អន្តរជាតិ
រដ្ឋកោះប៉ាស៊ីហ្វិករិះគន់អាមេរិក និងទទូចឲ្យពិភពលោកតាំងចិត្តចូលរួមប្រឆាំងការប្រែប្រួលអាកាសធាតុ អនុប្រធានាធិបតីរដ្ឋកោះប៉ាស៊ីហ្វិក មីក្រូណេស៊ីលោក Yosiwo George (រូបភាព៖ UN)
× បណ្តាប្រទេសកោះប៉ាស៊ីហ្វិកនាំគ្នាអំពាវនាវឲ្យសហគមន៍អន្តរជាតិបន្តប្តេជ្ញាចិត្តអនុវត្តកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ និងបន្តផ្តល់ការគាំទ្រហិរញ្ញវត្ថុសម្រាប់ការដោះស្រាយបញ្ហាប្រែប្រួលអាកាសធាតុនៅប្រទេសកំពុងអភិវឌ្ឍផង។ ការអំពាវនាវនេះធ្វើឡើងក្នុងមហាសន្និបាតអង្គការសហប្រជាជាតិលើកទី ៧២នៅក្រុងញូវយ៉កនៅថ្ងៃសុក្រទី ២៣ខែកញ្ញា។
តំណាងប្រទេសកោះប៉ាស៊ីហ្វិកតូចៗបាននាំគ្នាយកវេទិកាមហាសន្និបាតអង្គការសហប្រជាជាតិលើកទី ៧២ ដើម្បីអំពាវនាវឲ្យប្រទេសទូទាំងពិភពលោកចូលរួមដោះស្រាយបញ្ហាប្រែប្រួលអាកាសធាតុដែលកំពុងបង្កផលប៉ះពាល់ដល់ពួកគេ។
តំណាងប្រទេសមីក្រូណេស៊ី អនុប្រធានាធិបតី Yosiwo George ថ្លែងប្រាប់អង្គប្រជុំទាំងមូលថា ប្រទេសលោកព្រួយបារម្ភខ្លាំងដែលប្រទេសមួយចំនួនព្រងើយកន្តើយការប្រែប្រួលអាកាសធាតុ និងចាត់ទុកបញ្ហានេះជារឿងបោកប្រាស់ទៀត។
«មីក្រូណេស៊ីបារម្ភខ្លាំងដែលប្រទេសមួយចំនួនបានជ្រើសរើសយកផ្លូវដាច់ដោយឡែកពីសហគមន៍អន្តរជាតិ និងមិនខ្វល់ខ្វាយពីកិច្ចព្រមព្រៀងអាកាសធាតុក្រុងប៉ារីស ដែលផ្ទុយនឹងការផ្តល់យោបល់របស់អ្នកវិទ្យាសាស្ត្រ»។
ឆ្លៀតឱកាសនេះដែរ តំណាងកោះមីក្រូណេស៊ីក៏បានទទូចឲ្យបណ្តាប្រទេសធំៗបន្តចូលរួមចំណែកផ្តល់ការគាំទ្រដល់មូលនិធិហិរញ្ញវត្ថុសម្រាប់ការដោះស្រាយបញ្ហាប្រែប្រួលអាកាសធាតុ (Green Climate Fund) ដែលជួយទ្រទ្រង់ប្រទេសក្រីក្រផងដែរ។
ថ្វីបើតំណាងកោះមីក្រូណេស៊ីរូបនេះមិនបញ្ជាក់ឈ្មោះប្រទេសក៏ដោយ គេដឹងច្បាស់ថាលោកចង់សំដៅលើប្រទេសមួយចំនួនមានទាំងអាមេរិកដែលបានដកខ្លួនចេញពីកិច្ចព្រមព្រៀងអាកាសធាតុក្រុងប៉ារីសកន្លងមកនោះ។ កាយវិការរបស់ប្រធានាធិបតីអាមេរិកចំពោះការដោះស្រាយបញ្ហាអាកាសធាតុនេះបង្កឲ្យមានការភ្ងាក់ផ្អើល និងប្រៀបបានដូចជាការបោះបង់ការទទួលខុសត្រូវចំពោះការស្វែងរកដំណោះស្រាយវិបត្តិពិភពលោកដូច្នេះដែរ។
កិច្ចព្រមព្រៀងអាកាសធាតុ ឆ្នាំ ២០១៥ ជាលិខិតបទដ្ឋានអន្តរជាតិប្រវត្តិសាស្ត្រមួយដែលទទួលបានការគាំពីប្រទេស ១៩៥ ទូទាំងពិភពលោក។ វាមានគោលដៅសំខាន់ប្រយុទ្ធប្រឆាំងការប្រែប្រួលអាកាសធាតុ និងជំរុញឲ្យមានការដាក់ចេញដំណោះស្រាយ និងដាក់ទុនវិនិយោគដែលធានាការកាត់បន្ថយឧស្ម័នកាបូនឌីអុកស៊ីត ត្រៀមខ្លួនដោះស្រាយបញ្ហាប្រឈមផ្នែកអាកាសធាតុ និងធានាបាននូវការអភិវឌ្ឍប្រកបដោយនិរន្តរភាព។
