លោក ហ៊ុន ម៉ាណែត ប្រាប់ឲ្យបេក្ខជនដែលចូលបម្រើកងទ័ពរាយការណ៍ បើមានករណីទារប្រាក់ជាថ្នូរនឹងការងារ

ជាតិ

លោក ហ៊ុន ម៉ាណែត ប្រាប់ឲ្យបេក្ខជនដែលចូលបម្រើកងទ័ពរាយការណ៍ បើមានករណីទារប្រាក់ជាថ្នូរនឹងការងារ

08, Oct 2017 , 1:59 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ខណៈដែលក្រសួងការពារ ប្រកាសជ្រើសរើសពលទាហានជាច្រើននាក់ ដើម្បីចូលបម្រើការងារក្របខណ្ឌភូមិភាគទី១ នៃកងទ័ពជើងគោកនោះ កូនប្រុសច្បងនាយករដ្ឋមន្ត្រី គឺលោក ហ៊ុន ម៉ាណែត បានប្រាប់ឲ្យបេក្ខជនទាំងអស់ ត្រូវរាយការណ៍ពីករណីអំពើពុករលួយ បើសិនមានការទារប្រាក់ជាថ្នូរនឹងការងារនេះ។

លោក ហ៊ុន ម៉ាណែត នាយរងសេនាធិការចំរុះ នៃកងយោធពលខេមរភូមិន្ទ និង ជាមេបញ្ជាការរងកងទ័ពជើងគោក បានបង្ហោះសារមួយដោយអមជាមួយនឹងលិខិតរបស់ក្រសួងការពារលើហ្វេសប៊ុកខ្លួនយ៉ាងដូច្នេះថា បើសាធារណៈជន បានដឹងពីព័ត៌មានទាក់ទងនឹងការឆ្លៀតឱកាសប្រព្រឹត្តអំពើមិនប្រក្រតីនៃការជ្រើសរើសពលទាហាននេះ ត្រូវរាយការណ៍មកគណៈកម្មាធិការជ្រើសរើសពលទាហានភ្លាម តាមរយៈប្រព័ន្ធទូរសព្ទ៦ខ្សែ ដើម្បីចាត់វិធានការលើជនខិលខូចតាមផ្លូវច្បាប់។

លោក ហ៊ុន ម៉ាណែត បន្តថា ការរាយការណ៍ពីភាពមិនប្រក្រតីនៃការជ្រើសរើសពលទាហាននេះ គឺដើម្បីទប់ស្កាតអំពើអសកម្ម ដែលអាចបង្កឡើងដោយបុគ្គលមួយចំនួន ឆ្លៀតឱកាសកេងចំណេញប្រមូលលុយកាក់ផ្សេងៗ ប្រាស់ចាកគោលនយោបាយកំណត់របស់រដ្ឋាភិបាល និងក្រសួងការពារជាតិ។

សូមបញ្ជាក់ថា គណៈកម្មការជ្រើសរើសពលទាហានបំពេញក្របខ័ណ្ឌអោយយោធភូមិភាគទី១ បានចាត់វិធានការចំពោះបុគ្គលឆ្លៀតឱកាសមួយចំនួនរួចហើយ ក្រោយពីបានទទួលបណ្តឹងពីបេក្ខជន ដែលបានរងគ្រោះដោយការទារប្រាក់ សម្រាប់ជាថ្នូរនឹងការដាក់ពាក្យសុំចូលបម្រើការងារកងទ័ពនេះ ព្រោះវាផ្ទុយពីគោលការណ៏របស់រាជរដ្ឋាភិបាល។ បច្ចុប្បន្ន បុគ្គលដែលបានប្រព្រឹត្តិខុសទាំងនោះ ត្រូវបានឃាត់ខ្លួននិងបញ្ជូនទៅតុលាការដើម្បីអនុវត្តតាមនិតិវិធីច្បាប់។ នេះបើតាមហ្វេសប៊ុកលោក ហ៊ុន ម៉ាណែត៕

លេខទូរសព្ទសម្រាប់ទាក់ទងគណៈកម្មាធិការជ្រើសរើសពលទាហាន៖ ០៨៥ ៣៣៣៩៤៤ , ០៨៥ ២២២៧៤៤ ,០៩៧ ២៦៦៦២៤១ ,០៩៧ ២៦៦៦២៤០ , ០៨៦ ៨៤៧៣០០ និង ០៨៦ ៦៨៥៥៧០។