ជាតិ
ពីនេះ ពីនោះ
ទំនាក់ទំនងរវាងជំនាញ Sale និង Marketing ដែលជាដង្ហើមរបស់អង្គភាពអាជីវកម្ម
× ភ្នំពេញ៖ និស្សិតដែលសិក្សាជំនាញម៉ាឃីតធីង កំពុងត្រូវបានសាធារណជនភ័ន្តច្រឡំ និងបន្ទច់បង្អាប់ ថា គ្រាន់តែជាអ្នកដើរផ្សព្វផ្សាយលក់ផលិតផល ឬសេវាកម្មប៉ុណ្ណោះ។ តាមពិត អ្នកធ្វើការផ្នែក Marketing និង Sale ត្រូវបានម្ចាស់អាជីវកម្ម និងសាស្ត្រាចារ្យភាគច្រើនឲ្យតម្លៃពួកគេខ្ពស់បំផុត ហើយចាត់ទុកអ្នកធ្វើការងារផ្នែកនេះ ជាដង្ហើមរបស់អង្គភាពអាជីវកម្ម ដោយមិនអាចប្រកែកបានឡើយ។ ហើយបច្ចុប្បន្ន និស្សិតសិក្សាជំនាញម៉ាឃីតធីងមានតិចជាងម្រូវការនៅលើទីផ្សារការងារ ។ សិស្សានិស្សិតដែលចង់សិក្សាជំនាញម៉ាឃីតធីតឲ្យពូកែ ត្រូវស្វែងយល់អ្វីខ្លះពីជំនាញមួយនេះ?
ជំនាញម៉ាឃីតធីង គឺជាអ្វី?
ម៉ាឃីតធីង (Marketing) ត្រូវបានគេផ្តល់ទស្សនទានផ្សេងៗគ្នា អ្នកខ្លះថា ជាការសិក្សាអំពីរបៀបផ្សព្វផ្សាយ លក់ផលិតផល និងសេវាកម្ម។ អ្នកខ្លះទៀតយល់ថា ជាការសិក្សាដោយផ្តោតសំខាន់ទៅលើការបំពេញចិត្តអតិថិជន និងការកសាងទំនុកចិត្តរបស់អតិថិជនមកលើម៉ាកសញ្ញារបស់ក្រុមហ៊ុន។ ហើយក៏មានទស្សនទានមួយចំនួនទៀតយល់ថា ម៉ាឃីតធីង គឺសំដៅទៅលើសកម្មភាពទាំងឡាយណា ដែលមានទំនាក់ទំនងជាមួយទីផ្សារ ហើយទីផ្សារនោះជាកន្លែងដែលអ្នកលក់ និងអ្នកទិញជួបគ្នា។ល។
សម្រាប់លោកសាស្ត្រាចារ្យជំនាញម៉ាឃីតធីង អៀម សំអឿន បានឲ្យនិយមន័យដោយយោងតាមសមាគមអ្នកម៉ាឃីតធីងសហរដ្ឋអាមេរិក (AMA) ថា ម៉ាឃីតធីង គឺជាដំណើរការនៃការរៀបចំផែនការ និងការប្រតិបត្តិទៅលើទស្សនទានទាក់ទងនឹងផលិតផល និងសេវាកម្ម ការកំណត់តម្លៃ ការផ្សព្វផ្សាយ និងចែកចាយ ដើម្បីបំពេញតម្រូវការអតិថិជន ជាលក្ខណបុគ្គល និងអង្គភាព គោលបំណង ដើម្បីប្រាក់ចំណេញយូរអង្វែង។ និយាយជារួមម៉ាឃីតធីង គឺផ្តោតលើគោលការណ៍ 4P’s ។
ទំនាក់ទំនងពិសេសរវាងជំនាញ Marketing និង Sale
