អន្តរជាតិ
នយោបាយអន្តរជាតិ
កូរ៉េខាងជើងថា អាមេរិកបានប្រកាសសង្គ្រាម តែសេតវិមានថា ទេ!
×
បន្ទាប់ពីផ្លោងពាក្យសម្ដីដាក់គ្នាមួយប្រាវមក រដ្ឋមន្ត្រីការបរទេសកូរ៉េខាងជើង នៅថ្ងៃទី២៥ ខែកញ្ញា និយាយថា ប្រធានាធិបតីអាមេរិក ដូណាល់ ត្រាំ បានប្រកាសសង្គ្រាមជាមួយកូរ៉េខាងជើងហើយ។ ជាមួយគ្នានេះ កូរ៉េខាងជើងក៏គំរាមចាត់វិធានការឆ្លើយតបវិញ រួមបញ្ចូលទាំងការបាញ់ទម្លាក់រាល់យន្តហោះទម្លាក់គ្រាប់បែកអាមេរិក ទោះជាមិនបានហោះចូលដែនអាកាសរបស់ខ្លួនក្ដី។ ឯសេតវិមានបានទាត់ចោលការលើកឡើងរបស់មន្ត្រីកូរ៉េខាងជើងរូបនេះ។
ប្រមុខការទូតកូរ៉េខាងជើង រី យ៉ុងហូ បានផ្ញើសារគំរាមខ្លាំងក្លាមួយពីទីក្រុងញូវយ៉កទៅកាន់មេដឹកនាំអាមេរិក ដូណាល់ ត្រាំ ដែលគំរាមកម្ទេចកូរ៉េខាងជើងទាំងស្រុងនោះ។ សង្គ្រាមពាក្យសម្ដីរវាងអាមេរិក និងកូរ៉េខាងជើង កាន់តែពុះកញ្ជ្រោលខ្លាំង ក្រោយការថ្លែងរបស់លោក ត្រាំ ក្នុងកិច្ចប្រជុំមហាសន្និបាតអង្គការសហប្រជាជាតិ ដែលចាប់ផ្ដើមកាលពីពាក់កណ្ដាលសប្ដាហ៍មុន។ គូសត្រូវទាំងពីរ បានគំរាមវាយប្រហារគ្នាទៅវិញទៅមក ដែលធ្វើឲ្យមានការបារម្ភយ៉ាងខ្លាំង។
ថ្លែងទៅកាន់អ្នកសារព័ត៌មាននៅថ្ងៃទី២៥ ខែកញ្ញា មន្ត្រីការទូតកូរ៉េខាងជើងចាត់ទុកសារលើបណ្ដាញសង្គម Twitter របស់លោក ត្រាំ ដែលសរសេរថា «រដ្ឋមន្ត្រីការបរទេស និងមេដឹកនាំកូរ៉េខាងជើង គីម ជុងអ៊ុន នឹងមិនអាចមានមុខយូរទៀតឡើយ បើនៅតែបន្តសកម្មភាពរបស់ខ្លួន» គឺជាការប្រកាសសង្គ្រាម។ លោក រី យ៉ុងហូ ក៏ប្រាប់ឲ្យពិភពលោកចងចាំឲ្យច្បាស់ថា អាមេរិកឯណោះទេជាអ្នកប្រកាសសង្គ្រាមមុន។
បើតាមទីភ្នាក់ងារព័ត៌មាន Reuters ដែលស្រង់សម្ដីប្រមុខការទូតកូរ៉េខាងជើងដដែលនេះ ក្រុងព្យុងយ៉ាងរក្សាសិទ្ធិក្នុងការចាត់វិធានការតបតសកម្មភាពរបស់អាមេរិក រាប់ទាំងការបាញ់ទម្លាក់យន្តហោះអាមេរិកផងដែរ។ នេះជាការគំរាមដោយផ្ទាល់ទៅកាន់យន្តហោះកងទ័ពអាមេរិក ជាពិសេសយន្តហោះទម្លាក់គ្រាប់បែក B1-B ដែលតែងតែបង្ហាញវត្តមានញឹកញាប់លើដែនអាកាសឧបទ្វីបកូរ៉េដើម្បីសម្ញែងអានុភាពយោធា។
ក្នុងន័យឆ្លើយតបទៅនឹងសារលើ Twitter ថ្ងៃទី២៣ ខែកញ្ញា របស់ប្រធានាធិបតីអាមេរិក លោក រី យ៉ុងហូ បានព្រមានវិញថា៖ «សំណួរថានរណានឹងមិនអាចមានមុខបានយូរ នឹងត្រូវឆ្លើយនៅពេលនោះតែម្ដង»។ ជាមួយការគំរាមបាញ់យន្តហោះអាមេរិក ក្ដីបារម្ភជុំវិញការរីករាលដាលជម្លោះបានកើនឡើងខ្លាំង ដ្បិតយន្តហោះអាមេរិកហោះតែក្នុងដែនអាកាសអន្តរជាតិប៉ុណ្ណោះ ហើយក៏មិនដែលឆ្លងចូលដែនអធិបតេយ្យកូរ៉េខាងជើងដែរ។
ទាក់ទងសម្ដីចោទប្រកាន់របស់រដ្ឋមន្ត្រីការបរទេសកូរ៉េខាងជើង សេតវិមានអាមេរិកក៏ចេញមុខបដិសេធផងដែរ។ អ្នកនាំពាក្យសេតវិមាន Sarah Sanders ចាត់ទុកពាក្យចោទប្រកាន់ទាំងនេះ ជារឿងមិនសមហេតុផលទាល់តែសោះ ហើយអាមេរិកក៏មិនដែលប្រកាសសង្គ្រាមអ្វីដែរ។ លើសពីនេះ ក្រសួងការពារជាតិអាមេរិកក៏ប្រាប់ឲ្យកូរ៉េខាងជើងឈប់ធ្វើសកម្មបង្ករឿង ព្រោះអាចធ្វើឲ្យបញ្ហារាលដាលធំឡើង ពិបាកគ្រប់គ្រង៕
Tag:
កូរ៉េខាងជើង
អាមេរិក
Ri Yong-ho
© រក្សាសិទ្ធិដោយ thmeythmey.com