សម្ដេច ហ៊ុន សែន៖«កម្រិតប៉ុនខ្ញុំនេះ បានត្រឹមតែ១០ភាគរយ នៃសម្ដេចព្រះបរមរតនកោដ្ឋ»

ជាតិ

សម្ដេច ហ៊ុន សែន៖«កម្រិតប៉ុនខ្ញុំនេះ បានត្រឹមតែ១០ភាគរយ នៃសម្ដេចព្រះបរមរតនកោដ្ឋ»

10, Oct 2017 , 9:44 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេចនាយករដ្ឋមន្ត្រី បានបន្ទោសមន្ត្រីម្នាក់ដែលទទួលខុសត្រូវរៀបចំកម្មវិធីរបស់រដ្ឋាភិបាល នៅព្រឹកថ្ងៃទី១០ តុលានេះ។ សម្ដេច ហ៊ុន សែន ហាក់មិនពេញចិត្តចំពោះមន្ត្រីរូបនោះឡើយ ដោយសារតែរូបគេខ្វះការប្រុងប្រយ័ត្នក្នុងការរៀបចំកម្មវិធី ដែលបង្កឲ្យមានភាពរអាក់រអួលបន្តិចបន្តួច មុនពេលចាប់ផ្ដើមកម្មវិធី ។ បញ្ហាដែលសម្ដេច មិនពេញចិត្តនោះគឺការរអាក់រអួលនៃការចាក់ភ្លេងគោរពទង់ជាតិ។

ថ្លែងក្នុងពិធីប្រកាសផ្សព្វផ្សាយ និងដាក់អោយអនុវត្តគោលនយោបាយជាតិស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ ឆ្នាំ២០១៧-២០២៥ នៅព្រឹកថ្ងៃទី១០ តុលានេះ ប្រមុខរដ្ឋាភិបាល បានស្តីបន្ទោសដូច្នេះថា៖«ច្រើនលើកច្រើនសារហើយ ខ្ញុំយកការដាស់តឿនជាការព្រមានតែម្ដង។ ប្រសិនបើមានរឿងនេះកើតឡើងតទៅទៀត គឺមិនត្រូវឲ្យ(មន្ត្រី)កាន់កាប់ការងារនេះ ព្រោះគ្រាន់តែធ្វើការងារល្អិតល្អន់មិនបានផង តើយើងទៅធ្វើការងារធំយ៉ាងម៉េចទៅ»។

បន្ទាប់ពីបន្ទោសមន្ត្រីដែលទទួលខុសត្រូវរៀបចំកម្មវីធីហើយ សម្ដេច ហ៊ុន សែន បានប្រាប់ឲ្យមន្ត្រីរដ្ឋាភិបាលគ្រប់រូប យកចិត្តទុកដាក់តាំងពីការងារតូចតាចនេះឡើយ ទើបអាចធ្វើកិច្ចការធំបាន។ បន្ថែមពីនេះប្រមុខរដ្ឋាភិបាល ព្រលយសម្តីពញាក់អារម្មណ៏មន្ត្រីទាំងនោះថា «សូម្បីកម្រិតប៉ុនខ្ញុំនេះ បានត្រឹមតែ១០ភាគរយ ជាមួយនឹងសម្ដេចព្រះបិតាជាតិ ព្រះបរមរតនកោដ្ឋតែប៉ុណ្ណោះ បើនិយាយពីការគិតគូ»។

សូមស្ដាប់សំឡេង៖