នៅកម្ពុជាមិនមានសកលវិទ្យាល័យណាបង្រៀនជំនាញ Sale ឡើយ។ ផ្នែក Sale គ្រាន់តែជាផ្នែកមួយនៅក្នុងជំនាញម៉ាឃីតធីងប៉ុណ្ណោះ។ លោកសាស្ត្រាចារ្យជំនាញម៉ាឃីតធីងខាងលើ បានពន្យល់ពីទំនាក់ទំនងរវាងជំនាញ Marketing និង Sale ថា ផ្នែក Sale គ្រាន់តែជាផ្នែកមួយរបស់ម៉ាឃីតធីង តែការងារស្នូលរបស់អ្នកម៉ាឃីតធីង គឺគិតអំពីការលក់ ឬគេអាចនិយាយបានថា ផ្នែក Sale គឺជាសកម្មភាពស្នូលរបស់អ្នកម៉ាឃីតធីង។ បន្ថែមពីនេះ លោកសាស្ត្រាចារ្យបានឲ្យនិយមមន័យ Sale ថា គឺជាកាលក់ ដោយផ្តល់នូវទំនិញ ឬសេវាកម្មទៅដល់អតិថិជន ហើយជាការដោះដូរទំនិញ និងទំនិញ ឬទំនិញ និងលុយ។ ជាងនេះទៅទៀត គេត្រូវប្រើយុទ្ធសាស្ត្រម៉ាឃីតធីង គឺរកអតិថិជនគោលដៅ ហើយប្រើយុទ្ធសាស្ត្រ 4P’s ឬ 7P’s ដើម្បីលក់។
សិស្សនិស្សិតត្រូវដឹងអ្វីខ្លះ ពីមូលដ្ឋានគ្រឹះនៃជំនាញម៉ាឃីតធីង?
ជាទូទៅគ្រប់សៀវភៅម៉ាឃីតធីង គឺគេសិក្សាពីគោលការណ៍ 4P’s ឬហៅថា Marketing Mix រួមមាន ១. Product (ផលិតផល ឬសេវាកម្ម) ២. Price (ការកំណត់តម្លៃនៅលើទីផ្សារ) ៣. Place [Distribution] (ច្រកបែងចែកផលិតផល ឬសេវាកម្ម ទៅតាមទីតាំដែលនៅក្បែរអតិថិជន ដោយធ្វើការលក់ផ្ទាល់ លក់រាយ ឬលក់ដុំ) ៤. Promotion (ការផ្សព្វផ្សាយ ឬបំផុសបំផុល) ។ នៅក្នុងចំណុចទី៤នេះ ត្រូវបានអ្នកម៉ាឃីតធីងប្រើយុទ្ធសាស្ត្រ Promotion Mix ដើម្បីបង្កើនការផ្សព្វផ្សាយ។ ៤ចំណុចនេះរួមមាន ៤.១ Advertising (ការផ្សព្វផ្សាយពាណិជ្ជកម្ម ឧ. វិទ្យុ, ទូរទស្សន៍, ផ្ទាំងប៉ាណូ...) ៤.២ Personal Selling (បុគ្គលិកផ្នែកលក់របស់អង្គភាព) ៤.៣ Sale Promotion (លក់បណ្តើរផ្សព្វផ្សាយបណ្តើរ គឺនៅពេលផ្សព្វផ្សាយមានទំនិញលក់នៅនឹងកន្លែងផ្សព្វផ្សាយ ឧ. ការតាំងពិព័រណ៌, ប្រគំតន្ត្រី,...) ៤.