កីឡាអន្តរជាតិ
អន្តរជាតិ
World Cup៖ ព័រទុយហ្គាល់ និងបារាំង ឡើង ខណៈហូឡង់រងការឈឺចាប់
× ព័រទុយហ្គាល់ និងបារាំង បានទទួលជ័យជម្នះក្នុងពូលរៀងៗ ដើម្បីកក់បានកៅអីសម្រាប់ព្រឹត្តិការណ៍ FIFA World Cup ឆ្នាំ២០១៨ នៅប្រទេសរុស្ស៊ី។
នាជំនួបពូល B នៅក្រុង Lisbon ជើងឯក Euro ព័រទុយហ្គាល់ បានយកឈ្នះស្វីស ២-០ ដោយសារការធ្វើឲ្យបាល់ចូលទីខ្លួនឯងរបស់ខ្សែការពារ Johan Djourou និងការបន្ថែមគ្រាប់ទីពីររបស់ Andre Silva។
សម្រាប់ការប្រកួតពូល A ជើងឯករង Euro បារាំង បានយកឈ្នះភ្ញៀវបេឡារុស ២-១ ។ Antoine Griezmann និង Olivier Giroud ស៊ុតបាល់បញ្ចូលទីជាបន្តបន្ទាប់សម្រាប់បារាំង ហើយ Anton Saroka វាយបក១គ្រាប់វិញសម្រាប់បេឡារុស មុនបញ្ចប់វគ្គទី១ ។
វាជារាត្រីដ៏ខកចិត្តបំផុតសម្រាប់ហូឡង់នៅក្នុងការប្រកួតពូល A ដែលពួកគេត្រូវការស៊ុតបាល់បញ្ចូលទីយ៉ាងហោច៧គ្រាប់លើភ្ញៀវស៊ុយអែត។ ការប្រឹងប្រែងរបស់ពួកគេនាំឲ្យ Arjen Robben រកបាន២គ្រាប់នៅវគ្គទី១ ប៉ុន្តែមិនគ្រប់គ្រាន់ឡើយក្នុងការទទួលបានសំបុត្រទៅកាន់រុស្ស៊ី។
បារាំង និងព័រទុយហ្គាល់ ត្រូវរួមដំណើរជាមួយក្រុមអឺរ៉ុបផ្សេងទៀត រួមមានអាល្លឺម៉ង់ ស៊ែប៊ី ប៉ូឡូញ អង់គ្លេស អេស្ប៉ាញ និងអ៊ីស្លង់ ខណៈ៨ក្រុមផ្សេងទៀតត្រូវប្រជែងគ្នាសម្រាប់កៅអី៤ចុងក្រោយ។ ក្រុមទាំងនោះមានស៊ុយអែត ស្វីស អៀរឡង់ខាងជើង សាធារណរដ្ឋអៀរឡង់ ដាណឺម៉ាក អ៊ីតាលី ក្រិក និងក្រូអាស៊ី៕
© រក្សាសិទ្ធិដោយ thmeythmey.com