កម្ពុជានាំចេញស្វាក្តាម ទៅក្រៅប្រទេស ៣ទៅ៥ពាន់ក្បាលក្នុងមួយឆ្នាំ

ជាតិ

កម្ពុជានាំចេញស្វាក្តាម ទៅក្រៅប្រទេស ៣ទៅ៥ពាន់ក្បាលក្នុងមួយឆ្នាំ

05, Oct 2017 , 5:34 pm

រូបភាព

ដោយ:

ភ្នំពេញ៖ ចាប់តាំងពីឆ្នាំ២០១០មក កម្ពុជាបាននាំចេញសត្វស្វាក្តាម ទៅក្រៅប្រទេស ជាមធ្យមពី៣ពាន់ក្បាលទៅ៥ពាន់ក្បាលក្នុងមួយឆ្នាំ។ នេះបើតាមទំព័រហ្វេសប៊ុកផ្លូវការក្រសួងកសិកម្ម ដែលបានផ្សព្វផ្សាយនៅថ្ងៃទី៥ ខែតុលានេះ។



នៅកម្ពុជាមានកសិដ្ឋាន៧សម្រាប់ចិញ្ចឹម និងបង្កាត់ពូជស្វាក្តាម ដើម្បីនាំចេញទៅក្រៅប្រទេស ដូចជាសហរដ្ឋអាមេរិក ចិន ជប៉ុន សិង្ហបុរី កូរ៉េខាងត្បូង និងអូស្ត្រាលី ដែលមានចំនួនសរុប ៤០៤២០ក្បាលហើយ ។ បច្ចុប្បន្ន កសិដ្ឋានទាំង៧ មានស្វាក្តាមចំនួន ៥៤ ៥០០ក្បាល។ សត្វស្វាក្តាម គឺជាប្រភេទសត្វ ដែលចូលចិត្តរស់នៅជាហ្វូងតាមតំបន់ព្រៃលិចទឹក តំបន់ព្រៃភ្នំ តំបន់ព្រៃកោងកាង តាមឆ្នេរសមុទ្រ និងតំបន់កសិកម្ម។ ហើយពួកវា ត្រូវបាននាំចេញដោយក្រុមហ៊ុន Shin Nippon Biomedical Laboratories(SNBL) ដើម្បីសិក្សាស្រាវជ្រាវផ្នែកឱសថមនុស្ស និងសត្វ។ នេះបើតាមក្រសួងកសិកម្ម។

ទាក់ទងនឹងការនាំចេញសត្វស្វាក្តាមទៅក្រៅប្រទេស លោក សេង ទៀក ប្រធានមូលនិធិពិភពលោកដើម្បីធម្មជាតិ(WWF) បានបង្ហាញការបារម្ភចំពោះការចាប់សត្វស្វាក្តាមព្រៃមកចូលក្នុងកសិដ្ឋាន និងស្នើឲ្យ ក្រសួងពាក់ព័ន្ធមានយន្តការច្បាស់លាស់ក្នុងការតាមដាន និងត្រួតពិនិត្យការធ្វើអាជីវកម្មនេះ ពីព្រោះវាអាចប៉ះពាល់ដល់ការរស់នៅរបស់ពួកសត្វស្វាក្ដាម។ បើតាមលោក សេង ទៀក កាលពីឆ្នាំ២០១០ មានពលរដ្ឋជាច្រើន បានរត់ចូលព្រៃចាប់ស្វាក្តាមព្រៃលក់ឲ្យក្រុមហ៊ុន រហូតដល់ក្រសួងកសិកម្មប្រកាសបញ្ឈប់ការទិញស្វាក្តាមព្រៃចូលក្នុងកសិដ្ឋាន។

លោកបញ្ជាក់យ៉ាងដូច្នេះថា៖«ខ្ញុំបារម្ភថា កសិដ្ឋានមានតែឈ្មោះ តែនាំស្វាក្តាមព្រៃចូលកសិដ្ឋាន រួចធ្វើការនាំចេញលក់នៅក្រៅប្រទេស ព្រោះពេលតម្រូវការកាន់តែខ្ពស់ ហើយកសិដ្ឋានផលិតមិនទាន់ទីផ្សារ នោះអាចនឹងមានការទិញស្វាក្តាមព្រៃចូលកសិកដ្ឋាន»។ លោកស្នើឲ្យរដ្ឋាភិបាលគួរមានយន្តការច្បាស់លាស់ក្នុងតាមដាន និងត្រួតពិនិត្យចំពោះអាជីវកម្មមួយនេះ ដើម្បីការពារសត្វស្វាក្តាមព្រៃនៅកម្ពុជា កុំឲ្យបាត់បង់ដូចសត្វដទៃទៀត។

បើតាមលទ្ធផលស្រាវជ្រាវរបស់រដ្ឋបាលព្រៃឈើនៅឆ្នាំ២០០៩ សត្វស្វាក្តាមនៅកម្ពុជាមាននៅទូទាំងប្រទេស ដែលជាមធ្យម២គីឡូម៉ែត្រក្រឡាមានសត្វស្វាក្តាម៣០ក្បាល។ នៅឆ្នាំ ២០០៣ ក្រសួងកសិកម្ម បានអនុញ្ញាត ឱ្យមានការបង្កើតកសិដ្ឋានចិញ្ចឹម និងបង្កាត់ពូជស្វាក្តាមសម្រាប់ធ្វើការនាំចេញ។

ប្រកាសរបស់រដ្ឋាភិបាលនៅឆ្នាំ២០០៧ ស្តីពីចំណាត់ថ្នាក់ និងបញ្ជីឈ្មោះសត្វព្រៃបានបង្ហាញថា សត្វស្វាក្តាម (Scientific Name: Macaca fascicularis) ជាប្រភេទសត្វមានបង្គួរ និង មិនខ្លាចទឹក ហើយពួកវារស់នៅជាហ្វូងធំរហូតដល់ទៅ១០០ក្បាល។

បើតាមទំព័រហ្វេសប៊ុកក្រសួងដដែល ស្វាក្តាមមានវត្តមានស្ទើរតែទូទាំងតំបន់នៃប្រទេសកម្ពុជា និងបណ្តាប្រទេសនានានៃភូមិភាគអាស៊ីអាគ្នេយ៍រួមមាន៖ ប្រទេសថៃ ម៉ាឡេស៊ី ហ្វីលីពីន និងកោះសូម៉ាត្រា។ គិតត្រឹមខែកញ្ញា ឆ្នាំ២០១៧ សត្វស្វាក្តាមនៅតាមបណ្តាកសិដ្ឋានទាំងអស់មានចំនួនសរុប៥៤ ៥០០ក្បាល ក្នុងនោះកូនកើតក្នុងរយៈពេល៩ខែឆ្នាំ២០១៧ មានចំនួន៨១៥៤ក្បាល៕