ជារួមគោលបំណងសំខាន់នៃកិច្ចព្រមព្រៀងនេះគឺធ្វើយ៉ាងណាទប់ស្កាត់ការកើនឡើងសីតុណ្ហភាពមិនឲ្យលើសពី ពីរអង្សាសេ និងអាចឈានទៅកម្រិតការកើនឡើងសីតុណ្ហភាពត្រឹម ១,៥ អង្សាសេមុនសម័យឧស្សាហកម្ម។
ក្រៅពីមីក្រូណេស៊ី តំណាងប្រទេស ប៉ាពូ អាស៊ី នូវែលហ្គីណេ បានលើកឡើងពីកង្វល់របស់ខ្លួនដូចគ្នានៅចំពោះមុខមហាសន្និបាតពាក់ព័ន្ធបញ្ហាប្រែប្រួលអាកាសធាតុ។ ប្រមុខរដ្ឋាភិបាលកោះប៉ាពូ អាស៊ីនូវែលហ្គីណេលោក Peter O’Neill បានលើកឡើងពីក្តីបារម្ភរបស់ប្រជាជនលោកពាក់ព័ន្ធការប្រើប្រាស់ធនធានមិនត្រឹមត្រូវ រួមជាមួយគ្រោះមហន្តរាយទឹកជំនន់ និងការកើនឡើងកម្រិតនីវ៉ូទឹកសមុទ្រដែលបង្កដោយការប្រែប្រួលអាកាសធាតុជាដើម។
«ប៉ាពូ អាស៊ី នូវែលហ្គីណេ និងប្រទេសនានាលើពិភពលោក ប្រជាជនជាច្រើនកំពុងស្លាប់បាត់បង់ជីវិតដោយសារការប្រែប្រួលអាកាសធាតុ។ ស្តង់ដារនៃការរស់នៅរងការប៉ះពាល់ ហើយពួកគេបាត់បង់ឱកាសទៀត។ ពិភពលោកត្រូវចាប់ផ្តើមសកម្មភាពឥឡូវនេះដើម្បីកាត់បន្ថយឧស្ម័នកាបូនឌីអុកស៊ីត និងជួយដល់សហគមន៍នានាឆ្លើយតបនឹងបញ្ហាបង្កឡើងដោយការប្រែប្រួលអាកាសធាតុឲ្យកាន់តែមានប្រសិទ្ធិភាព»។ លោក Peter O’Neil បានបញ្ជាក់ដូច្នេះ។
ចំណែកតំណាងកោះម៉ាសាល់ ក៏បានយកអង្គមហាសន្និបាតដើម្បីអំពាវនាវឲ្យសហគមន៍អន្តរជាតិមានទំនុកចិត្តចំពោះកិច្ចព្រមព្រៀងអាកាសធាតុ និងបន្តប្តេជ្ញាចិត្តដោះស្រាយបញ្ហាសកលនេះរួមគ្នាផងដែរ។
រដ្ឋមន្ត្រីការបរទេសកោះម៉ាសាល់ John Silk បានថ្លែងថាការប្រែប្រួលអាកាសធាតុជារឿងពិតប្រាកដមិនមែនបោកប្រាស់ឡើយ ហើយវាជារឿងចាំបាច់ដែលប្រទេសទាំងអស់ត្រូវតាំងចិត្តមិនដកថយដើម្បីដោះស្រាយបញ្ហាប្រឈមនេះ។ លើសពីនេះលោកជឿជាក់ថា គោលដៅទី ១៤នៃគោលការអភិវឌ្ឍន៍ដោយចីរភាពមានសារសំខាន់សម្រាប់បណ្តារដ្ឋតូចៗដូចជាប្រទេសរបស់លោក ព្រោះវាក៏មហិច្ឆតាជំរុញការអភិរក្សនិងការប្រើប្រាស់ប្រកបដោយនិរន្តរភាពនូវធនធាតុសមុទ្រដែលជាប្រភពនៃចំណូល និងនិងជីវិតរបស់ប្រជាជនផង។
ប្រមុខការទូតកោះម៉ាសាល់បានលើកឡើងដូច្នេះ៖ «កិច្ចព្រមព្រៀងអាកាសធាតុក្រុងប៉ារីសជាឆន្ទៈនិងទំនុកចិត្តផ្នែកនយោបាយតែមួយគត់ ហើយវាលើសពីមានសារសំខាន់ទៀតសម្រាប់គ្រប់គ្នា ព្រោះវាមានគោលដៅចម្បងជំរុញឲ្យប្រជាជាតិទាំងអស់ធ្វើសកម្មភាពច្រើនជាងមុនដើម្បីដោះស្រាយបញ្ហពិភពលោកនេះ»៕
Tag:
បាស៊ីហ្វិក
UNGA
ការប្រែប្រួលអាកាសធាតុ
អាមេរិក
© រក្សាសិទ្ធិដោយ thmeythmey.com