្រធានគណបក្សសង្គ្រោះជាតិ សម្តេចនាយករដ្ឋមន្ត្រី ហ៊ុន សែន បានបកស្រាយដោយចោទប្រកាន់ឯកឧត្តម កឹម សុខា ថា ជាជនក្បត់ជាតិ ដែលស្តាប់បញ្ជាអាមេរិក ដើម្បីធ្វើផែនការផ្តួលរំលំរដ្ឋាភិបាល។ សម្តេចលើកឡើងដូច្នេះ ដោយសម្តេចយោងទៅលើសារនយោបាយរបស់ឯកឧត្តម កឹម សុខា កាលពីឆ្នាំ ២០១៣ នៅប្រទេសអូស្ត្រាលី នៅក្នុងវីដេអូឃ្លីប ដែលត្រូវបានផ្សាយដោយបណ្តាញមួយ ឈ្មោះ CBN (Cambodian Broadcasting Network)។
ក្រោយពីប្រមុខរដ្ឋាភិបាលបកស្រាយថា ឯកឧត្តម កឹម សុខា បានប្រព្រឹត្តអំពើក្បត់ជាតិ នៅថ្ងៃទី ៥ ខែកញ្ញា តុលាការបានសម្រេចចោទប្រកាន់ឯកឧត្តម កឹម សុខា ពីអំពើក្បត់ជាតិ ទាក់ទងនឹងបទល្មើសសន្ទិដ្ឋិភាពជាមួយបរទេស។ បច្ចុប្បន្នឯកឧត្តម កឹម សុខា កំពុងឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ៕
Tag:
កឹម សម្មាធីតា
កឹម សុខា
© រក្សាសិទ្ធិដោយ thmeythmey.com