៤ Public Relation (ទំនាក់ទំនងសាធារណៈ គឺអង្គភាពផ្តល់ទៅឲ្យសារធារណៈ ឬធ្វើកិច្ចការដើម្បីសាធារណៈ ដូចជា៖ ធ្វើបង់ឲ្យអង្គុយ ជួយមន្ទីរពេទ្យគន្ធបុប្ផា កាកបាទក្រហម... ដែលជាការឧបត្ថមដោយក្រុមហ៊ុនរបស់គេ) ។ ទាំងនេះជាសេចក្តីពន្យល់ពីមូលដ្ឋានគ្រឹះម៉ាឃីតធីង របស់លោកសាស្ត្រាចារ្យ អៀម សំអឿន នៃសកលវិទ្យាល័យស្វាយរៀង។
បន្ថែមពីនេះ លោកសាស្ត្រាចារ្យបានពន្យល់ពីរចំណុចថ្មីៗបន្ថែមទៀត ដែលអ្នកម៉ាឃីតធីងត្រូវតែប្រើដើម្បីប្រកួតប្រជែងនៅលើទីផ្សារឲ្យ កាន់តែមានប្រសិទ្ធិភាព គឺ៤.៥ Direct Marketing (អ្នកលក់ប្រើយុទ្ធសាស្ត្រផ្ញើសារ (SMS) ឬទូរសព្ទផ្ទាស់ទៅកាន់អតិថិជ ឬក៏សុំជួបផ្ទាល់ដើម្បីបង្ហាញពីទំនិញ និងសេវាកម្មរបស់ពួកគេ) ។ និងទី៤.៦ Internet Marketing (ផ្សព្វផ្សាយតាមប្រព័ន្ធអ៊ីនធើណិតដូចជា៖ គេទំព័រ ហ្វេសប៊ុក...) ។ សរុបមក មធ្យោបាយផ្សព្វផ្សាយ ៤ចំណុចនៅក្នុង Promotion Mix ខាងលើ គេហៅថា សមាហរណកម្មនៃការទំនាក់ទំនងម៉ាឃីតធីង (IMC) គឺអ្នកម៉ាឃីតធីងខំប្រឹងទំនាក់ទំនង ផ្សព្វផ្សាយ ពន្យល់ បញ្ចុះបញ្ចូលឲ្យគេដឹង ស្គាល់ និងជឿទុកចិត្តលើផលិតផលរបស់អង្គភាព ដើម្បីឲ្យអតិថិជនទិញផលិតផល ឬសេវាកម្ម។
នៅក្នុងសៀវភៅជំនាន់ថ្មី មានទស្សនទានម៉ាឃីតធីងមួយចំនួនបានបន្ថែមយុទ្ធសាស្ត្រម៉ាឃីតធីង ឬគោលការណ៍ម៉ាឃីតធីងបីចំណុចទៀត ពោលគឺពី 4P’s ទៅ 7P’s ។ បីចំណុចថ្មីនោះ គឺផ្តោតទៅលើការផ្តល់សេវាកម្មរបស់អ្នកលក់ រួមមាន៖ ៥. People (ការផ្តល់សេវាកម្មរស់អ្នកលក់ល្អ ឬមិនល្អ) ៦. Process (ដំណើរការនៃការផ្តល់សេវាកម្មរបស់អ្នកលក់លឿន ឬក៏យឺត) ៧. Physical Environment (បរិយាកាសរូបសាស្ត្រ គឺការតុបតែងហាងឲ្យបានស្អាត ល្អ កន្លែងមានខ្យល់បរិសុទ្ធ ឬមិនមាន) ។ នេះជាសេចក្តីពន្យល់បញ្ជាក់របស់សាស្ត្រាចារ្យជំនាញម៉ាឃីតធីង វ័យ៣៦ឆ្នាំ អៀម សំអឿន។
លក្ខណសម្បត្តិ និងចំណេះដឹងអ្វីខ្លះ ដែលសិស្សនិស្សិតត្រូវមាន និងត្រៀមទុក?
