ក្បូនម៉ូតូស១២គ្រឿងត្រៀមដង្ហែម្ចាស់មេដាយមាសពិភពលោកកាយវប្បកម្ម

កីឡាជាតិ

ជាតិ

ក្បូនម៉ូតូស១២គ្រឿងត្រៀមដង្ហែម្ចាស់មេដាយមាសពិភពលោកកាយវប្បកម្ម

11, Oct 2017 , 7:59 am

រូបភាព

ដោយ:

រាជរដ្ឋាភិបាលកម្ពុជាបានត្រៀមក្បួនដង្ហែដោយមានម៉ូតូសអម១២គ្រឿងដើម្បីទទួលក្រុមអត្តពលិកកីឡាកាយវប្បកម្មដែលបានសាងភាពល្បីល្បាញឲ្យកម្ពុជានៅលើឆាកអន្តរជាតិតាមរយៈការឈ្នះមេដាយមាស១ ប្រាក់១ និងសំរឹទ្ធ១ពីការប្រកួតជ្រើសរើសជើងឯកពិភពលោកនៅទីក្រុងអ៊ូឡង់បាទ័រប្រទេសម៉ុងហ្គោលី។ ក្បួនដង្ហែនៅថ្ងៃទី១១ តុលា នេះចេញដំណើរពីអាកាសយានដ្ឋានអន្តរជាតិភ្នំពេញកាត់ដងមហាវិថីមួយចំនួនក្នុងរាជធានីភ្នំពេញ ហើយបញ្ចប់នៅទីស្នាក់គណៈកម្មាធិការជាតិអូឡាំពិកកម្ពុជា។

ដើម្បីជាការអបអរដ៏ដូចជាលើកទឹកចិត្តដល់ម្ចាស់ជ័យលាភីមេដាយមាស ប្រាក់ និងសំរឹទ្ធពីការប្រកួតកីឡាកាយវប្បកម្មជ្រើសរើសជើងឯកពិភពលោកលើកទី៩នៅទីក្រុងអ៊ូឡង់បាទ័រប្រទេសម៉ុងហ្គោលី រាជរដ្ឋាភិបាលកម្ពុជាបានរៀបចំក្បួនរថយន្តដោយមានម៉ូតូសអមចំនួន១២គ្រឿង ដើម្បីដង្ហែប្រតិភូកីឡាកាយវប្បកម្មដែលមកដល់មាតុប្រទេសនាថ្ងៃទី១១ ខែតុលា ឆ្នាំ២០១៧ នេះ។

បើយោងតាមសេចក្តីជូនដំណឹងរបស់គណៈកម្មាធិការជាតិអូឡាំពិកកម្ពុជានៅថ្ងៃទី១០ តុលា ក្បួនដង្ហែនឹងចេញដំណើរពីអាកាសយានដ្ឋានអន្តរជាតិភ្នំពេញនៅម៉ោង៣រសៀល ដោយធ្វើដំណើរតាមមហាវិថីសហព័ន្ធរុស្ស៊ីឆ្ពោះទៅកាន់មហាវិថីព្រះនរោត្តម រួចបន្តដំណើរទៅកាន់វិមានឯករាជ្យ។ បន្ទាប់មកបត់តាមផ្លូវសុធារសដង្ហែព័ន្ធសួនច្បារនាគបាញ់ទឹកចូលទៅមហាវិថីព្រះនរោត្តមកាត់តាមវិមានឯករាជ្យ រួចហើយបន្តដំណើរតាមមហាវិថីព្រះសីហនុឆ្ពោះទៅកាន់ទីស្នាក់ការ NOCC ដើម្បីបញ្ចប់ក្បួនដង្ហែ។

គួរបញ្ជាក់ថា ព្រឹត្តិការណ៍ប្រកួតកីឡាកាយវប្បកម្មជ្រើសរើសជើងឯកពិភពលោក WBPF World Bodybuilding & Physique Sports Championships ប្រចាំឆ្នាំ២០១៧ រៀបចំនៅទីក្រុងអ៊ូឡង់បាទ័រប្រទេសម៉ុងហ្គោលីចន្លោះពីថ្ងៃទី២ ដល់ថ្ងៃទី៩ ខែតុលា ដោយមានជាង៧០ប្រទេសចូលរួម។ កម្ពុជាបានបញ្ជូនកីឡាករ៣រូបឲ្យចូលរួមក្នុងព្រឹត្តិការណ៍នេះ ជាលទ្ធផលកីឡាករ សំបូរ ណាន ឈ្នះមេដាយមាស ខណៈកីឡាករ តឹក ប៊ុនវី ទទួលបានមេដាយប្រាក់ និងកីឡាករ ណុំ សុបិន្ត ទទួលបានមេដាយសំរឹទ្ធ៕