អន្តរជាតិ
ក្រៅពីឥណ្ឌូណេស៊ី និងម៉ាឡេស៊ី កងទ័ពសិង្ហបុរី ដឹកជំនួយទៅជួយជនភៀសខ្លួនមីយ៉ាន់ម៉ានៅបង់ក្លាដែស រូបភាព៖Human Rights Watch
× កងទ័ពជើងគោកសិង្ហបុរី បានដឹកជញ្ជូនជំនួយមនុស្សធម៌មានតម្លៃជាង ពីរសែនដុល្លារសិង្ហបុរីទៅកាន់បង់ក្លាដែសដើម្បីជួយដល់ប្រជាជនរ៉ូហ៊ីងយ៉ា ដែលបានភៀសខ្លួនទៅកាន់ទីនោះ ក្រោយពីមានការប៉ះទង្គិចប្រដាប់អាវុធនៅក្នុងរដ្ឋ Rakhine កាលពីចុងខែសីហាកន្លងទៅ ។
យន្តហោះប្រភេទ KC-135R របស់កងទ័ពសិង្ហបុរី នៅថ្ងៃទី១០ តុលា បានដឹកជំនួយមនុស្សធម៌ សិង្ហបុរី ដែលមានតម្លៃ ២៧០ ០០០ ដុល្លារសិង្ហបុរីទៅកាន់ប្រទេសបង់ក្លាដែស។ នេះ គឺជាការនាំយកជំនួយមនុស្សធម៌លើកដំបូងរបស់សិង្ហបុរីទៅជួយជនភៀសខ្លួនមីយ៉ាន់ម៉ា ដែលកំពុងស្នាក់នៅបង់ក្លាដែសដោយសារជម្លោះប្រដាប់អាវុធដែលផ្ទុះឡើងកាលពីចុងខែសីហា។ នេះបើយោងតាមការចុះផ្សាយរបស់ទូរទស្សន៍សិង្ហបុរី Channel News Asia ។
ជំនួយមនុស្សធម៌ដែលកងទ័ពសិង្ហបុរី បានដឹកជញ្ជូនទៅដល់បង់ក្លាដែសហើយនោះ រួមមានទាំងអាហារ ភួយ អំពូលភ្លើង សាប៊ូ និងសម្ភារៈចាំបាច់មួយចំនួនទៀត ដែលភាគច្រើនផ្តោតលើស្ត្រី និងកុមារ ដែលសុទ្ធសឹងតែជាជនងាយរងគ្រោះ ។
រដ្ឋលេខាធិការក្រសួងការពារជាតិសិង្ហបុរីលោក Mohamad Maliki Osman បាននិយាយថា វិបត្តិជនភៀសខ្លួននេះ គឺជារឿងដែលនឹកស្មានមិនដល់ ហើយសិង្ហបុរីសង្ឃឹមថា ជំនួយរបស់សិង្ហបុរីក្នុងនាមជាប្រទេសតូចមួយ នឹងអាចជួយចូលរួមចំណែកក្នុងការជួយសហគមន៍ដែលរងគ្រោះនៅក្នុងប្រទេសបង់ក្លាដែស ក៏ដូចជានៅមីយ៉ាន់ម៉ាផងដែរ ។
បើតាមរបាយការណ៍របស់ភ្នាក់ងារអង្គការសហប្រជាជាតិ មានជនភៀសខ្លួនមិនតិចជាង៣០ម៉ឺននាក់ឡើយ ដែលបានចាកចេញពីរដ្ឋ Rakhine ទៅកាន់បង់ក្លាដែស ដោយសារតែការប៉ះទង្គិចនៅចុងខែសីហាកន្លងទៅ ។ របាយការណ៍ដដែលក៏បានអះអាងដែរថា ជនភៀសខ្លួននៅតែបន្តចាកចេញ បើទោះបីជាការប្រយុទ្ធគ្នារវាងកងកម្លាំងរដ្ឋាភិបាលមីយ៉ាន់ម៉ា និងក្រុមឧទ្ទាម បានស្ងប់ស្ងាត់ទៅហើយក្តី។
ជុំវិញវិបត្តិជនភៀសខ្លួននេះដែរ មានរដ្ឋអាស៊ានមួយចំនួនដែលរួមមាន ថៃ ម៉ាឡេស៊ី និងឥណ្ឌូណេស៊ីជាដើមនោះកន្លងទៅ បានដឹកជញ្ជូនស្បៀងទៅកាន់ជំរំបណ្តោះអាសន្នដែលជនភៀសខ្លួនកំពុងតែស្នាក់នៅរួចខ្លះហើយ ខណៈ ប្រទេសមួយចំនួន ក៏បានប្រកាសត្រៀមរៀបចំទទួលពួកគេដើម្បីស្នាក់នៅជាបណ្តោះអាសន្នរហូតដល់ស្ថានភាពនៅរដ្ឋមានជម្លោះប្រដាប់អាវុធខាងលើវិលទៅរកភាពល្អប្រសើរវិញ ៕
Tag:
អាស៊ាន
សិង្ហបុរី
រ៉ូហ៊ីងយ៉ា
© រក្សាសិទ្ធិដោយ thmeythmey.com