ជាតិ
នយោបាយជាតិ
សម្ដេច ហ៊ុន សែន ប្រាប់ឲ្យអាមេរិកយកគ្រាប់បែកគីមី២គ្រាប់ចេញពីកម្ពុជា
× ភ្នំពេញ៖សម្ដេចនាយករដ្ឋមន្ត្រី ហ៊ុន សែន ស្នើឲ្យអគ្គរដ្ឋទូតអាមេរិកប្រចាំកម្ពុជាលោក William Hiedt ទៅទស្សនកិច្ចមើលគ្រាប់បែកគីមីចំនួន២គ្រាប់ របស់អាមេរិកដែលបានទម្លាក់មកលើទឹកដីកម្ពុជា ក្នុងអំឡុងពេលសង្គ្រាមទស្សវត្ស១៩៧០ ហើយត្រូវបានអាជ្ញាធររកឃើញកាលពីពេលថ្មីៗនេះនៅក្នុងទឹកដីខេត្តស្វាយរៀង។ ថ្លែងក្នុងពិធីជួពសំណេះសំណាលជាមួយកម្មកររោងចក្រ១ម៉ឺននាក់ នៅព្រឹកថ្ងៃទី ២៧ កញ្ញានេះ សម្ដេច ហ៊ុន សែន ស្នើឲ្យអាមេរិករកដំណោះស្រាយយកគ្រាប់បែកគីមីនេះ ចេញពីប្រទេសកម្ពុជា ដើម្បីកុំឲ្យបង្កភាពភ័យខ្លាចដល់ប្រជាជន។
ប្រមុខរដ្ឋាភិបាល បានលើកឡើងដូច្នេះថា៖«គ្រាប់បែកគីមីឯកឧត្តមអគ្គរដ្ឋទូតអាមេរិកសូមអញ្ជើញទៅមើលផង ហើយថាគួរធ្វើយ៉ាងម៉េច។នេះជាការទទួលខុសត្រូវរបស់អាមេរិកមិនអាចប្រលែងចោលបានទេ…។ គ្រាប់គីមីនេះឥឡូវយើងត្រូវធ្វើយ៉ាងម៉េច បើទុកវានៅបែបនេះក្មេងវាខ្លាច តែបើបំផ្លាញវាជាតិគីមីនេះវាសាយភាយ ដូច្នេះជួយយកទៅស្រុក(អាមេរិក)វិញផង ឬយកទៅបំផ្លាញចោលនៅសមុទ្រឯណាទៅ តែយកយន្តហោះអាមេរិកមកដឹកណា»។
គួរបញ្ជាក់ថា អាមេរិកបានទម្លាក់គ្រាប់បែកប្រមាណ ២លាន ៧សែនគ្រាប់ ក្នុងអំឡុងសង្គ្រាមនាទសវត្សរ៍១៩៧០ រវាងកងទ័ពសាធារណៈរដ្ឋកម្ពុជា ដែលគាំទ្រដោយសហរដ្ឋអាមេរិក និងកងទ័ពតស៊ូរបស់ខ្មែរក្រហម ក្រោយពេលពួកគេធ្វើរដ្ឋប្រហារទម្លាក់សម្តេច នរោត្តម សីហនុ នាថ្ងៃទី១៨ ខែមីនា ឆ្នាំ១៩៧០៕
Tag:
ហ៊ុន សែន
អាមេរិក
គ្រាប់បែក
© រក្សាសិទ្ធិដោយ thmeythmey.com