ជាតិ
សេដ្ឋកិច្ច
មន្ទីរកសិកម្មខេត្តក្រចេះ ប្រកាសទិញ«ខ្យងស៊ីស្រូវ» ពីកសិករ ដើម្បីដុតចោល
× មន្ទីរកសិកម្មខេត្តក្រចេះ បានប្រកាសទិញ«ខ្យងមាស» ឬ«ខ្យងស៊ីស្រូវ» ដែលស៊ីបំផ្លាញដំណាំស្រូវរបស់ប្រជាកសិករស្ទើរគ្រប់តំបន់ ក្នុងមួយគីឡូក្រាម២០០រៀលពីកសិករ។ ប្រធានមន្ទីរកកសិកកម្មខេត្តក្រចេះដដែល បញ្ជាក់ថាខ្យងដែលប្រមូលទិញបាន នឹងយកទៅដុតចោល។
«ខ្យងស៊ីស្រូវ»ឬ«ខ្យងមាស» ជាខ្យងដែលស៊ីបំផ្លាញដំណាំស្រូវរបស់កសិករនៅស្ទើរគ្រប់តំបន់។ ខ្យងប្រភេទនេះ អាចស៊ីបំផ្លាញដំណាំស្រូវយ៉ាងធ្ងន់ធ្ងរចាប់ពីពេលសាបព្រោះ រហូតដល់ស្រូវបែកគុម្ព ហើយវាក៏ធ្វើឲ្យស្រូវលូតលាស់មិនល្អ កសិករខាតបង់ចំណូលដោយសារទិន្នផលស្រូវថយចុះដែរ។
ដើម្បីគ្រប់គ្រង និងកម្ចាត់សត្វខ្យងស៊ីបំផ្លាញដំណាំស្រូវឲ្យមានប្រសិទ្ធភាព មន្ទីរកសិកម្ម រុក្ខាប្រមាញ់ និងនេសាទខេត្តក្រចេះ ប្រកាសប្រមូលទិញសត្វខ្យងមាសនេះ ពីប្រជាកសិករក្នុងមួយគីឡូក្រាម តម្លៃ២០០រៀលចាប់ពីថ្ងៃទី៣តុលា ដល់ថ្ងៃទី១៥ ខែតុលា។ លោក គុយ ហួត ប្រធានមន្ទីរសុខាភិបាលក្រចេះ បញ្ជាក់បន្ថែមប្រាប់សារព័ត៌មាន thmeythmey.com តាមទូរសព្ទថាការប្រមូលទិញនេះ គឺជាការលើកទឹកចិត្តដល់ប្រជាកសិករ និងក៏ដូចជាការជំរុញការចូលរួមរបស់ពួកគាត់ក្នុងការកម្ចាត់សត្វខ្យងស៊ីបំផ្លាញដំណាំស្រូវនេះ។
វិធានការនេះ មិនមែនធ្វើតែនៅក្នុងខេត្តក្រចេះមួយឡើយ ក្រសួងកសិកម្ម រុក្ខាប្រមាញ់ និងនេសាទ ក៏បានដាក់បញ្ជាឲ្យគ្រប់មន្ទីរកសិកម្មខេត្តទាំងអស់ គ្រប់គ្រង និងកម្ចាត់ខ្យងស៊ីបំផ្លាញដំណាំស្រូវនេះដែរ។ លោករដ្ឋមន្ត្រី វេង សាខុន ថ្លែងប្រាប់សារព័ត៌មាន thmeythmey.com ដូច្នេះ៖«យើងបានឲ្យគ្រប់មន្ទីរទាំងអស់ចាត់វិធានការលើបញ្ហានេះ ដើម្បីបន្ថយផលប៉ះពាល់ដំណាំស្រូវរបស់កសិករយើងពីខ្យងនេះ»។
តែយ៉ាងណាក៏ដោយ លោក វេង សាខុន ក៏លើកឡើងពីបញ្ហាលំបាកក្នុងកម្ចាត់ចោលទាំងស្រុង«ខ្យងស៊ីស្រូវ»នេះដែរថា ដោយសារឆ្នាំនេះមានទឹកដក់ច្រើន ហើយកសិករអាចចាប់ពួកវាមិនអស់ ខណៈដែលខ្យងប្រភេទនេះ ក៏មានពង និងកូនច្រើនផងដែរនោះ។ យ៉ាងណាក៏ដោយ លោករដ្ឋមន្ត្រីសង្ឃឹមថា វិធានការខាងលើនេះ នឹងជួយកាត់បន្ថយវត្តមានសត្វខ្យងស៊ីបំផ្លាញដំណាំស្រូវនេះបានមួយចំនួនធំ និងរួមចំណែករក្សាបានទិន្នផលស្រូវខ្ពស់របស់ប្រជាកសិករ៕
Tag:
ខ្យង
ស្រូវ
កសិកម្ម
វេង សាខុន
គុយ ហួត
© រក្សាសិទ្ធិដោយ thmeythmey.com