សមត្ថកិច្ច បិទសិប្បកម្មផលិតគុយទាវ២កន្លែងនៅស្រុកពួក ក្រោយរកឃើញថា មានប្រើសារធាតុគីមី

ជាតិ

សង្គមជាតិ

សុខភាព

សមត្ថកិច្ច បិទសិប្បកម្មផលិតគុយទាវ២កន្លែងនៅស្រុកពួក ក្រោយរកឃើញថា មានប្រើសារធាតុគីមី

28, Sep 2017 , 7:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ទីតាំងសិប្បកម្មផលិតគុយទាវលក្ខណៈគ្រួសារចំនួន២កន្លែង ត្រូវបានបិទទ្វារ ក្រោយសមត្ថកិច្ចរកឃើញថា មានប្រើប្រាស់សារធាតុគីមី ដែលបង្កឲ្យប៉ះពាល់ដល់សុខភាពអ្នកបរិភោគ។

មន្ត្រីកាំកុងត្រួលខេត្ត និងអាកាសយានដ្ឋានអន្តរជាតិសៀមរាប សហការជាមួយមន្ទីរ ពាណិជ្ជកម្ម និងឧស្សាហកម្ម បានចុះត្រួតពិនិត្យ និងផ្សព្វផ្សាយពីគុណភាពចំណីអាហារ ដល់ពលរដ្ឋនៅក្នុងខេត្តសៀមរាប។ កាលពីថ្ងៃទី២៦ កញ្ញា ឆ្នាំ២០១៧ ក្រុមការងារបានចុះទៅ ដល់ទីតាំងសិប្បកម្មផលិតគុយទាវនៅស្រុកពួក និងបានបិទទីតាំង២ ក្រោយរកឃើញថា បានប្រើប្រាស់សារធាតុគីមី បូរ៉ាក់។

លោក ង៉ែត ចេក ប្រធានកាំកុងត្រូលសាខាខេត្តសៀមរាបបានឲ្យដឹងថា ម្ចាស់អាជីវកម្មផលិតសរសៃគុយទាវទាំង២ទីតាំងនោះ ទី១ ឈ្មោះ ប៊ុន អាំងអួ មានទីលំនៅក្នុងភូមិ គោកស្រុក ឃុំពួក និងទី២ ឈ្មោះ ឡាយ គុយ រស់នៅភូមិអូរតាប្រាក់ ឃុំពួក ស្រុកពួក ខេត្តសៀមរាប។

តាមការបញ្ជាក់ពីប្រធានកាំកុងត្រួលខេត្ត ក្រោយរកឃើញថាមានសរសៃគុយទាវកំពុងដាក់ លក់ក្នុងផ្សារពួក មន្ត្រីជំនាញក៏បានចុះដល់ទីតាំងផ្ទាល់ និងបានរកឃើញថា ម្ចាស់អាជីវកម្ម ខាងលើបានប្រើប្រាស់ម្សៅអង្ករកិនផ្ទុកសារធាតុបូរ៉ាក់ចំនួន ៧២គីឡួក្រាម អង្ករត្រាំសារធាតុ គីមីបូរ៉ាក់ ចំនួន៥០គីឡូក្រាម សារធាតុបូរ៉ាក់ជាង ១៧គីឡូក្រាម សរសៃគុយទាវមានសារធាតុ បូរ៉ាក់ជាង ១៥៤គីឡូក្រាម។