ជាតិ
សេដ្ឋកិច្ច
ផ្សារលក់ផលិតផលខ្មែរក្នុងខេត្តកំពត ត្រូវបានសម្ពោធ
×
ភ្នំពេញ៖ ផ្សារលក់ផលិតផលខ្មែរ ពិសេសផលិតផលសមុទ្រមួយកន្លែង ដែលស្ថិតក្នុងក្រុងកំពត ខេត្តកំពត ត្រូវបានដាក់ឲ្យដំណើរការ នៅថ្ងៃទី២៩ខែកញ្ញា។
ផ្សារនេះឈ្នោះថា ផ្សារង៉ូវហេង ដែលត្រូវបានចាត់ទុកថាជាផ្សាររួមរបស់សម្ព័ន្ធសមាគមជលផលសមុទ្រកម្ពុជា។ ផ្សារនេះស្ថិតក្រោមគម្រោងជលផលសមុទ្រនៃកម្មវិធីពិពិធកម្មរបស់ក្រសួងពាណិជ្ជកម្ម ដែលសហការជាមួយអង្គការសហប្រជាជាតិអភិវឌ្ឍន៍ឧស្សាហកម្ម (UNIDO) រួមទាំងផ្នែកឯកជន។
លោក ចាន់ ស៊ីថា ប្រធានក្រុមហ៊ុន ង៉ូវ ហេង បានថ្លែងប្រាប់សារព័ត៌មានថ្មីៗថា ផ្សារនេះត្រូវបានបង្កើតឡើងដោយចំណាយទឹកប្រាក់ប្រមាណ ៥ម៉ឺនដុល្លារ ហើយក្រុមហ៊ុនលោកជាអ្នកគ្រប់គ្រង។ លោកបន្ថែមថា ផ្សារទ្រង់ទ្រាយតូចមួយនេះ នឹងក្លាយជាកន្លែងប្រមូលផ្ដុំផលិតផលសមុទ្រក្នុងខេត្តកំពត ផលិតផលអត្តសញ្ញណដូចជា ម្រេចកំពត ទុរេន និងផលិតផលខ្មែរផ្សេងៗទៀត ដែលនឹងផ្ដល់ភាពងាយស្រួលដល់កសិករ និងអ្នកទិញ។ លោក ចាន់ ស៊ីថា បញ្ជាក់ថា ផ្សារនេះនឹងប្រមូលផ្ដុំតែផលិតផលដែលមានការត្រួតពិនិត្យគុណភាពត្រឹមត្រូវប៉ុណ្ណោះ៕
© រក្សាសិទ្ធិដោយ thmeythmey.com