កីឡាករត្រៀមប្រកួតយុវជនអូឡាំពិកនៅអាហ្សង់ទីនចំនួន១០រូបឆ្លងផុតដំណាក់កាលទី១

កីឡាជាតិ

ជាតិ

កីឡាករត្រៀមប្រកួតយុវជនអូឡាំពិកនៅអាហ្សង់ទីនចំនួន១០រូបឆ្លងផុតដំណាក់កាលទី១

13, Oct 2017 , 7:59 am

រូបភាព

រូបភាពពីហ្វេសប៊ុកសហព័ន្ធកីឡាចំបាប់កម្ពុជា

ដោយ:

អត្តពលិកជាយុវជនកីឡាចំបាប់ចំនួន១០រូបបានឆ្លងផុតការប្រកួតតេស្តសមត្ថភាពដំណាក់កាលទី១យ៉ាងជោគជ័យ ក្រោយឆ្លងកាត់ការប្រកួតមួយរសៀលកាលពីថ្ងៃទី១១ ខែតុលា នៅអគារដំបូលទូកក្នុងពហុកីឡដ្ឋានជាតិ។ យុវជនទាំង១០រូបនេះនឹងប្រកួតដំណាក់ទី២ ដើម្បីចម្រាញ់យកកីឡាករខ្លាំងជាងគេពីររូបត្រៀមចូលរួមប្រកួតជ្រើសរើសជើងឯកយុវជនអូឡាំពិកនៅប្រទេសអាហ្សង់ទីនក្នុងឆ្នាំ២០១៨ ខាងមុខ។

ក្រោយឆ្លងកាត់ការប្រកួតកាលពីរសៀលថ្ងៃទី១១ ខែតុលា នៅអគារដំបូលទូកក្នុងពហុកីឡដ្ឋានជាតិ បេសកកម្មចម្រាញ់យុវជនដើម្បីត្រៀមចូលរួមប្រកួតប្រកួតព្រឹត្តិការណ៍យុវជនអូឡាំពិកនៅអាហ្សង់ទីនឆ្នាំ២០១៨ របស់សហព័ន្ធកីឡាចំបាប់កម្ពុជាបានរកឃើញយុវជនដែលសមត្ថភាពខ្ពស់ចំនួន១០នាក់។ យុវជនទាំងនេះ ត្រូវបានចម្រាញ់ចេញពីយុវជន៣០នាក់មកពីខេត្តកណ្តាល កំពង់ធំ កំពង់ឆ្នាំង និងខេត្តតាកែវ ដែលបានចូលរួមប្រកួតតេស្តសមត្ថភាពដំណាក់កាលទី១។

បើយោងតាម លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជា យុវជនទាំង១០រូបនឹងដាក់ឲ្យហ្វឹកហាត់ជាមួយក្រុមយុវជនថ្នាលរបស់សហព័ន្ធរយៈពេល៣ខែ ដើម្បីត្រៀមប្រកួតតេស្តសមត្ថភាពដំណាក់កាលទី២ ដែលជាដំណាក់កាលចម្រាញ់យកកីឡាករជើងខ្លាំងពីររូបចុងក្រោយឲ្យចូលរួមប្រកួតក្នុងព្រឹត្តិការណ៍ខាងលើ។

យុវជនដែលបានឆ្លងផុតដំណាក់ទី១ទាំងនោះរួមមានកីឡាករ ធា វាសនា, ចាប សុខលី, ច្រាយ ប្រុស, ថាច សុជាតិ កីឡាការិនី វថ្ថា លក្ខិណា, យ៉ុន ដាណេ, អាង ស៊ីថូ, ជា កញ្ញា, ម៉េង សេរីរចនា និង លឹម សុខលាង៕