ដើម្បីអាចសិក្សាជំនាញម៉ាឃីតធីងឲ្យពូកែ សិស្សនិស្សិតត្រូវមានចំណេះដឹងគ្រឹះចំនួនដូចជា៖ ពូកែទំនាក់ទំនង សិល្ប៍នៃការនិយាយ ត្រូវមានចំណេះផ្នែកភាសារខ្មែរ ភាសារបរទេស សីលធម៌ និងគណិតវិទ្យាបន្តិចបន្តួចផងដែរ។ លើសពីនេះ អ្នកចង់សិក្សាជំនាញម៉ាឃីតធីងក៏ទាមទារឲ្យមានបុគ្គលិកលក្ខណពិសេស មួយចំនួនទៀតដូចជា៖ ត្រូវមានរួបសម្បត្តិសមរម្យ ចេះតស៊ូ អំណត់ អត់ធ្មត់ ស្មោះត្រង់ និយាយរស់រាយរាក់ទាក់ ពូកែពន្យល់ ពូកែស្តាប់ និងចេះសម្របសម្រួលគ្រប់ស្ថានភាពជាមួយអតិថិជនគ្រប់ប្រភេទ ឬកម្រិត។ល។
នៅក្នុងការសិក្សាជំនាញម៉ាឃីតធីង មានមុខវិទ្យាផ្សេងៗគ្នាទៅតាមគ្រឹះស្ថានឧត្តមសិក្សានីមួយៗ។ ឆ្លងកាត់ការបង្រៀនជំនាញម៉ាឃីតធីង នៅសកលវិទ្យាល័យជិត៨ឆ្នាំកន្លងមក លោកសាស្ត្រាចារ្យ អៀម សំអឿង បានមានប្រសាសន៍ថា មានមុខវិទ្យាសំខាន់ៗមួយចំនួនដែលគេត្រូវសិក្សាដូចជា៖ មូលដ្ឋានគ្រឹះម៉ាឃីតធីង ការស្រាវជ្រាវម៉ាឃីតធីង ការសិក្សាស្វែងយល់ពីឥរិយាបថរបស់អតិថិជន យុទ្ធសាស្ត្ររបស់ម៉ាឃីតធីង យុទ្ធសាស្ត្រនៃការកំណត់ថ្លៃ ការគ្រប់គ្រងការលក់ ការគ្រប់គ្រងលើផលិតកម្ម និងការអភិវឌ្ឍផលិតផលថ្មី។ល។
អត្ថប្រយោជន៍ និងឱកាសការងារសម្រាប់សិស្សនិស្សិត ដែលសិក្សាជំនាញម៉ាឃីតធីង
ក្រោយពេលបញ្ចប់ការសិក្សាជំនាញម៉ាឃេធីង និស្សិតអាចនឹងមានសមត្ថភាពធ្វើការងារនៅក្នុងក្រុមហ៊ុនឯកជន អង្គការមិនស្វែងរកប្រាក់ចំណេញ និងជាមន្ត្រីរាជការ ដូចជា៖ ជាបុគ្គលិកផ្នែកលក់ និងទីផ្សារ បុគ្គលិកផ្នែកអភិវឌ្ឍន៍អាជីវកម្ម បុគ្គលិកផ្នែកម៉ាកសញ្ញាពាណិជ្ជកម្ម អ្នកចែកចាយផលិតផល អ្នកសម្របសម្រួលម៉ាឃេធីង មន្ត្រីម៉ាឃេធីង អ្នកគ្រប់គ្រងផ្នែកលក់ អ្នកគ្រប់គ្រងម៉ាឃេធីង អ្នកគ្រប់គ្រងការផ្សាយពាណិជ្ជកម្ម អ្នកគ្រប់គ្រងទំនាក់ទំនងសាធារណៈ ភ្នាក់ងារទេសចរណ៍ ភ្នាក់ងារដឹកជញ្ជូន។ល។ ហើយក៏អាចបើកអាជីវកម្មដោយខ្លួនឯងផងដែរ។
បើតាមលោកសាស្ត្រាចារ្យជំនាញម៉ាឃីតនៃសកលវិទ្យាល័យស្វាយរៀង អៀម សំអឿន បានបញ្ជាក់ថា មុខវិទ្យាម៉ាឃីតធីង គឺជាមុខវិទ្យាងាយស្រួលរកការងារធ្វើបំផុត។ ហើយប៉ុន្នានឆ្នាំចុងក្រោយនេះលោកស្រាស្ត្រចារ្យកត់សម្គាល់ឃើញថា អ្នកសិក្សាជំនាញគ្រប់គ្រង គណនីយ្យ ធនាគា និងអ្នកសិក្សាជំនាញទាក់ទងនឹងអាជីវកម្មមួយចំនួនទៀត កំពុងដណ្តើមការងាររបស់អ្នកសិក្សាជំនាញម៉ាឃីតធីង៕
© រក្សាសិទ្ធិដោយ thmeythmey.com