រយៈពេល៩ខែ គ្រោះមហន្តរាយ សម្រាប់មនុស្ស៧៦នាក់ និង១១២នាក់របួស

ជាតិ

សង្គមជាតិ

រយៈពេល៩ខែ គ្រោះមហន្តរាយ សម្រាប់មនុស្ស៧៦នាក់ និង១១២នាក់របួស

14, Oct 2017 , 7:39 pm

រូបភាព

ដោយ: ថ្មីៗ

ក្នុងរយៈពេល៩ខែ នៅឆ្នាំ២០១៧នេះ គ្រោះមហន្តរាយធម្មជាតិ បានកើតឡើងចំនួន ១៥៩លើក នៅ២៣រាជធានី-ខេត្ត និងបានបណ្ដាលឲ្យមនុស្ស ចំនួន៧៦នាក់ស្លាប់ និងរបួសចំនួន១១២នាក់ និងមានគោ គ្របីងាប់ចំនួន៥៩ក្បាល។ សាលារៀនចំនួន៣៧អគារ អគារផ្សេងទៀតចំនួន២៨ និងផ្ទះជាង៤ពាន់ខ្នង ក៏បានរងផលប៉ះពាល់ និងខូចខាតដោយសារគ្រោះមហន្តរាយធម្មជាតិនេះដែរ។

លោក ញឹម វណ្ណដា ប្រធានគណៈកម្មាធិការជាតិគ្រប់គ្រងគ្រោះមហន្តរាយ បានឲ្យដឹងថា ខេត្តចំនួន៥ ដែលរងគ្រោះធ្ងន់ធ្ងរជាងគេ គឺខេត្តពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ នេះបើតាម សារព័ត៌មានជាតិកម្ពុជា(AKP)ចុះផ្សាយនៅថ្ងៃទី៩ ខែតុលាកន្លងទៅ។

AKP បានស្រង់សម្តី លោក ញឹម វណ្ណាដា បន្តថាវិធានការចម្បងដើម្បីទប់ទល់បញ្ហានេះ គណៈកម្មាធិការជាតិគ្រប់គ្រងគ្រោះមហន្តរាយ សហការជាមួយក្រសួងប្រៃសណីយ៍ និងទូរគមនាគមន៍ និងអង្គការPIN ដាក់ដំណើរការប្រព័ន្ធប្រកាសជាសំឡេង ពីគ្រោះមហន្តរាយតាមទូរស័ព្ទដៃ នៅខេត្តចំនួន៧ គឺបន្ទាយមានជ័យ កំពង់ធំ បាត់ដំបង សៀមរាប ខេត្តពោធិ៍សាត់ កំពត និងខេត្តកំពង់ឆ្នាំង។ សម្រាប់ការជូនដំណឹងមុន ពេលកម្ពស់ទឹកមានការជន់ខ្លាំង គណៈកម្មាធិការជាតិគ្រប់គ្រងគ្រោះមហន្តរាយ បានដាក់ឧបករណ៍វាស់កម្ពស់ទឹកស្វ័យប្រវត្តិចំនួន២កន្លែង គឺនៅស្រុកទឹកឈូ ខេត្តកំពត និងនៅស្រុកភ្នំក្រវាញ ខេត្តពោធិ៍សាត់៕
ប្រភព៖AKP