ជាតិ
សេដ្ឋកិច្ច
អ្នកជំនាញកសិកម្ម ជំរុញការដាំ«ផ្លែផាស៊ិន ឬក្រូចវល្លិ» ខណៈមានការនាំចូលច្រើន
× ភ្នំពេញ៖ អតីតប្រធានអង្គការសេដាក លោក យ៉ង សាំងកុមារ បានជំរុញការដាំដុះដំណាំផ្លែផាស៊ិន ឬក្រូចវល្លិ នៅកម្ពុជា ខណៈមានការនាំចូលច្រើន ដើម្បីផ្គត់ផ្គង់តម្រូវការក្នុងស្រុក។
លោក យ៉ង សាំងកុមារ ចង់ឲ្យពលរដ្ឋស្គាល់ផ្លែផាស៊ិននេះឲ្យទូលំទូលាយ ព្រោះផ្លែនេះមានអត្ថប្រយោជន៍ដល់សុខភាព ងាយស្រួលដាំ និងមានតម្រូវការនៅទីក្រុង។ លោកថ្លែងប្រាប់សារព័ត៌មានថ្មីៗយ៉ាងដូច្នេះថា៖«ខ្ញុំយល់ថាផាស៊ិនជាផ្លែល្អសម្រាប់បរិភោគ។ ខ្ញុំចង់ឲ្យពលរដ្ឋចាប់អារម្មណ៍ដាំផ្លែនេះ ព្រោះកន្លងមកភាគច្រើនអត់មានអ្នកស្គាល់ ឬអ្នកស្គាល់ហើយតែមិន បរិភោគ»។
លោកប្រាប់ថា ផាស៊ិនជាដំណាំមានសក្ដានុពល។ «ដំណាំនេះងាយស្រូលដាំ ឲ្យទិន្នផលខ្ពស់ ដាំត្រឹម ៧ខែឬ៨ខែ អាចប្រមូលផល ហើយតម្លៃទីផ្សារក៏គ្រាន់បើដែរ»។ លោក យ៉ង សាំងកុមារ ថ្លែងដូចនេះ។
ចំពោះតម្រូវការទីផ្សារសម្រាប់ផ្លែប្រភេទនេះ លោក យ៉ង សាំងកុមារ ឲ្យដឹងថា ផ្លែនេះមិននិយមនៅជនបទ តែមានតម្រូវការនៅទីក្រុង។ លោកលើកឡើងដូចនេះថា៖«ទីមួយ ពលរដ្ឋអត់សូវចេះហូប បើមានអ្នកបរិភោគផ្លែនេះច្រើន បានមានតម្រូវការច្រើន។ ទីពីរ គឺមានអ្នកចាប់ផ្ដើមចេះបរិភោគកាន់តែច្រើនឡើងដែរ ពិសេសនៅតាមទីក្រុង»។ លោកបន្ថែមថា តម្រូវការទីផ្សារផ្លែនេះអាចឆ្លុះបញ្ចាំងតាមរយៈការនាំចូល។
អ្នកជំនាញកសិកម្មរូបនេះ បន្តថា ការផ្គត់ផ្គង់ផ្លែនេះសព្វថ្ងៃ គឺភាគច្រើនទទួលបានពីខេត្តមណ្ឌលគិរី និងក្រៅប្រទេស។ លោកបានលើកឡើងពីការអង្កេតមិនផ្លូវការមួយដែលបង្ហាញថា ផ្លែផាស៊ិននេះត្រូវបាននាំចូលច្រើនពីប្រទេសវៀតណាម តាមច្រកព្រំដែននៅខេត្តមណ្ឌលគិរី ដោយក្នុងមួយខែប្រមាណ ១០០តោន។
បើដាំផ្លែនេះដើម្បីផ្គត់ផ្គង់ទីផ្សារ លោក យ៉ង សាំងកុមារ ផ្ដល់យោបល់ថា កសិករត្រូវចងគ្នាជាសហគមន៍ និងមានការជួយជ្រុមជ្រែងពីស្ថាប័នរដ្ឋ។ ផ្លែផាស៊ិននេះ ត្រូវបានគេបរិភោគឆៅ ឬធ្វើជាភេសជ្ជ។
លោក សម វិទូ ប្រធានអង្គការសេដាក បានថ្លែងថា អង្គការរបស់លោកបានដាក់ប្រភេទផ្លែផាស៊ិននេះក្នុងគម្រោងមួយផងដែរ ដែលសេដាកកំពុងចងក្រងកសិករដើម្បីអនុវត្ត។ ប៉ុន្តែលោកបញ្ជាក់ថា រហូតដល់ចុងឆ្នាំនេះ ទើបសេដាកមានរបាយការណ៍ទាក់ទងនឹងតម្រូវការ និងការដាំដុះផ្លែឈើនេះ។
បើតាមម្ចាស់ហាងលក់កាហ្វេតូចៗ ដែលមានលក់ភេសជ្ជផាស៊ិននេះផងដែរនោះ ផ្លែផាស៊ិនរៀតណាម មានតម្លៃ ៤ ទៅ៥ពាន់រៀលក្នុងមួយគីឡូក្រាម រីឯផាស៊ិនខ្មែរ សម្រាប់រដូវសម្បូរតម្លៃប្រហាក់ប្រហែលនេះដែរ តែសម្រាប់ពេលខ្សត់ ផ្លែនេះត្រូវបានលក់ថ្លៃជាងច្រើន។ អ្នកលក់ទាំងនោះអះអាងថា ដោយសារតែតម្លៃ និងភាពសម្បូរ ពួកគេទិញផ្លែផាស៊ិនវៀតណាម៕
Tag:
ផាស៊ិន
យ៉ង សាំងកុមារ
© រក្សាសិទ្ធិដោយ thmeythmey.com