កីឡាអន្តរជាតិ
អន្តរជាតិ
World Cup៖ កូស្តារីកា អេហ្ស៊ីប នីហ្សេរីយ៉ា និងប៉ូឡូញ បានកៅអីទៅរុស្ស៊ី
× រកឃើញប្រទេសចំនួន៤ទៀតហើយដែលអាចឈានទៅប្រកួតវគ្គផ្តាច់ព្រ័ត្រ FIFA World Cup នៅរុស្ស៊ីឆ្នាំក្រោយរួមមាន កូស្តារីកា អេហ្ស៊ីប នីហ្សេរីយ៉ា និងប៉ូឡូញ ស្របពេល បារាំង ស៊ុយអែត និងហូឡង់ត្រូវប្រជែងគ្នាខ្លាំងនៅក្នុងការប្រកួតចុងក្រោយរៀងខ្លួនដើម្បីបានកៅអីដោយស្វ័យប្រវត្តិ និងបន្តទៅវគ្គជម្រុះ (Play-off)។
ក្រុមកីឡាបាល់ទាត់ជម្រើសជាតិកូស្តារីកា អាចមានកៅអីទៅ World Cup ឆ្នាំក្រោយដោយស្វ័យប្រវត្តិ ក្រោយរកបាន១៦ពិន្ទុពីការប្រកួត៩លើកចុងក្រោយ ស្ថិតក្នុងចំណាត់ថ្នាក់លេខ២ក្នុងតារាងនៃវគ្គជម្រុះតំបន់ការ៉ាអីប (Concacaf) លើសហរដ្ឋអាមេរិកដែលឈរលេខបីចំនួន ៤ពិន្ទុ។ សហរដ្ឋអាមេរិក ប៉ាណាម៉ា និងហុងឌូរ៉ាស កំពុងមានពិន្ទុប្រដេញគ្នា និងត្រូវកាត់សេចក្តីក្នុងការប្រកួតចុងក្រោយដើម្បីបន្តទៅវគ្គផ្តាច់ព្រ័ត្រ។ ការប្រកួតជម្រុះក្នុងទ្វីបនេះក្រុមចាប់ពីចំណាត់ថ្នាក់លេខ១ដល់លេខ៣អាចឈានទៅរុស្ស៊ីបាន ហើយលេខ៤ត្រូវប្រកួតជម្រុះ (Play-off) ជាមួយក្រុមពីទ្វីបផ្សេងបន្តទៀត។
ចំណែកអេហ្ស៊ីបដែលស្ថិតនៅកំពូលតារាងក្នុងវគ្គជម្រុះពូល E ទ្វីបអាហ្វ្រិកក៏អាចឈានទៅព្រឹត្តិការណ៍បាល់ទាត់ពិភពលោកឆ្នាំ២០១៨ដែរ ក្រោយយកឈ្នះកុងហ្គោ១-០ មាន១២ពិន្ទុលើសក្រុមលេខពីរ ៤ពិន្ទខណៈនៅសល់១ប្រកួតប៉ុណ្ណោះ។ រីឯនីហ្សេរីយ៉ាដែលស្ថិតនៅពូល B ក្នុងទ្វីបនេះក៏បានកក់កៅអីទៅរុស្ស៊ីជាមួយអេហ្ស៊ីបដែរ ក្រោយរកបានពិន្ទុនាំមុខដាច់ក្រុមលេខពីររហូតដល់៦ពិន្ទុ។
សម្រាប់ក្រុមមកពីតំបន់អឺរ៉ុប ក្នុងវគ្គជម្រុះពូល E ប៉ូឡូញក្រោយយកឈ្នះម៉ុងតេណេក្រូ ៤-២ អាចមានវត្តមាននៅ World Cup 2018 ដែរ បន្ទាប់ពីមានពិន្ទដាច់ក្រុមលេខ២ ដាណឺម៉ាក ៥ពិន្ទុ។
សម្រាប់ពូល A ក្នុងតំបន់អឺរ៉ុបឯណោះវិញ ក្រុមមាន់គកបារាំងស្ថិតនៅកំពូលតារាងមាន២០ពិន្ទុ តាមពីក្រោយដោយក្រុមលេខ២ស៊ុយអែតមាន១៩ពិន្ទុ និងហូឡង់នៅលេខប៣មាន ១៦ពិន្ទុកំពុងប្រទាញប្រទុងគ្នាដើម្បីប្រជែងយកកៅអីទៅរុស្ស៊ីដោយស្វ័យប្រវត្តិ ប៉ុន្តែហូឡង់ត្រូវប្រជែងជាមួយ ស៊ុយអែតដើម្បីបានកៅអីបន្តទៅវគ្គ Play-off។
សូមបញ្ជាក់ថា ក្នុងវគ្គជម្រុះនៅទ្វីបអឺរ៉ុបនេះ ក្រុមដែលមានចំណាត់ថ្នាក់លេខ១ក្នុងតារាងអាចឈានទៅប្រកួតពានរង្វាន់កីឡាបាល់ទាត់ពិភពលោកនៅប្រទេសរុស្ស៊ីឆ្នាំ២០១៨ដោយស្វ័យប្រវត្តិ ហើយក្រុមដែលបានចំណាត់ថ្នាក់ទី២ត្រូវប្រកួតជម្រុះបន្តទៀត។
ក្រៅពីម្ចាស់ផ្ទះរុស្ស៊ី មានប្រទេសចំនួន១៤ហើយដែលបានកៅអីទៅ World Cup រួមមាន ប្រេស៊ីល អាល្លឺម៉ង់ បែលហស្ស៊ិក កូស្តារីកា អង់គ្លេស អេហ្ស៊ីប អ៊ីរ៉ង់ ជប៉ុន ម៉ិកស៊ិក នេហ្សេរីយ៉ា ប៉ូឡូញ អារ៉ាបីសាអូឌីត កូរ៉េខាងត្បូង និងអេស្ប៉ាញ៕
Tag:
បាល់ទាត់
FIFA World Cup
© រក្សាសិទ្ធិដោយ thmeythmey.com