ជាតិ
នយោបាយជាតិ
គណបក្សហ្វ៊ុនស៊ិនប៉ិច ដករូបសម្តេចក្រុមព្រះ ចេញពីស្លាកសញ្ញា ហើយដាក់ពាក្យបាលីជំនួស ព្រះអង្គម្ចាស់ នរោត្តម រណឫទ្ធិ មានព្រះបន្ទូល ក្នុងអង្គសមាជវិសាមញ្ញ នៅមជ្ឈមណ្ឌលកោះពេជ្រ នាថ្ងៃទី២៣ ខែកញ្ញា ឆ្នាំ២0១៧។
× ភ្នំពេញ៖ គណបក្សហ្វ៊ុនស៊ិនប៉ិច សម្រេចដករូបព្រះអង្គម្ចាស់ នរោត្តម រណឫទ្ធិ ចេញពីសញ្ញាសម្គាល់។ ក្រោយដករូបព្រះអង្គម្ចាស់ចេញ គណបក្សនេះ បានសរសេរពាក្យថា «ឧម» ដែលជាភាសាបាលី ក្នុងព្រហ្មញ្ញសាសនា ចូលទៅក្នុងសញ្ញាសម្គាល់។
រូបព្រះអង្គម្ចាស់ នរោត្តម រណឫទ្ធិ ត្រូវបានដកចេញពីសញ្ញាសម្គាល់ (logo) របស់គណបក្សហ្វ៊ុនស៊ិនប៉ិច។ ការសម្រេចបែបនេះ គឺធ្វើឡើងតាមរយៈសមាជវិសាមញ្ញ ដែលរៀបចំឡើងនៅមជ្ឈមណ្ឌលកោះពេជ្រ នាថ្ងៃទី២៣ ខែកញ្ញា ឆ្នាំ២0១៧ ក្រោមអធិបតីភាពរបស់ព្រះអង្គម្ចាស់ នរោត្តម រណឫទ្ធិ ប្រធានរបស់គណបក្សហ្វ៊ុនស៊ិនប៉ិច។
លោក ញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិចបានប្រាប់សារព័ត៌មានថ្មីៗថា ពាក្យ «ឧម» ដែលជាភាសាបាលី បែបព្រហ្មញ្ញសាសនា ត្រូវបានដាក់ចូលទៅក្នុងសញ្ញាសម្គាល់ ជំនួសឲ្យរូបព្រះអង្គម្ចាស់នរោត្តម រណឫទ្ធិ។ បើតាមការបកស្រាយរបស់អ្នកនាំពាក្យរូបនេះ ពាក្យ «ឧម» គឺសំដៅលើ «ប្រភពនៃអំណាច»។
(រូបភាពពីទំព័រហ្វេសប៊ុកឈ្មោះ «ព័ត៌មាន សម្តេចក្រុមព្រះ»)
ចំណែកឯ រូបកាំរស្មីទាំង២៥ ដែលស្ថិតនៅពីក្រោយរូបព្រះអង្គមា្ចស់ នរោត្តម រណឫទ្ធិ នៅតែរក្សាទុកដូចមុន ដដែល។ កាលពីមុន រូបកាំរស្មីទាំង២៥នេះ គឺតំណាងឲ្យរាជធានី-ខេត្ត ទាំង២៥ នៅក្នុងប្រទេសកម្ពុជា។
ប៉ុន្តែ លោក ញ៉េប ប៊ុនជិន អះអាងថា អង្គសមាជវិសាមញ្ញ នាថ្ងៃនេះ បានសម្រេចប្តូរអត្ថន័យនៃរូបកាំរស្មីទាំង២៥ ហើយ។ លោក បញ្ជាក់ថា ចាប់ពីពេលនេះតទៅ រូបកាំរស្មីទាំង២៥ គឺតំណាងឲ្យ ភាពសប្បូរសប្បាយនិងភាពរុងរឿង របស់ប្រជាពលរដ្ឋ ក៏ដូចជាប្រទេសកម្ពុជាទាំងមូល។ លោក និយាយដូច្នេះថា៖«បើយើង យករស្មីទាំង២៥ តំណាងឲ្យរាជធានី-ខេត្តទាំង២៥ ក្នុងប្រទសកម្ពុជា ចុះថ្ងៃក្រោយ បើគេ ពង្រីកឬបន្ថែម [ខេត្ត] ទៀត ឲ្យយើង គិតយ៉ាងម៉េចវិញ? គឺយើង នឹងត្រូវកែសម្រួលតាមគេបន្តទៀតហើយ។ អ៊ីចឹង រស្មីទាំង២៥ហ្នឹង មិនតំណាងឲ្យរាជធានី-ខេត្តទាំង២៥ ទៀតទេ គឺតំណាងឲ្យភាពរុងរឿងរបស់ប្រទេសយើង»។
ការរៀបចំសមាជវិសាមញ្ញខាងលើ ដើម្បីកែសម្រួលសញ្ញាសម្គាល់គណបក្ស គឺធ្វើឡើងក្រោយពីមានការស្នើសុំពីក្រសួងមហាផ្ទៃ។ ក្រសួងមហាផ្ទៃ បានផ្ញើលិខិតមួយច្បាប់ ថ្វាយទៅព្រះអង្គម្ចាស់ នរោត្តម រណឫទ្ធិ ដោយស្នើឲ្យកែសម្រួលសញ្ញាសម្គាល់គណបក្ស ឡើងវិញ ដើម្បីស្របតាមច្បាប់ស្តីពី គណបក្សនយោបាយ។
ច្បាប់ស្តីពីគណបក្សនយោបាយ ដែលត្រូវបានកែប្រែ បានចែងថា គណបក្សនយោបាយ មិនអាចយករូបរបស់បុគ្គល ទៅធ្វើជាសញ្ញាសម្គាល់របស់គណបក្សឡើយ ហើយគណបក្សនយោបាយ ក៏មិនអាចប្រើឈ្មោះរបស់បុគ្គល ទៅដាក់ជាឈ្មោះរបស់គណបក្សដែរ៕
© រក្សាសិទ្ធិដោយ thmeythmey.com